ରାସ୍ତା ରୋଲର ଡ୍ରାଇଭରଙ୍କୁ ଦୁର୍ବୃତ୍ତଙ୍କ ଧାରୁଆ ଅସ୍ତ୍ରରେ ଆକ୍ରମଣ ଅଭିଯୋଗ : ବଲାଙ୍ଗିର ମେଡିକାଲ୍ ସ୍ଥାନାନ୍ତର
ମୁରିବାହାଲ, (ଦୁର୍ଗାନନ୍ଦ ମହାକୁର) : ବଲାଙ୍ଗିର ଜିଲ୍ଲା ମୁରିବାହାଲ ଥାନା ପତ୍ରାପାଲି(କ)ରୁ ଦେବଙ୍ଗ ଗାଁ ମଝିରେ ଚାଲିଥିବା ରାସ୍ତା ନିର୍ମାଣରେ ନିୟୋଜିତ ଜଣେ ରୋଲର ଡ୍ରାଇଭରଙ୍କୁ ଧାରୁଆ ଅସ୍ତ୍ରରେ ଆକ୍ରମଣ ହୋଇଥିବା ଦେଖିବାକୁ ମିଳିଛି । ନୂଆପଡ଼ା ଜିଲ୍ଲା ବୋଡ଼େନ ଥାନା ବୋରଗାଁ ଅଞ୍ଚଳର ସାନ ମାଝୀ(୪୦)ନାମକ ଜଣେ ଯୁବକ ବଙ୍ଗୋମୁଣ୍ଡାରୁ ମୁରିବାହାଲ ପୂର୍ତ୍ତ ରାସ୍ତା ନିର୍ମାଣରେ ରୋଲର ଡ୍ରାଇଭର ରୂପେ କାର୍ଯ୍ୟ କରୁଥିଲେ । ଶନିବାର ଦିନ ୧ଟା ବେଳେ ସେ ଖାଇବାକୁ ପାଣି ଆଣିବାକୁ ଗଲା ବେଳେ ୨ ଜଣ ଅଚିହ୍ନା ଯୁବକ ଏକ କଳା ବାଇକ୍ରେ ତାଙ୍କ ପାଖକୁ ଆସି ମୋବାଇଲ ଟିକେ ଦେବା ପାଇଁ ମାଗିଥିଲେ । ସାନ ମୋବାଇଲ ଦେବା ପାଇଁ ମନା କରିବା ସହ କାହାକୁ କଲ୍ କରିବାର ଅଛି କୁହନ୍ତୁ ମୁଁ କଲ୍ କରିଦେବି ବୋଲି କହିଲେ । ସେମାନେ ଦୁଇଟି ନମ୍ବର ଡାଏଲ୍ କରିବାକୁ ଡାକିଥିଲେ ଯାହା ଲାଗିନଥିଲା । ଏହାପରେ ଉଭୟ ଦୁର୍ବୃତ୍ତ ସାନ ଧରିଥିବା ମୋବାଇଲକୁ ଲୁଟିବାକୁ ଚେଷ୍ଟା କରିଥିଲେ । ସେ ପ୍ରତିବାଦ କରିବାରୁ ତାଙ୍କୁ ଏକ ଧାରୁଆ ଅସ୍ତ୍ରରେ ଆକ୍ରମଣ କରିବାରୁ ତାଙ୍କ ଛାତି ତଳେ ଆଘାତ ଲାଗି ପ୍ରଚୁର ରକ୍ତସ୍ରାବ ହୋଇଥିଲା । ଆକ୍ରମଣ କରି ସେମାନେ ଫେରାର ହୋଇଯାଇଥିଲେ । ରାସ୍ତା ନିର୍ମାଣରେ ଥିବା ଅନ୍ୟ ଶ୍ରମିକ ଓ ସ୍ୱେଚ୍ଛାସେବୀମାନେ ଗୁରୁତର ସାନଙ୍କୁ ପ୍ରଥମେ ମୁରିବାହାଲ ଓ ପରେ ଅବସ୍ଥା ଗୁରୁତର ଥିବାରୁ ବଲାଙ୍ଗିର ଭୀମଭୋଇ ମେଡ଼ିକାଲକୁ ସ୍ଥାନାନ୍ତର କରିଥିବା ଜଣାପଡ଼ିଛି । ଖବର ପାଇ ମୁରିବାହାଲ ଥାନା ପୁଲିସ ଘଟଣାସ୍ଥଳକୁ ପହଞ୍ଚି ତଦନ୍ତ ଜାରି ରଖିଥିବା ବେଳେ ବର୍ତ୍ତମାନ ସୁଦ୍ଧା ଥାନାରେ କୌଣସି ଏତଲା ହୋଇନଥିବା ପୁଲିସ ସୂତ୍ରରୁ ସୂଚନା ମିଳିଛି ।