ଗଣ୍ଡାବଜା ଆମ ପ୍ରଥା ପରଂପରା ଓ ସଂସ୍କୃତିର ଏକ ଅଙ୍ଗ, ଏହାର ସୁରକ୍ଷା ହେଲେ ହିଁ ଆମ ସଂସ୍କୃତି ସୁରକ୍ଷିତ ରହିବ – ନରସିଂହ
ବଲାଙ୍ଗିର, (କେପିଏନ୍ଏସ୍) : ଗଣ୍ଡାବଜା କେବଳ ବାଦ୍ୟ ନୁହେଁ, ଆମ ପରମ୍ପରା ଓ ସଂସ୍କୃତିର ପରିଚୟ । ଜନ୍ମଠାରୁ ମୃତ୍ୟୁ ପର୍ଯ୍ୟନ୍ତ ମଣିଷର ଜୀବନ ସହ ଜଡ଼ିତ ରହିଛି ଏହି ପାରମ୍ପରିକ ବାଦ୍ୟ । ଏହାର ତାଳେ ତାଳେ ଗୁଞ୍ଜରିତ ହୁଏ ସାମାଜିକ ଏକତା, ଭାଇଚାରା ଓ ସମାନତାର ବାର୍ତ୍ତା । ତେଣୁ ଗଣ୍ଡାବଜାର ସୁରକ୍ଷା ସହ ଏହାକୁ ଆଦରି ନେଇଥିବା ସମାଜର ଆତ୍ମସମ୍ମାନ ଓ ମର୍ଯ୍ୟାଦା ରକ୍ଷା ଜରୁରୀ । ଏଭଳି ମତ ପ୍ରକାଶ କରିଛନ୍ତି ପୂର୍ବତନ ଆଇନମନ୍ତ୍ରୀ ନରସିଂହ ମିଶ୍ର । ବଲାଙ୍ଗିର କଳାମଣ୍ଡଳ ପଡ଼ିଆରେ ଗଣ୍ଡାବଜା ମହୋତ୍ସବ କମିଟି ପକ୍ଷରୁ ଆୟୋଜିତ ଗଣ୍ଡାବଜା ମହୋତ୍ସବ-୨୦୨୬ରେ ମୁଖ୍ୟ ଅତିଥି ଭାବେ ଯୋଗଦେଇ ସେ ଏହା କହିଛନ୍ତି । ଅସ୍ପୃଶ୍ୟତା ଓ ଜାତିଭେଦକୁ ସମାଜର କଳଙ୍କ ବୋଲି ଅଭିହିତ କରିବା ସହ ଏଭଳି ଭେଦଭାବ ସମାଜର ପ୍ରଗତିରେ ବାଧକ ସାଜୁଥିବା ସେ କହିଥିଲେ । ଗଣ୍ଡାବଜାକୁ ଆଦରି ନେଇଥିବା ସମାଜ କେବେ ବି ନିଜକୁ ନ୍ୟୂନ ମନେ ନକରି ଗର୍ବର ସହ ନିଜ ପରମ୍ପରାକୁ ଆଗକୁ ନେବାକୁ ସେ ଆହ୍ୱାନ ଦେଇଥିଲେ । କମିଟିର ଆବାହକ ଡ. ଅର୍ଜୁନ ମୁଗ୍ରୀ ଓ ସଂସ୍କୃତି ଗବେଷକ ତରଣିସେନ ଦୀପଙ୍କ ସଭାପତିତ୍ୱରେ ଆୟୋଜିତ ଏହି ମହୋତ୍ସବରେ ପଦ୍ମଶ୍ରୀ ଜିତେନ୍ଦ୍ରୀୟ ହରିପାଲ ଓ ଜିଲ୍ଲା ସଂସ୍କୃତି ଅଧିକାରୀ ରଶ୍ମୀରଞ୍ଜନ ମିଶ୍ର ସମ୍ମାନିତ ଅତିଥି ଭାବେ ଯୋଗଦେଇଥିଲେ । ମହୋତ୍ସବର ଆକର୍ଷଣ ପାଲଟିଥିଲା ବିଭିନ୍ନ ଅଞ୍ଚଳରୁ ଆସିଥିବା ୩୦ଟି ଗଣ୍ଡାବଜା ଦଳର ପାରମ୍ପରିକ ପରିବେଷଣ । ମଞ୍ଚ ଉଦ୍ଘାଟନ ପରେ ଦଳଗୁଡ଼ିକ ସହର ପରିକ୍ରମା କରି ଗଣ୍ଡାବଜାର ନିଆରା ତାଳ ଓ ଲୋକକଳାର ଝଲକ ଦେଖାଇଥିଲେ । ଏଥିସହ କବିତା ପାଠୋତ୍ସବ, ଲୋକନୃତ୍ୟ, ବଜାଶାଲ ଓ ଘୁଙ୍ଗୁରୁ କଳା ପରିଷଦର କଳାକାରଙ୍କ ପରିବେଷଣ ଦର୍ଶକଙ୍କୁ ମନ୍ତ୍ରମୁଗ୍ଧ କରିଥିଲା । ଅନ୍ୟପଟେ ‘ଗଣ୍ଡାବଜାର ଅତୀତ, ବର୍ତ୍ତମାନ ଓ ଭବିଷ୍ୟତ’ ଶୀର୍ଷକ ଆଲୋଚନାଚକ୍ରରେ ସଂସ୍କୃତି ଗବେଷକମାନେ ଏହି ଲୋକବାଦ୍ୟର ଇତିହାସ, ବର୍ତ୍ତମାନର ସ୍ଥିତି ଓ ଭବିଷ୍ୟତର ସୁରକ୍ଷା ଉପରେ ମତ ରଖିଥିଲେ । ସନ୍ଧ୍ୟାରେ ନବୀନ କୁଅଁରଙ୍କ ସମେତ ବିଭିନ୍ନ କଣ୍ଠଶିଳ୍ପୀ ଓ ଦଣ୍ଡ କଳାକାରଙ୍କ ଲୋକଗୀତ ପରିବେଷଣ ମହୋତ୍ସବକୁ ଆହୁରି ରଙ୍ଗୀନ କରିଥିଲା । ଗଣ୍ଡାବଜାର ଐତିହ୍ୟକୁ ସଂରକ୍ଷଣ କରିବା ସହ ଆଗାମୀ ପିଢ଼ି ନିକଟରେ ଏହି ମହାନ ଲୋକକଳାର ପରିଚୟ ପହଞ୍ଚାଇବାର ସଂକଳ୍ପ ସହ ମହୋତ୍ସବରେ ବହୁ ସଂସ୍କୃତିପ୍ରେମୀ, କଳାକାର ଓ ବୁଦ୍ଧିଜୀବୀ ସାମିଲ ହୋଇଥିଲେ । ଶେଷରେ କମିଟିର ସମ୍ପାଦକ ଅଶୋକ ଦୀପ ଧନ୍ୟବାଦ ଅର୍ପଣ କରିଥିଲେ ।