ଭୁବନେଶ୍ୱର : ରାସ୍ତାରେ ଛିଡ଼ା ହୋଇଥିବା ଟ୍ରକ୍କୁ ପଛରୁ ଧକ୍କା ଦେଲା ଆଉ ଏକ ଟ୍ରକ୍ । ଡ୍ରାଇଭର ଓ ହେଲପର୍ ଗୁରୁତର । ଶନିବାର ବିଳମ୍ବିତ ରାତିରେ ଭୁବନେଶ୍ୱର ତମାଣ୍ଡୋ ଥାନା ଜାତୀୟ ରାଜପଥରେ ଏଭଳି ଦୁର୍ଘଟଣା ଘଟିଥିବା ଜଣାପଡିଛି । ମିଳିଥିବା ସୂଚନା ଅନୁସାରେ, ତମାଣ୍ଡୋ ଥାନା ଜାତୀୟ ରାଜପଥ ନିକଟରେ ଏକ ଟ୍ରକ୍ ରାସ୍ତା ଉପରେ ଛିଡ଼ା ହୋଇଥିଲା । ବିଳମ୍ବିତ ରାତିରେ ପାରାଦୀପ ପଟୁ ଆସୁଥିବା ଏକ କ୍ରୋମାଇଟ୍ ବୋଝେଇ ଟ୍ରକ୍ ପାର୍କିଂ ହୋଇଥିବା ଟ୍ରକ୍କୁ ପଛପଟୁ ଧକ୍କା ଦେଇଥିଲା । ଫଳରେ ଟ୍ରକ୍ର ଆଗପଟୁ ଭାଙ୍ଗି ଚାପି ହୋଇଯାଇଥିବା ବେଳେ ଡ୍ରାଇଭର ଓ ହେଲପର୍ ସେଥିରେ ଫସି ରହିଥିଲେ । ଖବର ପାଇ ଅଗ୍ନିଶମ ବାହିନୀ ପହଞ୍ଚି ପ୍ରଥମେ ହେଲପର୍କୁ ବାହାର କରିଥିଲେ । ହେଲେ ଡ୍ରାଇଭର ପୂରା ଚାପି ହୋଇଯାଇଥିବାରୁ କଟରରେ ଟ୍ରକ୍ର ଆଗପଟକୁ କାଟି ତାଙ୍କୁ ବାହାର କରାଯାଇଥିଲା । ଉଭୟଙ୍କୁ ଉଦ୍ଧାର କରି ଡାକ୍ତରଖାନାରେ ଭର୍ତ୍ତି କରାଯାଇଛି । ଦୁର୍ଘଟଣାରେ ହେଲପର୍ ଚିକିତ୍ସିତ ହେଉଥିବା ବେଳେ ଡ୍ରାଇଭରଙ୍କ ଅବସ୍ଥା ଗୁରୁତର ରହିଥିବା ଜଣାପଡିଛି ।