ଲୋଇସିଂହା, (ବିମଳେନ୍ଦୁ ସାହୁ) : ଲୋଇସିଂହା ବ୍ଲକ ରୁଗୁଡିଖାଲ ମାନସ ବିହାର ସ୍ଥିତ ରାମ ମନ୍ଦିରଠାରେ ପବିତ୍ର ଅଅଁଳା ନବମୀ ଅବସରରେ ଛପନ ଭୋଗ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି । ଏହି ଅବସରରେ ତୁଳସୀ ରାମାୟଣର ସୁନ୍ଦରାକାଣ୍ଡ ପଠନ କରାଯାଇଥିଲା । ଏଥିରେ ବ୍ୟାସ ଭାବେ ମଧୁସ୍ମିତା ମହାପାତ୍ର ଯୋଗଦେଇ ପାରାୟଣ କରିଥିଲେ । ଏଥିସହିତ ଶ୍ରୀ ରଘୁନାଥଙ୍କ ନିକଟରେ ଛପନ ଭୋଗ ଅର୍ପଣ କରାଯାଇଥିଲା । ମାନସ ଯଜ୍ଞ କମିଟି ସଭାପତି ଯୁଧିଷ୍ଠିର ପଧାନ, ସମ୍ପାଦକ ବେଦପତି ପଧାନ ଓ ମଧୁସୂଦନ ପଧାନଙ୍କ ନେତୃତ୍ବରେ ଆୟୋଜିତ ଏହି କାର୍ଯ୍ୟକ୍ରମରେ ସମସ୍ତ କର୍ମକର୍ତ୍ତା ସକ୍ରିୟ ସହଯୋଗ କରିଥିଲେ । ସୂଚନାଯୋଗ୍ୟ ଯେ, ମାନସ ଯଜ୍ଞ କମିଟି ତଥା ଆଖପାଖ ଗ୍ରାମବାସୀଙ୍କ ମିଳିତ ଉଦ୍ୟମ କ୍ରମେ ଗତ ଆଠ ବର୍ଷ ହେଲା ଏହି ଛପନ ଭୋଗ ଅର୍ପଣ ହୋଇ ଆସୁଛି ।
