- ବଲାଙ୍ଗିର ଓ ବରଗଡ ଜିଲ୍ଲାର ୧୦୦ଜଣ ସଦସ୍ୟଙ୍କ ଯୋଗଦାନ
ବଲାଙ୍ଗିର, (କେପିଏନ୍ଏସ୍) : ଓଡିଶା ଜୈବ ବିବିଧତା ବୋର୍ଡ, ରାଜ୍ୟ ଜଙ୍ଗଲ, ପରିବେଶ ଓ ଜଳବାୟୁ ପରିବର୍ତ୍ତନ ଓ ବଲାଙ୍ଗିର ଜିଲ୍ଲା ପ୍ରଶାସନର ମିଳିତ ଆନୁକୂଲ୍ୟରେ ଜୈବ ବିବିଧତା କମିଟି ସଦସ୍ୟଙ୍କ ଦକ୍ଷତା ବିକାଶ କର୍ମଶାଳା ଅନୁଷ୍ଠିତ ହୋଇଯାଇଛି । ବଲାଙ୍ଗିର ଜିଲ୍ଲା ଜଙ୍ଗଲ ସୁରକ୍ଷା ଫୋରମ୍ର ସଭାପତି କୁଳମଣୀ ସାହୁଙ୍କ ସଂଯୋଜନାରେ ଅନୁଷ୍ଠିତ ଏହି କାର୍ଯ୍ୟକ୍ରମରେ ମୁଖ୍ୟଅତିଥି ଭାବରେ ବଲାଙ୍ଗିର ଜିଲ୍ଲାପାଳ ଚଞ୍ଚଳ ରାଣା, ସମ୍ମାନୀତ ଅତିଥି ଭାବରେ ଡିଏଫ୍ଓ ନୀତିଶ କୁମାର, ଜିଲ୍ଲା କୃଷି ଅଧିକାରୀ, ଜିଲ୍ଲା ପ୍ରାଣୀ ସଂମ୍ପଦ ଅଧିକାରୀ ଓ ଜିଲ୍ଲା ପଞ୍ଚାୟତ ଅଧିକାରୀ ଯୋଗଦେଇଥିଲେ । ଗନ୍ଧମାର୍ଦ୍ଦନ ପର୍ବତକୁ ଜୈବ ବିବିଧତା ଘୋଷଣା କରାଇବାରେ ରାଜ୍ୟ ଜୈବ ବିବିଧତା ବୋର୍ଡର ପ୍ରଚେଷ୍ଟାକୁ ଜିଲ୍ଲାପାଳ ପ୍ରଶଂସା କରିଥିଲେ । ସେହିପରି ପରିବେଶ ସୁରକ୍ଷା ଓ ଜଙ୍ଗଲ ସୁରକ୍ଷା ଜରିଆରେ ଜୈବ ବିବିଧତାକୁ ସୁରକ୍ଷିତ କରୁଥିବା କମିଟି ସଦସ୍ୟଙ୍କ ଭୂମିକା ଉପରେ ଡିଏଫ୍ଓ ନୀତିଶ କୁମାର କହିଥିଲେ । ଏହି କାର୍ଯ୍ୟକ୍ରମରେ ଜୈବ ବିବିଧତା ବୋର୍ଡର ଡ.ପ୍ରସାଦ କୁମାର ଦାସ, ଡ.ସତ୍ୟରଂଜନ ବେହେରା ଓ ଡ.ଶୁଭ୍ରାଂଶୁ ନାୟକ ପ୍ରମୁଖ ଯୋଗ ଦେଇଥିଲେ । ସେହିପରି କାର୍ଯ୍ୟକ୍ରମରେ ବଲାଙ୍ଗିର ଓ ବରଗଡ ଜିଲ୍ଲାର ୧୦୦ଜଣ ଜୈବ ବିବିଧତା ପରିଚାଳନା କମିଟି ସଦସ୍ୟ ଭାଗ ନେଇଥଲେ ।
ପ୍ରକାଶ ଯୋଗ୍ୟ ଯେ, ବଲାଙ୍ଗିର ଓ ବରଗଡ ଜିଲ୍ଲାର ପ୍ରାୟ ୨୦ ହଜାର ହେକ୍ଟର ଜୈବ ବିବିଧତା ଭରା ଅଞ୍ଚଳରେ ଥିବା ଐତିହ୍ୟସ୍ଥଳୀ ଗନ୍ଧମାର୍ଦ୍ଧନକୁ ଜାତୀୟ ଐତିହ୍ୟସ୍ଥଳୀ ଭାବରେ ଘୋଷଣା କରିବାକୁ ଦାବୀ ହୋଇଆସୁଥିଲା । ୨୦୦ରୁ ଅଧିକ କିସମର ଔଷଧୀୟ ଗୁଲ୍ମଲତା ଭରି ରହିଥିବା ତଥା ପୁରାଣ ବର୍ଣ୍ଣିତ ବିଶଲ୍ୟକରଣୀ ଭଳି ଅମୂଲ୍ୟ ଔଷଧ ରହିଥିବା ଗନ୍ଧମାର୍ଦ୍ଦନରେ ଜାତୀୟସ୍ତରୀୟ ଆୟୁର୍ବେଦ ଗବେଷଣା ହେବା ପାଇଁ ମଧ୍ୟ ଦାବୀ ହେଉଥିଲା । ଉନ୍ନତଧରଣର ବକ୍ସାଇଟ ଭରି ରହିଥିବା ଏହି ପାହଡାରେ ଖଣି ଖନନ ପାଇଁ ୧୯୮୦ ମସିହାରେ ଲିଜ ହୋଇଥିଲା । କିନ୍ତୁ ଏକ ଐତିହାସିକ ଆନ୍ଦୋଳନ ବଳରେ ଏହି ଅଞ୍ଚଳର ଲୋକେ ଗନ୍ଧମାର୍ଦ୍ଦନକୁ ସୁରକ୍ଷା କରିବାରେ ସଫଳ ହୋଇଥିଲେ । ୨୦ରୁ ଅଧିକ ଛୋଟବଡ ଝରଣା ବହିଥିବା ତଥା ବଲାଙ୍ଗିର ଜିଲ୍ଲା ପଟେ ସୁକତେଲ ନଦୀ ଓ ବରଗଡ ଜିଲ୍ଲା ଅଞ୍ଚଳରେ ଅଙ୍ଗନଦୀ ବାହାରିଥିବା ଏହି ଐତିହ୍ୟଭରା ପାହାଡରେ ହଜାର ହଜାର ସଂଖ୍ୟାରେ ଜୀବଯନ୍ତୁ, ସରୀସୃପ, ପକ୍ଷୀ ବସବାସ କରୁଛନ୍ତି । ବରଗଡ, ବଲାଙ୍ଗିର ଓ ନୂଆପଡା ଜିଲ୍ଲାର ଲକ୍ଷାଧିକ ଲୋକ ଏହା ଉପରେ ଜୀବନ ଜୀବିକା ପାଇଁ ନିର୍ଭରଶୀଳ ରହିଛନ୍ତି । ତେଣୁ ଏହାକୁ ଜୈବ ବିବିଧତା ଘୋଷଣା କରିବା ଯଥାର୍ଥ ପଦକ୍ଷେପ ବୋଲି ମତପ୍ରକାଶ ପାଇଥିଲା ।