ପଦ୍ମପୁର, (ନିରୋଜ କୁମାର ପାଣୀ) : ଗତ କିଛିଦିନ ହେବ କଥିତ ଭାବେ ଦୈବୀଶକ୍ତିର ଆବିର୍ଭାବକୁ ନେଇ ଚର୍ଚ୍ଚାରେ ଥିବା ପଦ୍ମପୁର ଉପଖଣ୍ଡ ବାନ୍ଦୁପାଲି ଗାଁକୁ ଆଜି ଉପ-ଜିଲ୍ଲାପାଳ ସଦାକର କୁମ୍ଭାର ଗସ୍ତ କରି ସ୍ଥିତି ପରଖିଛନ୍ତି । ଗତ କିଛି ଦିନ ହେବ ବାନ୍ଦୁପାଲି ଗାଁରେ ଜଣେ ମହିଳାଙ୍କ ଶରୀରରେ ଦୈବୀଶକ୍ତି ଆବିର୍ଭାବ ହେବାର ଖବର ପ୍ରଚାର ହୋଇଥିଲା । ଉକ୍ତ ମହିଳା ଜଣକ ଦୈବୀଶକ୍ତିର ଅଧିକାରୀ ହୋଇ ଅସାଧ୍ୟ ରୋଗ ଓ ଅସୁବିଧା ସବୁ ଦୂର କରି ଦେଉଥିବାର ପ୍ରଚାର ହୋଇଥିଲା । ଫଳରେ ଏହି ଗ୍ରାମରେ ବିଭିନ୍ନ ଅଂଚଳର ଲୋକଙ୍କ ଅସମ୍ଭାଳ ଭିଡ ହେଉଥିଲା । ତେଣୁ ଗ୍ରାମବାସୀ ସ୍ବାଭାବିକ ଭାବେ ଜୀବନ ବଂଚିବାରେ ନାହିଁ ନଥିବା ଅସୁବିଧା ଭୋଗୁଥିବାର ଅଭିଯୋଗ ଆସିଥିଲା । ଏଣୁ ଉପ-ଜିଲ୍ଲାପାଳ ସଦାକର କୁମ୍ଭାର, ତହସିଲଦାର ତାପସ ବିଶି ବାନ୍ଦୁପାଲି ଗ୍ରାମକୁ ଗସ୍ତକରି ସ୍ଥିତି ସମୀକ୍ଷା କରିଛନ୍ତି । ଶ୍ରୀ କୁମ୍ଭାର ସେଠାକୁ ଆସିଥିବା ଲୋକଙ୍କ ପ୍ରବଳ ଭିଡ ମଧ୍ୟରୁ ଅନେକଙ୍କ ସହ ଆଲୋଚନା କରିଛନ୍ତି । ସମସ୍ତଙ୍କ ଧାର୍ମୀୟ ଭାବନା ପ୍ରତି ସମ୍ମାନ ରହିଛି କିନ୍ତୁ ବିଭିନ୍ନ ରୋଗରୁ ମୁକ୍ତି ପାଇଁ କୌଣସି ଭୁଲ ବିଶ୍ୱାସର ବଶବର୍ତ୍ତୀ ନହୋଇ ବିଜ୍ଞାନ ସମ୍ମତ ଚିକିତ୍ସା ପ୍ରଣାଳୀର ସହାୟତା ନେବା ପାଇଁ ଶ୍ରୀ କୁମ୍ଭାର ଲୋକଙ୍କୁ ଉତ୍ସାହିତ କରିଛନ୍ତି । ଏହା ପରେ ଉପଜିଲ୍ଲାପାଳ ଉକ୍ତ ମହିଳାଙ୍କ ସ୍ୱାମୀଙ୍କ ସହ ଆଲୋଚନା କରି ଗ୍ରାମବାସୀ କେଉଁ ଭଳି ଭାବେ ହଇରାଣ ହେଉଛନ୍ତି ତାହା ଦର୍ଶାଇ ସେ ସବୁ ବନ୍ଦ କରିବାକୁ ତାଗିଦ୍ କରିଛନ୍ତି । ଗ୍ରାମକମିଟିର ସଦସ୍ୟମାନଙ୍କ ସହ ଆଲୋଚନା କରି ଉପଜିଲ୍ଲାପାଳ କୌଣସି ମଧ୍ୟ ଅପ୍ରୀତିକର ପରିସ୍ଥିତିରେ ଶାନ୍ତିଶୃଙ୍ଖଳା ରକ୍ଷା କରିବାକୁ ଅପିଲ୍ କରିଛନ୍ତି ଓ ଗାଁର ସ୍ବାଭାବିକ ପରିସ୍ଥିତି ଫେରାଇ ଆଣିବା ପାଇଁ ସମସ୍ତ ପ୍ରଶାସନିକ ବ୍ୟବସ୍ଥା ଯୋଗାଇ ଦିଆଯିବ ବୋଲି କହିଛନ୍ତି ।