ରାୟଗଡ଼ା, (ଅକ୍ଷୟ କୁମାର ପିଡ଼ିସିକା) : ରାୟଗଡା ଜିଲ୍ଲା ସୀମା କଳାହାଣ୍ଡି ଜିଲ୍ଲା ଅନ୍ତର୍ଗତ ଲାଞ୍ଜିଗଡ ଠାରେ ଥିବା ବେଦାନ୍ତ ଆଲୁମିନା କମ୍ପାନୀର ନାଲି କାଦୁଅ ପାଣିର ବିଷାକ୍ତ ଲାଲ୍ ଆତଙ୍କ ଘଟଣା ଓଡିଶାରେ ହଇଚଇ ସୃଷ୍ଟି କରିଦେଇଥିଲା । ସୂଚନା ଅନୁସାରେ କମ୍ପାନୀର ଲାଲ୍ କାଦୁଅ ପୋଖରୀ, ୩୨୭.୬୨ ଏକର ସହିତ ପୋଖରୀ ବନ୍ଧ, ଫିଲ୍ମରେସନ୍ ୟୁନିଟ୍, ଡ୍ରେନ୍, କ୍ୟାଚମେଣ୍ଟ ପୋଖରୀ, ଡାଇଭର୍ସନ କେନାଲ ଇତ୍ୟାଦିର ଜଳ ପ୍ରକ୍ରିୟାକରଣ ହ୍ରଦ ଗତ ୨୦୨୪ ମସିହା ସେପ୍ଟେମ୍ବର ୧୫ ମଧ୍ୟରାତ୍ରିରେ ଭୁଷୁଡି ପଡିଥିଲା । ଶହ ଶହ ଏକର କୃଷି ଜମି ସହ ବଂଶଧାରା ନଦୀରେ ଏହି ବିଷାକ୍ତ ବନ୍ୟାଜଳ ପ୍ରବାହିତ ହୋଇ ଉଦ୍ଭିଦ ଏବଂ ଜୀବଜନ୍ତୁଙ୍କ ପାଇଁ ବ୍ୟାପକ କ୍ଷତି ଘଟାଇଥିଲା । ସ୍ଥାନୀୟ ସମ୍ପ୍ରଦାୟ ମଧ୍ୟରେ ଉତ୍ତେଜନା ସୃଷ୍ଟି ହେବା ମଧ୍ୟ ଦେଖିବାକୁ ମିଳିଥିଲା । ମୁଖ୍ୟତଃ ଆଦିବାସୀ, ଦଳିତ ଏବଂ ଗରିବ କୃଷକମାନେ ଏଥିରେ ଅଧିକ ପ୍ରଭାବିତ ହେଇଥିଲେ । ଏହି ନାଲି କାଦୁଅର ପ୍ରଭାବ କଳାହାଣ୍ଡି ଜିଲ୍ଲାର ବନ୍ଧଗଡ, ବୁନ୍ଦେଲ, ଛତ୍ରପୁର, ତୁରିଗୁଡା, ବାଥେଲିମା ଏବଂ ବସନୁପଡା ଅଞ୍ଚଳରେ ତା ସହିତ ରାୟଗଡା ଜିଲ୍ଲାର ପେଡିପଦର, ଗୌଡ ଚନ୍ଦନଖୁଣ୍ଟି ପ୍ରମୁଖ ଗାଁ ମାନଙ୍କରେ ହେକ୍ଟର ହେକ୍ଟର ଜମିରେ ବନ୍ୟା ପରିସ୍ଥିତି ସୃଷ୍ଟି ହେବା ଦେଖିବାକୁ ମିଳିଥିଲା । ପ୍ରଭାବିତ ଅଞ୍ଚଳଗୁଡିକରେ ବନ୍ୟା ପରି ପରିସ୍ଥିତି ଉପୁଜିଥିଲା, ଚାଷ ଜମିଗୁଡିକ ନାଲି କାଦୁଅରେ ବୁଡ଼ି ଯାଇଥିଲା । ପ୍ରଚୁର ବିଷାକ୍ତ ପଦାର୍ଥ ସହ ଜଳର ପରିମାଣ ୩ ଲକ୍ଷ ଘନ ମିଟର, ଅର୍ଥାତ୍ ୩୦ କୋଟି ଲିଟର ବୋଲି ଆକଳନ କରାଯାଇଛି । ଅନୁପଯୁକ୍ତ ନିର୍ମାଣ ଏବଂ ଭିତ୍ତଭୂମିର ପର୍ଯ୍ୟାପ୍ତ ରକ୍ଷଣାବେକ୍ଷଣ ଅଭାବ ଏହି ଦୁର୍ଘଟଣାର ମୁଖ୍ୟ କାରଣ ଯାହା ସ୍ଥାନୀୟ ବାସିନ୍ଦା ଅଭିଯୋଗ କରିଛନ୍ତି । ବିଶେଷ କରି ମାନବ ବସତି ପାଇଁ ଏହାର ନିକଟତରତାକୁ ଦୃଷ୍ଟିରେ ରଖି ଅସୁରକ୍ଷିତ ଢଙ୍ଗରେ କାହିଁକି ଏହା ନିର୍ମାଣ କରାଯାଇଥିଲା ବୋଲି ସ୍ଥାନୀୟ ଲୋକ ପ୍ରଶ୍ନ କରୁଛନ୍ତି । ପରିସ୍ଥିତିର ଗମ୍ଭୀରତା ହେତୁ କିଛି ପ୍ରଭାବିତ ସ୍ଥାନୀୟ ଲୋକ ଆଲୁମିନା ରିଫାଇନାରୀରେ ଏକତ୍ରିତ ହୋଇ ତାଙ୍କର କ୍ଷୟକ୍ଷତି ପାଇଁ କ୍ଷତିପୂରଣ ଦାବି କରିଥିଲେ । ଏହାକୁ ଦୃଷ୍ଟିରେ ରଖି ସେବା ଭାରତୀ ପକ୍ଷରୁ ଏକ ଫ୍ୟାକ୍ଟ ଫାଇଣ୍ଡିଙ୍ଗ ଟିମ୍ ସେପେ୍ପ୍ଟମ୍ମ୍ବର ୨୦ ତାରିଖରେ ଲାଞ୍ଜିଗଡ ଯାଇ ସେଠାକାର ସ୍ଥାନୀୟ ବାସିନ୍ଦାମାନଙ୍କ ସହ ଯୋଗାଯୋଗ କରି କ୍ଷୟକ୍ଷତି ବିଷୟରେ ଆଲୋଚନା କରିବା ସହ ପ୍ରତ୍ୟକ୍ଷଦର୍ଶୀ ମାନଙ୍କ ସହ ସେଇ ଭୟାବହ ରାତିର ଘଟଣା ବିଷୟରେ ଜାଣିବାକୁ ପ୍ରୟାସ କରିଥିଲେ । ସେହିପରି କମ୍ପାନୀ କର୍ତ୍ତୃପକ୍ଷଙ୍କ ସହ ମଧ୍ୟ ଆଲୋଚନା କରି ଫେରି ଆସିଥିଲେ । ଏହି ଫ୍ୟାକ୍ଟ ଫାଇଣ୍ଡିଙ୍ଗ ଟିମ୍ରେ ଓକିଲ, ସମାଜସେବୀ, ବରିଷ୍ଠ ସାମ୍ବାଦିକ ଡକ୍ଟର ବାଦଲ କୁମାର, ଜଣେ ସଫଳ ଚାଷୀ ରୂପେ ରାୟଗଡା ଜିଲ୍ଲାରେ ପରିଚିତ ବିଜୟ କୁମାର ମିଶ୍ର, ସକ୍ଷମର ରାଜ୍ୟ ସଚିବ ଶ୍ୟାମ କୁମାର ଦାଶ ଓ ରାଷ୍ଟ୍ରୀୟ ସ୍ୱୟଂସେବକ ସଂଘର ବରିଷ୍ଠ ପ୍ରଚାରକ ତଥା ପ୍ରାନ୍ତ ସେବା ପ୍ରମୁଖ ଦୀପକ କୁମାର ରାଉତ ପ୍ରମୁଖ ଯୋଗ ଦେଇଥିଲେ । ରାଷ୍ଟ୍ରୀୟ ସ୍ୱୟଂସେବକ ସଂଘର ପୂର୍ବ କ୍ଷେତ୍ର ସହ ପ୍ରଚାରକ ଜଗଦୀଶ ଖାଡେଙ୍ଗା ଓ ଓଡିଶା ପଶ୍ଚିମ ପ୍ରାନ୍ତର ପ୍ରାନ୍ତ ପ୍ରଚାରକ ଶଙ୍କର ପଣ୍ଡାଙ୍କ ମାର୍ଗଦର୍ଶନରେ ଘଟଣାର ତଦନ୍ତ କରାଯାଇଥିଲା । ସେବା ଭାରତୀ ସମ୍ପୂର୍ଣ୍ଣ ଘଟଣାର ତଦନ୍ତ କରିସାରିଲା ପରେ ଏକ ରିପୋର୍ଟ ତିଆରି କରି କେନ୍ଦ୍ର ଓ ରାଜ୍ୟ ସରକାରର ସଂଶ୍ଳିଷ୍ଟ ଥିବା ପ୍ରତ୍ୟେକ ବିଭାଗକୁ ପଠାଇଛି । ଆଗକୁ ସେବା ଭାରତୀ ତରଫରୁ ଏହି ବିଷୟ ବସ୍ତୁକୁ ନେଇ ଉଭୟ ରାୟଗଡା ଓ କଳାହାଣ୍ଡି ଜିଲ୍ଲାରେ ଗୋଟିଏ ଲେଖାଏଁ ସେମିନାର ମଧ୍ୟ କରିବାକୁ ଯାଉଛି ଯାହା ସାମ୍ବାଦିକ ସମ୍ମିଳନୀରେ ସୂଚନା ଦିଆଯାଇଛି । ଆଜିର ଏହି ସାମ୍ବାଦିକ ସମ୍ମିଳନୀରେ ଡକ୍ଟର ବାଦଲ କୁମାର ତା, ବିଜୟ ମିଶ୍ର ଓ ଶ୍ୟାମ କୁମାର ଦାଶ ପ୍ରମୁଖ ଉପସ୍ଥିତ ଥିଲେ । ସାମ୍ବାଦିକ ସମ୍ମିଳନୀର ପରିଚାଳନା ସେବା ଭାରତୀର ଜିଲ୍ଲା ସମ୍ପାଦକ ବିଦ୍ୟା ଭୂଷଣ ପଣ୍ଡା କରିଥିଲେ ।