ବାଲିଗୁଡ଼ା, (ସୁରେନ୍ଦ୍ର କୁମାର ପାଣିଗ୍ରାହୀ) : କୋଟଗଡ଼ ଥାନା ଝରିଆପଦାରେ ଜଣେ ଶିକ୍ଷକଙ୍କୁ ଟାଙ୍ଗିଆରେ ହାଣି ହତ୍ୟା ଉଦ୍ୟମ ହୋଇଥିବା ଜଣାପଡ଼ିଛି । ଘଟଣା ଅନୁଯାୟୀ, ସକାଳ ପ୍ରାୟ ୯ଟା ସମୟରେ କୋଟଗଡ଼ ଝରିଆପଦା ସାହିରେ ରହୁଥିବା ଗେଟାବାଲି ପ୍ରାଥମିକ ବିଦ୍ୟାଳୟର ଶିକ୍ଷକ ପଦ୍ମଚରଣ ରଥ ନିଜ ଗୃହ ସମ୍ମୁଖରେ ନିଜ କୁନି ପୁଅକୁ ଧରି ଠିଆ ହୋଇଥିଲେ । ଠିକ୍ ଏତିକିବେଳେ ସେହି ସାହିର କୁନା ନାମକ ଜଣେ ଯୁବକ ଟାଙ୍ଗିଆରେ ହାଣିବାକୁ ଉଦ୍ୟମ କରିବା ବେଳେ ପାଖରେ ଥିବା ଚିକୁ ମିଶ୍ର ନାମକ ଜଣେ ଯୁବକ କୁନା ହାତରୁ ଟାଙ୍ଗିଆ ଛଡ଼ାଇ ନେଇଥିଲେ । ଘଟଣା ପରେ ଆହତଙ୍କୁ କୋଟଗଡ଼ ସରକାରୀ ଡାକ୍ତରଖାନାକୁ ଆଣିଥିଲେ । ଘଟଣାସ୍ଥଳରୁ ହତ୍ୟା ଉଦ୍ୟମକାରୀ ଯୁବକ କୁନା ଫେରାର ହୋଇଯାଇଥିବା ଜଣାପଡ଼ିଛି । କୋଟଗଡ଼ ଥାନାରେ ମାମଲା ରୁଜୁ କରି ଘଟଣାସ୍ଥଳରେ କୋଟଗଡ଼ ଥାନା ଅଧିକାରୀ ଲଳିତ ମୋହନ ସାଗର ପହଞ୍ଚି ତଦନ୍ତ ଆରମ୍ଭ କରିବା ସହ ଅଭିଯୁକ୍ତ କୁନାକୁ ଖୋଜାଖୋଜି ଚଳାଇଛି । ତେବେ ଏଭଳି ବିଭତ୍ସ କାଣ୍ଡର ପ୍ରକୃତ କାରଣ ଅସ୍ପଷ୍ଟ ରହିଥିବା ବେଳେ ଗୁରୁତର ପଦ୍ମଚରଣ ରଥଙ୍କୁ ଚିକିତ୍ସା ପାଇଁ ଆମ୍ବୁଲାନ୍ସ ଯୋଗେ ବ୍ରହ୍ମପୁରକୁ ପଠାଇ ଦିଆଯାଇଛି ।