- ଓଡ଼ିଶାର ମହାମହିମ ରାଜ୍ୟପାଳ ତଥା ବିଶ୍ଵବିଦ୍ୟାଳୟର କୁଳାଧିପତି ପ୍ରଫେସର ଗଣେଶୀ ଲାଲଙ୍କ ଯୋଗଦାନ
ବ୍ରହ୍ମପୁର, (କେ.ସତ୍ୟନାରାୟଣ ରେଡ୍ଡୀ) : ଭଞ୍ଜବିହାର ସ୍ଥିତ ବ୍ରହ୍ମପୁର ବିଶ୍ୱବିଦ୍ୟାଳୟର ୨୪ତମ ସମାବର୍ତ୍ତନ ଉତ୍ସବ ପାଳିତ ହୋଇଯାଇଛି । ଓଡ଼ିଶାର ମହାମହିମ ରାଜ୍ୟପାଳ ତଥା ବିଶ୍ଵବିଦ୍ୟାଳୟର କୁଳାଧିପତି ପ୍ରଫେସର ଗଣେଶୀ ଲାଲ ଏହି ଉତ୍ସବରେ ଯୋଗ ଦେଇଥିଲେ । ବ୍ରହ୍ମପୁର ବିଶ୍ୱବିଦ୍ୟାଳୟର ବିଜୁ ପଟ୍ଟନାୟକ ଅଡିଟୋରିୟମରେ ଆୟୋଜିତ ଏହି ଉତ୍ସବରେ ସମ୍ମାନିତ ମୁଖ୍ୟ ଅତିଥି ଭାବେ ମାନ୍ୟବର ଜଷ୍ଟିସ ଶତ୍ରୁଘ୍ନ ପୂଜାହରୀ, ଅଧ୍ୟକ୍ଷ, ଓଡିଶା ମାନବାଧିକାର ଆୟୋଗ, ସମ୍ମାନିତ ଅତିଥି ଭାବେ ବିଷ୍ଣୁପଦ ସେଠୀ, ମୁଖ୍ୟ ଶାସନ ସଚିବ ରାଜ୍ୟ ଉଚ୍ଚଶିକ୍ଷା ବିଭାଗ, ମଧ୍ୟ ଏହି ଅବସରରେ ଯୋଗ ଦେଇଥିଲେ ।
ଏହି ଅବସରରେ ବ୍ରହ୍ମପୁର ବିଶ୍ୱବିଦ୍ୟାଳୟର କୁଳପତି ପ୍ରଫେସର ଗୀତାଞ୍ଜଳି ଦାଶ ସ୍ୱାଗତ ଭାଷଣ ଦେଇଥିଲେ ।
ଏହି ସମାବେଶକୁ ସମ୍ବୋଧିତ କରି କୁଳପତି କହିଛନ୍ତି ଯେ, ୫୭ ବର୍ଷ ମଧ୍ୟରେ ଏହି ଅନୁଷ୍ଠାନ ମହାନ ଆଲୁମିନି ଉତ୍ପାଦନ କରିଛି, ଯେଉଁମାନେ ବିଶ୍ୱବ୍ୟାପି ସଫଳତା ହାସଲ କରିଛନ୍ତି । ଆମେ ‘ବସୁଧୈବ କୁଟୁମ୍ବକମ୍’ ଉପରେ ଭରସା ରଖୁ ଏବଂ ଏକ ‘ବୈଶ୍ଵିକ ନାଗରିକ ଆଚରଣ’ (ଜିସିବି)କୁ ପ୍ରୋତ୍ସାହିତ କରିବା ଏବଂ ଆମର ଛାତ୍ରମାନଙ୍କ ମଧ୍ୟରେ ବିଭିନ୍ନ ସାଂସ୍କୃତିକ ମୂଲ୍ୟବୋଧକୁ ପ୍ରୋତ୍ସାହିତ କରିବା, ଯାହା ସେମାନଙ୍କୁ ବହୁମୂଖୀ କର୍ପୋରେଟ୍ ଆଥଲେଟ୍ ହେବାକୁ ସକ୍ଷମ କରାଇବ । ସୂଚନା ସଶକ୍ତିକରଣ ଯୁଗରେ, ଆମେ ସହନଶୀଳତା ଏବଂ ପ୍ରତିଦ୍ୱନ୍ଦ୍ୱିତା ପ୍ରଦର୍ଶନ କରିବାପାଇଁ ଯୁବ ମାନସିକତା ପ୍ରତିପୋଷଣ କରିବାର ଆପ୍ରାଣ ଉଦ୍ୟମ ଜାରି ରଖିଛୁ ।
ସମାବେଶକୁ ସମ୍ବୋଧିତ କରି ମାନ୍ୟବର ରାଜ୍ୟପାଳ ପ୍ରକାଶ କରିଛନ୍ତି ଯେ ୨୦୨୪-୨୫ ସୁଦ୍ଧା ଭାରତ ପାଞ୍ଚ ଟ୍ରିଲିୟନ ଡଲାର ଅର୍ଥନୀତି ହେବାକୁ ଚେଷ୍ଟା କରୁଛି ଏବଂ କାର୍ଯ୍ୟ କରୁଛି । ଏହି ଲକ୍ଷ୍ୟର ବାସ୍ତବତା ଏହାର ଶିକ୍ଷା ଏବଂ ତାଲିମ ପ୍ରତିଷ୍ଠାନଗୁଡ଼ିକର ସାମର୍ଥ୍ୟ ଉପରେ ନିର୍ଭର କରେ ଯାହା ଆମର ଯୁବକ ଏବଂ ଯୁବତୀଙ୍କୁ ଏକ ବିକାଶଶୀଳ ଚାକିରି ବଜାର ସହିତ ଜଡିତ ଜ୍ଞାନ ଏବଂ କୌଶଳ ସହିତ ଗଢିତୋଳିବା ପାଇଁ ଦାୟୀ । ଏହା ଗୁଣବତ୍ତା, ଉତ୍କର୍ଷ, ନବସୃଜନ ଏବଂ କ୍ରମାଗତ ଉନ୍ନୟନ ଆବଶ୍ୟକ କରେ । ସେ ଆହୁରି ମଧ୍ୟ କହିଛନ୍ତି ଯେ NEP-୨୦୨୦ର ସବୁଠାରୁ ଗୁରୁତ୍ୱପୂର୍ଣ୍ଣ ବିଷୟ ହେଉଛି ଏହା ଉଭୟ ସମବେଶିତା ଏବଂ ଉତ୍କର୍ଷତାକୁ ପ୍ରୋତ୍ସାହିତ କରିବା । ଏକ ମହାନ ଦର୍ଶନ ସହିତ ଏହି ନୀତି ପ୍ରସ୍ତୁତ କରାଯାଇଛି । ଏହା ଆମର ଶିକ୍ଷା ବ୍ୟବସ୍ଥାରେ ସମୁଦାୟ ପରିବର୍ତ୍ତନ ଆଣିବାକୁ ଲକ୍ଷ୍ୟ ରଖିଛି । ଅନ୍ତର୍ନିବେଶ, ଭାଗିଦାରୀ, ଗୁଣବତ୍ତା, ସୁଲଭତା ଏବଂ ଉତ୍ତରଦାୟିତ୍ୱର ମୂଳ ସ୍ତମ୍ଭ ଉପରେ ଏହି ନୀତି ନିର୍ମିତ । ଏହି ନୀତି ମାଧ୍ୟମରେ ଏହା ଆଶା କରାଯାଏ ଏହା ଆମର ଐତିହ୍ୟ ଏବଂ ମୂଲ୍ୟବୋଧରେ ଅଭିମନ୍ତ୍ରିତ ଛାତ୍ରମାନଙ୍କୁ ବିଶ୍ୱ ନାଗରିକ ଭାବରେ ନୂତନ ଆକୃତି ପ୍ରଦାନ କରିବ । ଏହି ନୀତି ଏକ ନୂତନ ବ୍ୟବସ୍ଥା ସୃଷ୍ଟି କରିବାକୁ ଲକ୍ଷ୍ୟ ରଖିଛି ଯାହା ଏକବିଂଶ ଶତାବ୍ଦୀର ଶିକ୍ଷାର ବିଶ୍ଵସ୍ତରୀୟ ଆକାଂକ୍ଷା ଲକ୍ଷ୍ୟ ସହିତ ସମାନ, ଯାହାକି କି ଭାରତର ପରମ୍ପରା ଏବଂ ମୂଲ୍ୟବୋଧ ପ୍ରଣାଳୀ ସହିତ ସମାନ ଅଟେ ।
ଏହି ଅବସରରେ ୨୦୨୨ ବର୍ଷ ପାଇଁ ରେକର୍ଡ ଅଫ ଡିଗ୍ରୀରେ ଦସ୍ତଖତ ପାଇଁ ବ୍ରହ୍ମପୁର ବିଶ୍ଵବଦ୍ୟାଳୟର କୁଳସଚିବ ସଚ୍ଚିଦାନନ୍ଦ ନାୟକ ରାଜ୍ୟପାଳଙ୍କ ସମ୍ମୁଖରେ ସ୍ଥାନିତ କରିଥିଲେ । ଏହି ଅବସରରେ ୮ ଡିଲିଟ୍, ୨ଟି ଡିଏସସି ଏବଂ ୭୦ ପିଏଚଡି ଉପାଧି ସହ, ୪୫ଟି ସ୍ୱର୍ଣ୍ଣ ପଦକ ବିଭିନ୍ନ ବିଷୟର ଛାତ୍ରଛାତ୍ରୀମାନଙ୍କୁ ପ୍ରଦାନ କରାଯାଇଛି । ଏହି ସମାରୋହ ଅବସରରେ ରାଜ୍ୟପାଳ ନୂତନ ଭାବେ ନିର୍ମିତ ମହିଳା ଛାତ୍ରାବାସ, ସାମ୍ବାଦିକତା ଏବଂ ଗଣ ଯୋଗାଯୋଗର ପି.ଜି ବିଭାଗକୁ ପ୍ରଦାନ କରାଯାଇଥିବା ନୂତନ କୋଠା ଏବଂ ବିଭିନ୍ନ ନୂତନ ଭାବେ ସମ୍ପ୍ରସାରିତ ପ୍ରଶାସନିକ ଅଟ୍ଟାଳିକାର ଉଦ୍ଘାଟନ କରିଛନ୍ତି ।
ଏହି ସମ୍ମିଳନୀରେ ସିଣ୍ଡିକେଟ୍ର ସଦସ୍ୟ, ଏକାଡେମିକ୍ କାଉନସିଲର ସଦସ୍ୟ, ଡିନ୍ ଅଫ୍ ଫ୍ୟାକଲଟି, ପ୍ରଫେସର, ବିଭିନ୍ନ ବିଭାଗର ଅଧ୍ୟାପକ ଅଧ୍ୟାପିକା, ବିଶ୍ୱବିଦ୍ୟାଳୟର ଅଧିକାରୀ, ଜିଲ୍ଲା ପ୍ରଶାସନର ଅଧିକାରୀ ଏବଂ ବିଭିନ୍ନ ବିଭାଗର ଛାତ୍ରଛାତ୍ରୀ ଉପସ୍ଥିତ ଥିଲେ ।