ସାହାଜବାହଲ, (କେପିଏନ୍ଏସ୍) : ଗୋପୀନାଥ ମହାବିଦ୍ୟାଲୟ ସାହାଜବାହଲ ଠାରେ ଜାତୀୟ ଆଇନ ସେବା ଦିବସ ପାଳିତ ହେବା ସହିତ ଆଇନ ସଚେତନତା ଶିବିର ଅନୁଷ୍ଠିତ ହୋଇଯାଇଛି । ଏହି କାର୍ଯ୍ୟକ୍ରମରେ ଜିଲ୍ଲା ଆଇନ ସେବା ପ୍ରାଧିକରଣଙ୍କ ଅଧ୍ୟକ୍ଷ ଡକ୍ଟର ପବିତ୍ର ମୋହନ ସାମଲ, ଜିଲ୍ଲା ଆଇନ ସେବା ପ୍ରାଧିକରଣ, ବଲାଙ୍ଗିର, ସଚିବ, ପବିତ୍ରାନନ୍ଦ ପ୍ରଧାନ, ରେଜିଷ୍ଟ୍ରାର୍ ସିଭିଲ୍ କୋର୍ଟ ବଲାଙ୍ଗିରର ଶ୍ରୀଦୀପ ମିଶ୍ର, ଗୋପୀନାଥ ମହାବିଦ୍ୟାଲୟର ଅଧ୍ୟକ୍ଷ ପ୍ରେମାଧର ମହାକୁର ପ୍ରମୁଖ ଉପସ୍ଥିତ ଥିଲେ । ଏହି ଶିବିରରେ ପ୍ରାଧିକରଣଙ୍କ ଅଧ୍ୟକ୍ଷ ଜାତୀୟ ଆଇନ ସେବା ଦିବସର ତାତ୍ପର୍ଯ୍ୟ ସରଳ ଭାବରେ ବୁଝାଇବା ସହ ଜିଲ୍ଲା ଆଇନ ସେବା ପ୍ରାଧିକରଣ କିପରି ମାଗଣା ଆଇନ ସେବା ଯୋଗାଉଛି ତା ସଂପର୍କରେ ଛାତ୍ରଛାତ୍ରୀଙ୍କୁ ବିସ୍ତୃତ ଭାବରେ ବୁଝାଇଥିଲେ । ରେଜିଷ୍ଟ୍ରାର୍ ସିଭିଲ୍ କୋର୍ଟ ଲୋକ ଅଦାଲତର ଉପକାରିତା ସଂପର୍କରେ ସବିଶେଷ ବୁଝାଇଥିଲେ । ପ୍ରାଧ୍ୟାକରଣର ସଚିବ, ଆଇନ ସେବା ପ୍ରାଧ୍ୟାକରଣର କାର୍ଯ୍ୟକାରିତା ଓ ନିଶୁଳ୍କ ଆଇନ ସେବା ସଂଖ୍ୟା ୧୫୧୦୦ର ଉପଯୋଗୀତା ଉପରେ ଅବଗତ କରାଇଥିଲେ । ଏଥି ସହିତ ରାଷ୍ଟ୍ରୀୟ ଆଇନ ସେବା ପ୍ରାଧିକରଣଙ୍କ ଥିମ୍ ଗୀତ ପରିବେଷଣ କରାଯାଇଥିଲା । ଏହି କାର୍ଯ୍ୟକ୍ରମରେ ପାରା ଆଇନ ସେଚ୍ଛାସେବୀ ଶ୍ରୀମତୀ ବିଦ୍ୟୁତ୍ ଲତା ଖମାରୀ, ଶ୍ରୀମତୀ ତୁଲାବତୀ ମେହେର, ଲକ୍ଷ୍ମଣ ମହାକୁର ଓ ଆଇନ ସେବା କର୍ମକର୍ତ୍ତା ସହଯୋଗ କରିଥିଲେ । ସର୍ବଶେଷରେ ଏକ ରାଲି ବାହାରି ଅଂଚଳ ପରିଭ୍ରମଣ କରିଥିଲେ ।