ବଲାଙ୍ଗିର, (କେପିଏନ୍ଏସ୍) : ଦୀର୍ଘ ୧୩ ଦିନ ଧରି ଚନ୍ଦନଭାଟିର ସୁକତେଲ ନଦୀକୂଳରେ ଚାଲିଥିବା ୧୦୮ ପ୍ରହର ନାମଯଜ୍ଞ ୮ ତାରିଖ ବୁଧବାର ସକାଳ ୬.୦୦ ଘଣ୍ଟା ସମୟରେ ଉଦ୍ଯାପିତ ହୋଇଯାଇଛି । ଏହି ଧର୍ମ ଯଜ୍ଞରେ ସତ୍ୟ ନାରାୟଣ ମେହେର ସସ୍ତ୍ରୀକ ନିଷ୍ଠାର ସହିତ କର୍ତ୍ତା ଦାୟିତ୍ୱ ନିର୍ବାହ କରିଥିଲେ । ପଶ୍ଚିମ ଓଡିଶାର ବିଭିନ୍ନ ଜିଲ୍ଲାରୁ ପ୍ରାୟତଃ ୮୪ଟି ସଂକୀର୍ତ୍ତନ ଦଳ ଏହି ଆଧ୍ୟାତ୍ମିକ ଯଜ୍ଞରେ ସାମିଲ ହୋଇଥିଲେ । ମୀନାବଜାର ଏବଂ ଓଡିଶାର ବିଭିନ୍ନ କୋଣ ଅନୁକୋଣରୁ ଆସିଥିବା ସାଧୁସନ୍ଥ ତଥା ଶ୍ରଦ୍ଧାଳୁଙ୍କ ଉପସ୍ଥିତି ଅନ୍ୟତମ ଆକର୍ଷଣ ଥିଲା । ବଡ଼ ଉତ୍ସାହପ୍ରଦ ଥିଲା ଭକ୍ତଗଣଙ୍କ ପ୍ରସାଦ ସେବନ । ଶେଷ ସମୟରେ ପ୍ରତିଦିନ ପ୍ରାୟତଃ ୨୦ରୁ ୨୨ ହଜାର ଭକ୍ତ ଅନ୍ନ ପ୍ରସାଦ ସେବନ କରି ନିଜକୁ ଧନ୍ୟ ମଣିଥିବା ଜଣାପଡିଛି । ଏହି ପବିତ୍ର ଯଜ୍ଞ ସକାଶେ ଚନ୍ଦନ ଭାଟି, ଜାମୁଟିଆ, ଫଟାବାହାଲ, ଖଲିଆପାଲି, ବଘାପାଲି, ଛତାବାହାଲ, କୁଶମେଲ, ବଘଲା, ସାଲେପାଲି, ବାଦୀଘୋର, ସିନ୍ଦୁରବାହାଲ, କଅଗାଁ, ମିର୍ଦ୍ଧାପାଲି, ଧାମଣାସର, ପିପିଲି, ବ୍ରାହ୍ମଣୀପାଲି, କଟାପାଲି ଇତ୍ୟାଦି ୪୨ଟି ଗ୍ରାମର ଜନତାଙ୍କ ପ୍ରତ୍ୟକ୍ଷ ସହଯୋଗ ଥିଲା । ପ୍ରତିଦିନ ପାଲି କରି ଦୁଇ ତିନୋଟି ଗ୍ରାମରୁ ଶତାଧିକ ସ୍ୱେଚ୍ଛାସେବୀ ଆସି ସେବା ଯୋଗାଉ ଥିଲେ । ଏହାର ସଫଳତା ସକାଶେ ଚନ୍ଦନଭାଟିର ପ୍ରତ୍ୟେକ ଗୃହ ତଥା ବଲାଙ୍ଗିର ଏପରିକି ଜିଲ୍ଲା ବାହାରୁ ମଧ୍ୟ ବିଶିଷ୍ଟ ବ୍ୟକ୍ତି ବିଶେଷଙ୍କ ଉଭୟ ଆର୍ଥିକ ସହଯୋଗ ଥିଲା । ଶେଷ ପର୍ଯ୍ୟାୟରେ ତିନୋଟି ସଂକୀର୍ତ୍ତନ ଦଳକୁ ନେଇ ବୈଠକୀ ହେବା ସହିତ ବିରାଟ ଥାଟ ମେଳରେ ନଗର ପରିକ୍ରମା ଏବଂ ରଙ୍ଗ ଖେଳ ଅନୁଷ୍ଠିତ ହୋଇଥିଲା । ନାମଯଜ୍ଞର ସଫଳ ପରିଚାଳନା କ୍ଷେତ୍ରରେ ମେଘନାଦ ମେହେର, ଲିଙ୍ଗରାଜ ମେହେର, ଭକ୍ତରାମ ମେହେର, ପ୍ରଭୁଦତ୍ତ ପ୍ରଧାନ, ମନୋରଞ୍ଜନ ମେହେର, କୃଷ୍ଣଚନ୍ଦ୍ର ମେହେର, ସଂକୀର୍ତ୍ତନ ମେହେର, ଅର୍ଜୁନ ମେହେର, ବିଜୟ ମେହେର, ଦୁର୍ବାଦଳ ମେହେର, ନରେନ୍ଦ୍ର ମେହେର ଇତ୍ୟାଦି ପ୍ରମୁଖ ବ୍ୟକ୍ତିଙ୍କ ଗୁରୁତ୍ୱପୂର୍ଣ୍ଣ ଭୂମିକା ଥିଲା । ଚନ୍ଦନଭାଟି ପ୍ରହରୀ କମିଟିର ସଭାପତି ବଲାଙ୍ଗିରିଆ ମେହେର ଏବଂ ଆଞ୍ଚଳିକ ସଭାପତି ତ୍ରିଲୋଚନ ମହାପାତ୍ରଙ୍କ ବଳିଷ୍ଠ ନେତୃତ୍ୱରେ ଏହା ଶୃଙ୍ଖଳାର ସହିତ ସମାପନ ହେଲା । ଏହି ପବିତ୍ର ନାମଯଜ୍ଞ ଅବସରରେ ସଭାପତି ଦ୍ୱୟ ଓଡିଶାବାସୀଙ୍କୁ କୃତଜ୍ଞତା ଜଣାଇବା ସହିତ ନିଜ ବକ୍ତବ୍ୟରେ ବିଶ୍ୱର କଲ୍ୟାଣ କାମନା କରିଛନ୍ତି ।