ବଣାଇ, (ହବିବ ମହମ୍ମଦ) : ବଣାଇଗଡ଼ ବ୍ଲକର ସମସ୍ତ ୧୩ ଗୋଟି ପଂଚାୟତର ଚାଷୀକୁଳ ହତାଶ ହୋଇପଡିଛନ୍ତି । ବର୍ଷାର ଲୁଚକାଳି ଏ ବର୍ଷ ବଣାଇ ଅଂଚଳର ଚାଷୀଙ୍କ ସ୍ୱପ୍ନକୁ ଚୁରମାର କରିଦେଇଛି । ଘରେ ଥିବା ସଂଚିତ ବିହନ ଧାର କରଜ କରି ସାର ହଳ ମଜୁରିଆଙ୍କୁ ମଜୁରୀ ଦେବା ପରେ ସର୍ବହରା ଚାଷୀକୁଳ । ଆସନ୍ନ ମରୁଡିର ଧ୍ୱନି ଶୁଭିଲାଣି । ଅଭାବୀ ବର୍ଷା ଜନିତ ସମସ୍ୟା ଚାରିଆଡେ । କାଁ ଭାଁ କେଉଁଠି କେମିତି ପାଣିର ସୁବିଧା ଥିବା ଜମିରେ ଚାଷ ଚାଲିଛି ଅନ୍ୟଥା ଚାରିଆଡେ ଦେଖାଯାଉଛି ଘାସ । ଘାସରେ ଭରା ହଜାର ହଜାର ହେକ୍ଟର ଜମି ଚାଷର ଭ୍ରମ ସୃଷ୍ଟି କରୁଛି । କୃଷି ବିଭାଗର କର୍ମଚାରୀ ଚାଷୀଙ୍କୁ ଭେଟି ସମସ୍ୟା ବୁଝି ବିକଳ୍ପ ରାସ୍ତା ଦେଖାଇବାକୁ ବି ଭରସା କରି ନ ପାରିବା ଏ ଅଂଚଳର ଚାଷୀକୁଳଙ୍କୁ ଆହୁରି ହତାଶ କରୁଛି । କୃଷି ବୀମା ବିଗତ ବର୍ଷରେ ଫଳପ୍ରଦ ହୋଇ ନଥିଲା ବେଳେ ଏ ବର୍ଷ ମଧ୍ୟ ବୀମା ପାଇଁ କୌଣସି ତତ୍ପରତା ନଥିବା ପରିଲକ୍ଷିତ ହେଲାଣି ।