ଆଇଟିୟୁ-ଡବ୍ଲୁଟିଏସ୍ଏ ୨୦୨୪ ଉଦ୍ଯାପିତ : ଦୂରସଞ୍ଚାର ଏବଂ ଡିଜିଟାଲ ନବୋନ୍ମେଷ କ୍ଷେତ୍ରରେ ଅଗ୍ରଣୀ ସଂକଳ୍ପ ପାଇଁ ବୈଶ୍ୱିକ ସହଯୋଗ ସହିତ ଦୂରସଞ୍ଚାର/ଆଇସିଟିର ଭବିଷ୍ୟତ ଗଠନ କ୍ଷେତ୍ରରେ ନେତୃତ୍ୱ ନେଉଛି ଭାରତ
- ‘‘ପ୍ରଯୁକ୍ତି ବିଦ୍ୟାର ବ୍ୟବହାର ମାଧ୍ୟମରେ ଭାରତ କେବଳ ଡିଜିଟାଲ ବିଭାଜନକୁ ଦୂର କରିବା ଦିଗରେ ନୁହେଁ ବରଂ ଲିଙ୍ଗଗତ ଅନ୍ତର୍ଭୁକ୍ତୀକରଣ ସୁନିଶ୍ଚିତ କରିବା ଦିଗରେ ମଧ୍ୟ ଏକ ବଡ଼ ପଦକ୍ଷେପ ନେଇଛି’’ : ଜ୍ୟୋତିରାଦିତ୍ୟ ଏମ୍. ସିନ୍ଧିଆ
- ‘ଏହା ହେଉଛି ସବୁଠାରୁ ସମାବେଶୀ ଡବ୍ଲୁଟିଏସଏ, ଯେଉଁଥିରେ ଶିଳ୍ପ ଏବଂ ବୈଷୟିକ ସମୁଦାୟ, ଯୁବବର୍ଗ ଏବଂ ମହିଳା ସାମିଲ ଅଛନ୍ତି’ : ଡୋରିନ୍ ବୋଗଡାନ-ମାର୍ଟିନ୍, ଆଇଟିୟୁ ଏସ୍ଜି
- ଆଇଟିୟୁ-ଡବ୍ଲୁଟିଏସ୍ଏ ୨୦୨୪ରେ ୧୬୦ରୁ ଅଧିକ ଦେଶରୁ ୩,୭୦୦ ପ୍ରତିନିଧିଙ୍କ ଐତିହାସିକ ଉପସ୍ଥିତି, ଏହା ଡବ୍ଲୁଟିଏସ୍ଏ ସଭାରେ ସର୍ବାଧିକ ଅଂଶଗ୍ରହଣ
ନୂଆଦିଲ୍ଲୀ, (ପିଆଇବି) : ଆନ୍ତର୍ଜାତୀୟ ଦୂରସଂଚାର ସଂଘ – ବିଶ୍ୱ ଦୂରସଞ୍ଚାର ମାନକୀକରଣ ସଭା (ଆଇଟିୟୁ-ଡବ୍ଲ୍ୟୁଟିଏସ୍ଏ ୨୦୨୪) ଶେଷ ହେବା ସହିତ ଭାରତ ବିଶ୍ୱ ଦୂରସଞ୍ଚାରର ଭବିଷ୍ୟତ ଗଠନରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଛି । ଏହାର ସକ୍ରିୟ ଯୋଗଦାନ ମାଧ୍ୟମରେ, ଭାରତ ସଫଳତାର ସହ ଯୁଗାନ୍ତକାରୀ ପ୍ରସ୍ତାବ ଦେଇଛି ଏବଂ ବର୍ତ୍ତମାନର ସଂକଳ୍ପଗୁଡିକର ସଂଶୋଧନରେ ଯୋଗଦାନ କରିଛି ତଥା ଏଥିପାଇଁ ସଦସ୍ୟ ରାଷ୍ଟ୍ରମାନଙ୍କ ଠାରୁ ବ୍ୟାପକ ସମର୍ଥନ ପାଇଛି । ସମାପନ ସମାରୋହ ସହ ଏହି କାର୍ଯ୍ୟକ୍ରମ ଆଜି ଶେଷ ହୋଇଛି । ଏଥିରେ ସଞ୍ଚାର ଓ ଉତ୍ତର-ପୂର୍ବାଞ୍ଚଳ ବିକାଶ ମନ୍ତ୍ରୀ ଜ୍ୟୋତିରାଦିତ୍ୟ ଏମ୍ ସିନ୍ଧିଆ, ଆଇଟିୟୁ ମହାସଚିବ ଡୋରିନ୍ ବୋଗଡାନ-ମାର୍ଟିନ୍, ସଞ୍ଚାର ଓ ଗ୍ରାମ୍ୟ ଉନ୍ନୟନ ରାଷ୍ଟ୍ରମନ୍ତ୍ରୀ ଡ. ପେମସାନି ଚନ୍ଦ୍ର ଶେଖର, ଦୂରସଞ୍ଚାର ବିଭାଗ ସଚିବ, ଆଇଟିୟୁର ସଚିବଙ୍କ ସମେତ ଭାରତ ସରକାର ଓ ଆଇଟିୟୁର ପ୍ରମୁଖ କର୍ମକର୍ତ୍ତାମାନେ ଯୋଗ ଦେଇଥିଲେ । ସମାବେଶକୁ ସମ୍ବୋଧିତ କରି ଜ୍ୟୋତିରାଦିତ୍ୟ ସିନ୍ଧିଆ କହିଛନ୍ତି, ‘‘ଏହି ଡବ୍ଲ୍ୟୁଟିଏସଏ-୨୪ ପ୍ରମାଣିତ କରିଛି ଯେ, ଯେତେବେଳେ ଆମେ ଏକ ସାଧାରଣ ଉଦ୍ଦେଶ୍ୟ ସହିତ ସହଯୋଗ କରୁ, ସେତେବେଳେ ଟେକ୍ନୋଲୋଜି ସମାନତା ଏବଂ ପ୍ରଗତିର ଆଲୋକ ପାଲଟିଯାଏ । ଆଗକୁ ଯିବାର ବାଟରେ ଅନେକ ଆହ୍ଵାନ ରହିଛି, ତଥାପି ଏହା ସକାରାତ୍ମକ ପରିବର୍ତ୍ତନ ପାଇଁ ଏକ ଉତପ୍ରେରକ ଭାବରେ ପ୍ରଯୁକ୍ତିବିଦ୍ୟାକୁ ବ୍ୟବହାର କରିବାକୁ ପର୍ଯ୍ୟାପ୍ତ ସୁଯୋଗ ପ୍ରଦାନ କରେ । ଭାରତ ଏହି ସହଭାଗୀ ଯାତ୍ରାରେ ନିଜର ଭୂମିକା ଗ୍ରହଣ କରିବାକୁ ପ୍ରସ୍ତୁତ ଏବଂ ଆମେ ଆନ୍ତର୍ଜାତୀୟ ସହଯୋଗକୁ ସମର୍ଥନ କରିବୁ ତଥା ବିଶ୍ୱସ୍ତରୀୟ ମାନର ବିକାଶରେ ସକ୍ରିୟ ଭାବରେ ଯୋଗଦାନ କରିବୁ । ପ୍ରଯୁକ୍ତି ବିଦ୍ୟାର ବ୍ୟବହାର ମାଧ୍ୟମରେ ଭାରତ କେବଳ ଡିଜିଟାଲ ବିଭାଜନକୁ ଦୂର କରିବା ଦିଗରେ ନୁହେଁ ବରଂ ଲିଙ୍ଗଗତ ଅନ୍ତର୍ଭୁକ୍ତୀକରଣ ସୁନିଶ୍ଚିତ କରିବା ଦିଗରେ ମଧ୍ୟ ଏକ ବଡ଼ ପଦକ୍ଷେପ ନେଇଛି ବୋଲି ସେ କହିଥିଲେ । ଆଇଟିୟୁ ମହାସଚିବ ଡୋରିନ୍ ବୋଗଡାନ-ମାର୍ଟିନ୍ ତାଙ୍କ ଅଭିଭାଷଣରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ବକ୍ତବ୍ୟର ଉଦାହରଣ ଦେଇ କହିଥିଲେ, ‘‘ଆସନ୍ତୁ ପ୍ରଧାନମନ୍ତ୍ରୀ ମୋଦୀଙ୍କ ଉକ୍ତିକୁ ଧ୍ୟାନରେ ରଖି ଆମେ ଡବ୍ଲୁଟିଏସ୍ଏ ଫଳାଫଳକୁ କାର୍ଯ୍ୟରେ ପରିଣତ କରିବା । ‘ନିରାପତ୍ତା, ସମ୍ମାନ ଓ ସମାନତାର ନୀତିକୁ ଆମ ପ୍ରୟାସର କେନ୍ଦ୍ରରେ ରଖି’ ଏକ ସମାବେଶୀ ଡିଜିଟାଲ ଭବିଷ୍ୟତ ଦିଗରେ ଆସନ୍ତୁ ଏହି ଯାତ୍ରା ଜାରି ରଖିବା ଯାହା ବୈଷୟିକ ସ୍ତରରେ ସୁଦୃଢ଼ ଓ ମାନଦଣ୍ଡର ଏକ ଦୃଢ଼ ଭିତ୍ତିଭୂମି ଉପରେ ନିର୍ମିତ ହୋଇଥିବ । ଏହା ନୈତିକତା ଦୃଷ୍ଟିରୁ ସୁଦୃଢ଼ ହୋଇଥିବ ଏବଂ ମୂଳତଃ ନବସୃଜନ ଓ ଅନ୍ତର୍ଭୁକ୍ତୀକରଣ ଆଧାରତ ହୋଇଥିବ । ଏହି ଅବସରରେ ସଂଚାର ଓ ଗ୍ରାମ୍ୟ ଉନ୍ନୟନ ରାଷ୍ଟ୍ରମନ୍ତ୍ରୀ ଡ. ପେମସାନି ଚନ୍ଦ୍ର ଶେଖର କହିଲେ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଦୂରଦୃଷ୍ଟିସମ୍ପନ୍ନ ନେତୃତ୍ୱରେ ଭାରତ ରଣନୀତିକ ଭାଗିଦାରୀ, ଯୁଗାନ୍ତକାରୀ ଗବେଷଣା ଓ ନବସୃଜନ ଭିତ୍ତିକ ବିକାଶ ମାଧ୍ୟମରେ ବିଶ୍ୱ ନେତୃତ୍ୱ ପ୍ରତି ନିଜର ପ୍ରତିବଦ୍ଧତା ପ୍ରଦର୍ଶନ କରିଛି ଏବଂ ଡିଜିଟାଲ ବିପ୍ଳବରେ ନିଜର ଅଗ୍ରଣୀ ସ୍ଥାନକୁ ପୁନଃପ୍ରତିଷ୍ଠିତ କରିଛି ।
ଭାରତର ପ୍ରମୁଖ ପ୍ରସ୍ତାବଗୁଡ଼ିକ ମଧ୍ୟରେ ରହିଛି :
୧. ଡିଜିଟାଲ ସାର୍ବଜନୀନ ଭିତ୍ତିଭୂମି ଉପରେ ମାନକୀକରଣ କାର୍ଯ୍ୟକଳାପ ବୃଦ୍ଧି ପାଇଁ ଏକ ନୂତନ ସଂକଳ୍ପ
୨. ଦୂରସଞ୍ଚାର / ସୂଚନା ଏବଂ ଯୋଗାଯୋଗ ପ୍ରଯୁକ୍ତି (ଆଇସିଟି) ସମର୍ଥନରେ ଏଆଇ ଜ୍ଞାନକୌଶଳ ଉପରେ ଆଇଟିୟୁ ଦୂରସଞ୍ଚାର ମାନକୀକରଣ କ୍ଷେତ୍ରର ମାନକୀକରଣ କାର୍ଯ୍ୟକଳାପ ଉପରେ ଏକ ନୂତନ ସଂକଳ୍ପ
ଭାରତ ସମର୍ଥିତ ଅନ୍ୟ ନୂତନ ଆଇଟିୟୁ-ଟି ସଂକଳ୍ପଗୁଡ଼ିକ ମଧ୍ୟରେ ରହିଛି :
୧. ଦୀର୍ଘସ୍ଥାୟୀ ଡିଜିଟାଲ ରୂପାନ୍ତର ଉପରେ ମାନକୀକରଣ କାର୍ଯ୍ୟକଳାପ ବୃଦ୍ଧି
୨. ମେଟାଭର୍ସ ମାନକୀକରଣକୁ ପ୍ରୋତ୍ସାହିତ ଏବଂ ସୁଦୃଢ଼ କରିବା
୩. ଯାନବାହନ ଯୋଗାଯୋଗ ପାଇଁ ମାନକୀକରଣ କାର୍ଯ୍ୟକଳାପକୁ ପ୍ରୋତ୍ସାହିତ ଏବଂ ସୁଦୃଢ଼ କରିବା
୪. ଆଇଟିୟୁ ଦୂରସଞ୍ଚାର ମାନକୀକରଣ କ୍ଷେତ୍ରରେ ରଣନୀତିକ ଯୋଜନା
୫. ଜରୁରୀକାଳୀନ ଯୋଗାଯୋଗ ପାଇଁ ହ୍ୟାଣ୍ଡସେଟ୍-ଡେରାଇଭଡ୍ କଲର୍ ଲୋକେସନ୍ ସୂଚନା ପ୍ରଦାନ କରିବା
୬. ଆଇଟିୟୁ-ଟି ମାନକୀକରଣ କାର୍ଯ୍ୟକଳାପରେ ପରବର୍ତ୍ତୀ ପିଢ଼ିର ବିଶେଷଜ୍ଞଙ୍କ ଯୋଗଦାନ ବୃଦ୍ଧି କରିବା ।
ଏହି ପଦକ୍ଷେପଗୁଡ଼ିକ କେବଳ ଟେଲି ଯୋଗାଯୋଗ/ ସୂଚନା ଓ ସଞ୍ଚାର ପ୍ରଯୁକ୍ତି (ଆଇସିଟି) କ୍ଷେତ୍ରରେ ଅଗ୍ରଣୀ ଭାବରେ ଭାରତର ଭୂମିକାକୁ ସୁଦୃଢ଼ କରେ ନାହିଁ, ବରଂ ଏକ ସୁଦୃଢ଼ ଡିଜିଟାଲ ସାର୍ବଜନୀନ ଭିତ୍ତିଭୂମି ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଦୃଷ୍ଟିକୋଣ ସହିତ ନିରବଚ୍ଛିନ୍ନ ଭାବରେ ଯୋଡ଼ି ହୋଇଛି, ଯାହା ଭାରତର ଜି-୨୦ ଅଧ୍ୟକ୍ଷତା ସମୟରେ ସ୍ପଷ୍ଟ ହୋଇଛି । ଡିଜିଟାଲ ପ୍ରଯୁକ୍ତି ବିଦ୍ୟା ପାଇଁ ଏକ ବିଶ୍ୱସ୍ତରୀୟ ଢାଞ୍ଚା ସୃଷ୍ଟି କରିବା ଉପରେ ତାଙ୍କର ଗୁରୁତ୍ୱ ବିଶ୍ୱ ପ୍ରଶାସନ ପାଇଁ ଏହି ସଂକଳ୍ପଗୁଡିକର ଗୁରୁତ୍ୱକୁ ସୂଚାଇଥାଏ । ଏହି ସଂକଳ୍ପଗୁଡ଼ିକ ପ୍ରଧାନମନ୍ତ୍ରୀ ମୋଦୀଙ୍କ ଡିଜିଟାଲ ଇଣ୍ଡିଆର ଚାରିଟି ସ୍ତମ୍ଭ – କମ୍ ମୂଲ୍ୟର ଡିଭାଇସ୍, ଦେଶର କୋଣ ଅନୁକୋଣରେ ଡିଜିଟାଲ ସଂଯୋଗର ବ୍ୟାପକ ପ୍ରସାର, ସହଜରେ ଉପଲବ୍ଧ ଡାଟା ଏବଂ ‘ଡିଜିଟାଲ ଫାଷ୍ଟ’ର ଲକ୍ଷ୍ୟ ସହିତ ମଧ୍ୟ ସଂଯୁକ୍ତ । ଏହାବ୍ୟତୀତ ପ୍ରାୟ ୨୫ଟି ପ୍ରଚଳିତ ସଂକଳ୍ପ ସଂଶୋଧନରେ ମଧ୍ୟ ଭାରତ ଗୁରୁତ୍ୱପୂର୍ଣ୍ଣ ଯୋଗଦାନ ଦେଇଛି । ଆଇଏସ୍ଓ/ଆଇଇସି, ଟେଲିକମ୍ ନମ୍ବରିଂ ମ୍ୟାନେଜମେଣ୍ଟ, ସାଇବର ସିକ୍ୟୁରିଟି, ଭିନ୍ନକ୍ଷମଙ୍କ ପାଇଁ ଦୂରସଞ୍ଚାର/ଆଇସିଟି ଆକ୍ସେସିବିଲିଟି ଏବଂ ଆଇସିଟି ଓ ପରିବେଶ/ଜଳବାୟୁ ପରିବର୍ତ୍ତନ କ୍ଷେତ୍ରରେ ସହଯୋଗ ଏବଂ ସହମତି ହୋଇଛି । ଏହି ପ୍ରଗତି ଏକ ସହଯୋଗୀ ଭାବନାକୁ ପ୍ରତିଫଳିତ କରେ । ଅନେକ ସଂକଳ୍ପ ବିନା ପରିବର୍ତ୍ତନରେ ସହମତି ହାସଲ କରିଛି ଯାହା ବିଶ୍ୱସ୍ତରୀୟ ମାନଦଣ୍ଡ ପ୍ରତି ଏକ ସମନ୍ୱିତ ଆଭିମୁଖ୍ୟକୁ ସୁଦୃଢ଼ କରିଥାଏ । ଭାରତର ସକ୍ରିୟ ଅଂଶଗ୍ରହଣ କେବଳ ଟେଲିଯୋଗାଯୋଗ କ୍ଷେତ୍ରରେ ଏହାର ନେତୃତ୍ୱକୁ ପ୍ରଦର୍ଶିତ କରିନାହିଁ ବରଂ ଆମେରିକା, ବ୍ରିଟେନ, ବ୍ରାଜିଲ, ଚୀନ, ଜାପାନ ଏବଂ ଅଷ୍ଟ୍ରେଲିଆ ସମେତ ଅନେକ ଦେଶର ସମର୍ଥନ ହାସଲ କରିଛି । ଏହି କାର୍ଯ୍ୟକ୍ରମରେ ଭାରତର ଅଧ୍ୟକ୍ଷତାରେ ଢାଞ୍ଚାଗତ ସଂସ୍କାର ପାଇଁ ଅନେକ ଦୀର୍ଘ ଆଲୋଚନା ମଧ୍ୟ ସଫଳ ହୋଇଛି । ଉଦାହରଣ ସ୍ୱରୂପ, ଏସଜି୯ ଏବଂ ଏସ୍ଜି୧୬ର ମିଶ୍ରଣ ଉପରେ ଆଧାରିତ ଏକ ନୂତନ ଅଧ୍ୟୟନ ଗୋଷ୍ଠୀ ଗଠନ କରିବା, ଗୋଟିଏ ଦେଶରୁ ଗୋଟିଏରୁ ଅଧିକ ଅଧ୍ୟକ୍ଷ ନରହିବା ଏବଂ ଏକାଧିକ ଭିନ୍ନ ମତ ସତ୍ତ୍ୱେ ନେତୃତ୍ୱ ପଦବୀ ଚୂଡ଼ାନ୍ତ କରିବା ଆଦି ।
ଡବ୍ଲ୍ୟୁଟିଏସଏ ୨୪ରେ ୮ଟି ନୂଆ ସଂକଳ୍ପ ଥିବା ବେଳେ ୪୪ଟି ସଂଶୋଧିତ ସଂକଳ୍ପ ନିଆଯାଇଥିଲା । ୧୦ ଦିନ ଧରି ଚାଲିଥିବା ଏହି କାର୍ଯ୍ୟକ୍ରମରେ ଭାରତକୁ ଟେଲିଯୋଗାଯୋଗ ଶିଳ୍ପରେ ଏକ ଗୁରୁତ୍ୱପୂର୍ଣ୍ଣ ରାଷ୍ଟ୍ର ଭାବରେ ପ୍ରତିଷ୍ଠିତ କରିବାର ରେକର୍ଡ ଭାଙ୍ଗିଥିବା ମାଇଲଖୁଣ୍ଟ ଦେଖିବାକୁ ମିଳିଥିଲା ।
ଏହି କାର୍ଯ୍ୟକ୍ରମର କେତେକ ପ୍ରମୁଖ ଆକର୍ଷଣ ଗୁଡ଼ିକ ହେଲା :
୧. ରେକର୍ଡ ଅଂଶଗ୍ରହଣ: ୧୬୦ରୁ ଅଧିକ ଦେଶରୁ ୩,୭୦୦ ପ୍ରତିନିଧିଙ୍କ ଐତିହାସିକ ଉପସ୍ଥିତି, ଯାହା ଡବ୍ଲୁଟିଏସ୍ଏ ବିଧାନସଭାରେ ସର୍ବାଧିକ ଅଂଶଗ୍ରହଣ କରିଛି ।
୨. ନେତୃତ୍ୱ ମାନ୍ୟତା : ବିଶିଷ୍ଟ ଦୂରସଞ୍ଚାର ବିଶେଷଜ୍ଞ ତଥା ଭାରତ ସରକାରଙ୍କ ଦୂରସଂଚାର ବିଭାଗର ପୂର୍ବତନ ପରାମର୍ଶଦାତା ଆର୍ ଆର୍ ମିତ୍ର ସର୍ବସମ୍ମତିକ୍ରମେ ଡବ୍ଲ୍ୟୁଟିଏସ୍ଏ-୨୪ର ଅଧ୍ୟକ୍ଷ ଭାବେ ନିର୍ବାଚିତ ହୋଇଛନ୍ତି ।
୩. ଅଧ୍ୟୟନ ଦଳରେ ନେତୃତ୍ୱ : ଆଇଟିୟୁ-ଟିରେ ଭାରତ ସର୍ବାଧିକ ନେତୃତ୍ୱ ପଦବୀ ହାସଲ କରିଛି । ବର୍ତ୍ତମାନ ସମସ୍ତ ୧୦ଟି ଆଇଟିୟୁ-ଟି ଅଧ୍ୟୟନ ଦଳ ଏବଂ ଏସସିଭି (ଶବ୍ଦଭଣ୍ଡାର ଉପରେ ମାନକ କମିଟି)ରେ ନେତୃତ୍ୱ ଭୂମିକାରେ ଭାରତୀୟ ବିଶେଷଜ୍ଞ ଅଛନ୍ତି । ଡବ୍ଲ୍ୟୁଟିଏସ୍ଏ ୨୨ରେ ଏଭଳି ୭ଟି ପଦବୀରୁ ଏହା ଏବେ ୧୧ଟି ସ୍ଥାନକୁ ବୃଦ୍ଧି ପାଇଛି ।
୪. ଲିଙ୍ଗଗତ ସନ୍ତୁଳନ : ଜେନେଭା ବାହାରେ ଅନୁଷ୍ଠିତ ଡବ୍ଲୁଟିଏସ୍ଏ (ଜେନେଭା ୨୦୨୨ରେ, ଏହା ୩୨%) ପାଇଁ ସର୍ବାଧିକ ୨୬% ମହିଳା ଅଂଶଗ୍ରହଣ ସହିତ ଟେଲିଯୋଗାଯୋଗରେ ଲିଙ୍ଗଗତ ସମାନତା ବୃଦ୍ଧି କରି ଏହି କାର୍ଯ୍ୟକ୍ରମ ଅଭୂତପୂର୍ବ ମହିଳାଙ୍କ ଅଂଶଗ୍ରହଣକୁ ପାଳନ କରିଥିଲା ।
୫. ସର୍ବାଧିକ ପାର୍ଶ୍ୱ କାର୍ଯ୍ୟକ୍ରମ : ଡବ୍ଲ୍ୟୁଟିଏସ୍ଏ ସହିତ ଏଆଇ ଫର୍ ଗୁଡ୍: ଇଣ୍ଡିଆ ଇମ୍ପେକ୍ଟ, ନେଟୱାର୍କ ଫର ୱିମେନ୍ (ଏନ୍ଓଡବ୍ଲ୍ୟୁ), କାଲିଡୋସ୍କୋପ୍, ନିୟାମକ ସମ୍ମିଳନୀ, ଜାତିସଂଘ ବିପର୍ଯ୍ୟୟ ବିପଦ ହ୍ରାସ କନଫରେନ୍ସିଂ, ଆଇଟିୟୁ-ଡବ୍ଲ୍ୟୁଏଚ୍ଓ ସୁରକ୍ଷିତ ଶୁଣାଣି, ହ୍ୟାକାଥନ୍, ଆଇଟିୟୁ ଏକ୍ସପୋ ଇତ୍ୟାଦି ସହିତ ୧୫ରୁ ଅଧିକ ଉଚ୍ଚସ୍ତରୀୟ ପାର୍ଶ୍ୱ କାର୍ଯ୍ୟକ୍ରମ ଆୟୋଜନ କରାଯାଇଥିଲା ।
୬. ଅଭୂତପୂର୍ବ ଶୈକ୍ଷିକ ସଂପୃକ୍ତି: ପଞ୍ଚଦଶ ଆଇଟିୟୁ କାଲିଡୋସ୍କୋପ ସମ୍ମିଳନୀରେ ରେକର୍ଡ ଗବେଷଣାପତ୍ର ଦାଖଲ କରାଯାଇଥିଲା, ଯାହା ଡିଜିଟାଲ ଭିତ୍ତିଭୂମିର ଭବିଷ୍ୟତ ପ୍ରତି ବିଶ୍ୱର ଆଗ୍ରହକୁ ପ୍ରତିଫଳିତ କରିଥିଲା । ସେଥିମଧ୍ୟରୁ ଦୁଇ ତୃତୀୟାଂଶ ଗବେଷଣାପତ୍ର ଭାରତର ହୋଇଥିବା ବେଳେ ଶ୍ରେଷ୍ଠ ୩ଟି ଗବେଷଣାପତ୍ରକୁ ଶ୍ରେଷ୍ଠ ପୁରସ୍କାର ପ୍ରଦାନ କରାଯାଇଥିଲା ।
୭. ଯୁବ ଓ ଉଦ୍ୟୋଗୀଙ୍କ ଅଂଶଗ୍ରହଣ: ରୋବୋଟିକ୍ସ ଫର୍ ଗୁଡ୍ ୟୁଥ୍ ଚ୍ୟାଲେଞ୍ଜ ଇଣ୍ଡିଆ ଏବଂ ଇନୋଭେସନ୍ ଏକ୍ସଚେଞ୍ଜ ଭଳି କାର୍ଯ୍ୟକ୍ରମରେ ଯୁବ ଓ ଉଦ୍ୟୋଗୀମାନେ ଅଂଶଗ୍ରହଣ କରିଥିଲେ । ଏହି ଚ୍ୟାଲେଞ୍ଜରେ ୧୧ଟି ରାଜ୍ୟର ଛାତ୍ରଛାତ୍ରୀ ଅଂଶଗ୍ରହଣ କରିଥିଲେ । ବିପର୍ଯ୍ୟୟ ପରିଚାଳନା ବିଷୟବସ୍ତୁ ଅଧୀନରେ ରୋବୋଟିକ୍ସ ସମାଧାନ ଉପସ୍ଥାପନ କରିବା ପାଇଁ ୧୨୦ଟି ଦଳ ମଧ୍ୟରୁ ୫୧ଟି ଦଳକୁ ଚୟନ କରାଯାଇଥିଲା । ଏଆଇ ଫର ଗୁଡ୍ ଇମ୍ପାକ୍ଟ ଇଣ୍ଡିଆର ଏକ ଅଂଶ ଭାବରେ କନିଷ୍ଠ ଏବଂ ବରିଷ୍ଠ ବର୍ଗର ବିଜେତାମାନେ ଜୁଲାଇ ୨୦୨୫ରେ ଜେନେଭା ଯାଇ ଆନ୍ତର୍ଜାତୀୟ ସ୍ତରରେ ପ୍ରତିଦ୍ୱନ୍ଦ୍ୱିତା କରିବେ । ଇନୋଭେସନାଲ ଏକ୍ସଚେଞ୍ଜରେ ନେକ୍ସଟଜେନ୍ ନେଟୱାର୍କ (୫ଜି/୬ଜି), ଏଆଇ ଓ ରୋବୋଟିକ୍ସ, ସୁରକ୍ଷିତ ଯୋଗାଯୋଗ ନେଟୱାର୍କ ଏବଂ କ୍ୱାଣ୍ଟମ କମ୍ୟୁନିକେସନ ଉପରେ ଯୁବ ଓ ଷ୍ଟାର୍ଟଅପ୍ ମାନଙ୍କ ଦ୍ୱାରା ବିଷୟଗତ ଆଲୋଚନା ଦେଖିବାକୁ ମିଳିଥିଲା ।
୮. ଭାରତ ସିକ୍ସ-ଜି ଆଲାଏନ୍ସ : ଆନ୍ତର୍ଜାତୀୟ ଅଂଶୀଦାରମାନଙ୍କ ସହ ଗୁରୁତ୍ୱପୂର୍ଣ୍ଣ ବୁଝାମଣାପତ୍ର ସ୍ୱାକ୍ଷରିତ ହୋଇଥିଲା, ଯାହାକି ବିଶ୍ୱର ସିକ୍ସ-ଜି ପେଟେଣ୍ଟରେ ଭାରତର ୧୦% ଅବଦାନ ପ୍ରତିଶ୍ରୁତି ଦିଗରେ ଏକ ପଦକ୍ଷେପ ।
ଆଇଟିୟୁ-ଡବ୍ଲୁଟିଏସ୍ଏ ୨୦୨୪ର ସଫଳ ସମାପନ ଭାରତର ଟେଲିଯୋଗାଯୋଗ ଯାତ୍ରାର ଏକ ଐତିହାସିକ ଅଧ୍ୟାୟ । ଭବିଷ୍ୟତ ପାଇଁ ପ୍ରଗତିଶୀଳ ପ୍ରସ୍ତାବ ଦେବା ଏବଂ ବିଶ୍ୱସ୍ତରୀୟ ସହମତିକୁ ପ୍ରୋତ୍ସାହିତ କରିବାରେ ଭାରତର ନେତୃତ୍ୱ ଡିଜିଟାଲ ଭିତ୍ତିଭୂମିର ଭବିଷ୍ୟତ ଗଠନରେ ଏକ ପ୍ରମୁଖ ରାଷ୍ଟ୍ର ଭାବରେ ଦେଶର ସ୍ଥିତିକୁ ସୁଦୃଢ଼ କରିଛି । ଆଇଟିୟୁ-ଟି ଅଧ୍ୟୟନ ଦଳରେ ରେକର୍ଡ ସଂଖ୍ୟକ ଅଂଶଗ୍ରହଣ, ରଣନୀତିକ ବୁଝାମଣାପତ୍ର ଏବଂ ନେତୃତ୍ବ ବୃଦ୍ଧି ସହିତ ଟେଲିଯୋଗାଯୋଗରେ ନବୋନ୍ମେଷ ଏବଂ ଅନ୍ତର୍ଭୁକ୍ତୀକରଣକୁ ପ୍ରୋତ୍ସାହିତ କରିବା ପାଇଁ ଭାରତ ନିଜର ପ୍ରତିବଦ୍ଧତା ପ୍ରଦର୍ଶନ କରିଛି । ଦୂରସଞ୍ଚାର କ୍ଷେତ୍ର ଆଗକୁ ବଢ଼ୁଥିବା ବେଳେ ମାନକୀକରଣ ପ୍ରୟାସରେ ଭାରତର ସକ୍ରିୟ ଯୋଗଦାନ ବିଶ୍ୱ ଡିଜିଟାଲ ପରିଦୃଶ୍ୟକୁ ପ୍ରଭାବିତ କରିବା ଜାରି ରଖିବ, ସମସ୍ତଙ୍କ ପାଇଁ ଏକ ସ୍ଥାୟୀ ଏବଂ ଡିଜିଟାଲ ସଶକ୍ତ ଭବିଷ୍ୟତ ସୁନିଶ୍ଚିତ କରିବ ।