ବ୍ରହ୍ମପୁର, (କେ.ସତ୍ୟନାରାୟଣ ରେଡ୍ଡୀ) : ଓଡ଼ିଆ, ଭାଷା, ସାହିତ୍ୟ ଓ ସଂସ୍କୃତି ବିଭାଗ ଆନୁକୁଲ୍ୟରେ ଭୁବନେଶ୍ୱରର ଅଗ୍ରଣୀ କଳା ଅନୁଷ୍ଠାନ ଅନନ୍ୟ କଳା ଦର୍ପଣର ଦ୍ୱିତୀୟ ବାର୍ଷିକ ଉତ୍ସବ- ୨୦୨୫ ଗଞ୍ଜାମ ଜିଲ୍ଲାର ସଦର ମହକୁମା ଛତ୍ରପୁର ସ୍ଥିତ ଜିଲ୍ଲା ସଂସ୍କୃତି ଭବନରେ ରବିବାର ସନ୍ଧ୍ୟାରେ ଆୟୋଜିତ ହୋଇଯାଇଛି । ଗଞ୍ଜାମ ଅତିରିକ୍ତ ଜିଲ୍ଲାପାଳ ଡ଼ଃ. ପ୍ରମୋଦ କୁମାର ପୃଷ୍ଟି (ସାଧାରଣ ପ୍ରଶାସନ) ଯୋଗଦେଇ ଏହି ସାଂସ୍କୃତିକ ବିଚିତ୍ରା ଭରା ଏହି ସାରଦ୍ୱତ ସମାରୋହକୁ ପ୍ରଦୀପ ପ୍ରଜ୍ୱଳନ କରି ଏହାକୁ ଆନୁଷ୍ଠାନିକ ଭାବେ ଉଦଘାଟନ କରିଥିଲେ । କେନ୍ଦ୍ର ସଙ୍ଗୀତ ନାଟକ ଏକାଡେମୀ ଦ୍ୱାରା ପୁରସ୍କୃତ ବିଶିଷ୍ଟ ନୃତ୍ୟଗୁରୁ ଡ଼ଃ. ସ୍ନେହପ୍ରଭା ସାମନ୍ତରାୟ ମୁଖ୍ୟଅତିଥି ଭାବେ ଯୋଗଦେଇ କହିଥିଲେ ଯେ’ ମୁଁ ହେଉଛି, ଛତ୍ରପୁର ମାଟିରେ ଜନ୍ମ ବୋଲି ବ୍ୟାଖ୍ୟା କରି କହି ଗାନ୍ଧର୍ବ କଳାର ବିଶେଷତ୍ଵ ଥିବା ଛତ୍ରପୁର ମାଟି ଏକ ଚର୍ଚ୍ଚିତ ଇତିହାସ ଅଟେ ବୋଲି ଆଲୋକପାତ କରିଥିଲେ । ସେ କହିଥିଲେ ଯେ’ ଅନେକ ଗୁରୁ, ସଙ୍ଗୀତଜ୍ଞ, ଶାସ୍ତ୍ରୀୟ ସଙ୍ଗୀତ, ନୃତ୍ୟ ଶିଳ୍ପୀ ଓ କଳାକାରଙ୍କର ଏହି ମାଟିରେ ଜନ୍ମ ଗ୍ରହଣ ହୋଇଛି । ଏଠାକାର ଲୋକ ସଂସ୍କୃତି ଲୋକ କଳା ରାଌ୍ୟ ଦେଶ ଓ ଦେଶ ବାହାରେ ସୁନାମ ଅର୍ଜନ କରି ଇତିହାସରେ ଏକ ନିଆରା ଗାଥାର ବାର୍ତ୍ତା ବହନ କରି ଛତ୍ରପୁର ମାଟିରେ ଏକ ଚର୍ଚ୍ଚିତ ଇତିହାସ ସୃଷ୍ଟି କରିଛନ୍ତି । ଏହି ମାଟିର ବିଶେଷତ୍ଵ ହେଉଛି, ଗାନ୍ଧର୍ବ କଳା ତାହା ମୋର ଅନୁଭୂତି ଅଟେ ବୋଲି ତାତ୍ତ୍ୱିକ ଆଲୋଚନା ଦେଇଥିଲେ । ମୁଖ୍ୟବକ୍ତା ଭାବେ ଅବସରପ୍ରାପ୍ତ ପୂର୍ବତନ ପ୍ରତିଷ୍ଠିତ ଗଞ୍ଜାମ ଜିଲ୍ଲା ସଂସ୍କୃତି ଅଧିକାରୀ ତଥା ଅବସରପ୍ରାପ୍ତ ସଂସ୍କୃତି ସଚିବ ଡ଼ଃ. ପ୍ରତାପ କୁମାର ସାହାଣୀ ଯୋଗଦେଇ କବିସୂର୍ଯ୍ୟ ବଳଦେବ ରଥ, କବି ସମ୍ରାଟ୍ ଉପେନ୍ଦ୍ର ଭଞ୍ଜ ଓ କବି ଗୋପାଳ କୃଷ୍ଣ ପଟ୍ଟନାୟକଙ୍କର ପୂଣ୍ୟ ପବିତ୍ର ଏହି କଳାର ମାଟିକୁ ଚିର ନମସ୍ୟ ବୋଲି କହି ଜିଲ୍ଲାର କଳାର ମହତ୍ତ୍ୱ ସମ୍ପର୍କରେ ପ୍ରତିପାଦନ କରିଥିଲେ । ଅନ୍ୟମାନଙ୍କ ମଧ୍ୟରେ ରଣପା ଲୋକକଳା ସଂଗଠନ ମୁଖ୍ୟ ପୁରୋଧା ଏସ. ଭେଙ୍କଟ ରାଓ ରେଡ୍ଡୀ, ଡ଼ଃ. ରାଜେନ୍ଦ୍ର ଦାସ୍, ଅରୁଣ କୁମାର ଶତପଥୀ ପ୍ରମୁଖ ମଞ୍ଚାସୀନ ହୋଇ ବକ୍ତବ୍ୟ ପ୍ରଦାନ କରିଥିଲେ । ରାଷ୍ଟ୍ରପତି ପୁରସ୍କୃତ ଶିକ୍ଷକ ଅଜିତ କୁମାର ସେଠୀ କାର୍ଯ୍ୟକ୍ରମ ନିଷ୍ପାଦନା କରିଥିବା ବେଳେ ବିଶିଷ୍ଟ କୋରିଓ ଗ୍ରାଫେର୍ ପ୍ରଶାନ୍ତ କୁମାର ପଟ୍ଟନାୟକ କାର୍ଯ୍ୟକ୍ରମ ସଂଯୋଜନା କରିଥିଲେ । ସାଂସ୍କୃତିକ ବିଚିତ୍ରା ଭରା ଏହି ସାରସ୍ୱତ ସମାରୋହରେ ବହୁ ଗଣ୍ୟମାନ୍ୟ ବ୍ୟକ୍ତି ଯୋଗଦେଇ ନୃତ୍ୟ-ଗୁରୁ, ନୃତ୍ୟ ଶିଳ୍ପୀ, କଳାକାର ଓ ସାହିତ୍ୟ ସଂସ୍କୃତି ଅନୁରାଗୀ ସମ୍ପନ୍ନ ବ୍ୟକ୍ତି ବିଶେଷ୍ୟଙ୍କୁ ଅତିଥିମାନଙ୍କ ଦ୍ଵାରା ପୁରସ୍କୃତ ସହ ମାନପତ୍ର ସହ ସମ୍ବର୍ଦ୍ଧିତ କରାଯାଇଥିଲା । ଗୁରୁ ଶଙ୍କର୍ଷଣ ପାତ୍ର, ତେଲୁଗୁ ସଂସ୍କୃତି ସଂଗଠିକା ବ୍ରହ୍ମପୁର ଲଳିତା ସଂସ୍କୃତି ଏକାଡେମୀର ଅଧ୍ୟକ୍ଷା ଭି. ଚନ୍ଦ୍ରକଳା, ପୂର୍ବତନ ବିଧାୟକ ଏନ୍.ନାରାୟଣ ରେଡ୍ଡୀ ଓ ଅଶୋକ କୁମାର ଚୌଧୁରୀ, ଛତ୍ରପୁର ୟୁଥ୍ ମାସ୍ ସେବା ସଂଘର ମୁଖ୍ୟ ପୁରୋଧା ସୟେଦ୍ ମୁକ୍ତାର୍ ଏବଂ ଶିକ୍ଷା ସମାଜ ସେବା ଓ ସାମ୍ବାଦିକତା କ୍ଷେତ୍ରରେ ଉଲ୍ଲେଖନୀୟ କାର୍ଯ୍ୟ ପାଇଁ ଗଞ୍ଜାମ ଜିଲ୍ଲାର ବରିଷ୍ଠ ସାମ୍ବାଦିକ କେ. ସତ୍ୟନାରାୟଣ ରେଡ୍ଡୀଙ୍କୁ ତାଙ୍କରି ତ୍ୟାଗ ଓ ଆଦର୍ଶତାକୁ ସମ୍ମାନ ଜଣାଇ ଉପଢ଼ୌକନ ସହ ମାନପତ୍ର ଦେଇ ମୁଖ୍ୟଅତିଥି ସମ୍ବର୍ଦ୍ଧିତ କରିଥିଲେ । ସ୍ଵତନ୍ତ୍ର ଭାବରେ ଗଞ୍ଜାମ ଜିଲ୍ଲାର ଛତ୍ରପୁର ବ୍ଲକରେ ସ୍ଵାସ୍ଥ୍ୟ ସେବାରେ ଅଗ୍ରଣୀ ଭୂମିକା ଗ୍ରହଣ କରିଥିବା ମୁନିସିପେଣ୍ଠ ସ୍ଵାସ୍ଥ୍ୟ କେନ୍ଦ୍ରର ଅଧିକ୍ଷକ ଡାକ୍ତର ସ୍ଵାଧୀନ ରଥଙ୍କ ତ୍ୟାଗପୂର୍ଣ୍ଣ ଆଦର୍ଶ ଜୀବନୀକୁ ସମ୍ମାନ ଜଣାଇ ଉପଢ଼ୌକନ ସହ ସମ୍ୱର୍ଦ୍ଧିତ କରାଯାଇଛି । ସୁଶ୍ରୀ ଅଭିପ୍ସା ପତି ଓ ଭୁବନେଶ୍ୱରର ସତ୍ୟ ସୂର୍ଯ୍ରାଶୁ ଏଵଂ ଲକ୍ଷ୍ମୀ ପ୍ରିୟା ସାହୁଙ୍କ ଓଡ଼ିଶୀ ନୃତ୍ୟ, ନରେନ୍ଦ୍ରପୁର ଗଞ୍ଜାମ ଫୋକ୍ ଡ୍ୟାନ୍ସ ପକ୍ଷରୁ ରଣପା ନୃତ୍ୟ, ଜୟ ଗଣେଶ କଳା ବିକାଶ କେନ୍ଦ୍ର ଛତ୍ରପୁର ପକ୍ଷରୁ ଢେମସା, ଗୁରୁ ପ୍ରଦ୍ୟୁମ୍ନ ମହନ୍ତ ଓ ବବିତା ମହନ୍ତ (ଯୁଗଳ ବନ୍ଦୀ) ଙ୍କ ଦ୍ଵାରା ଛଉ ନୃତ୍ୟ ଏବଂ ଦିବାକର ବିଷୋୟୀଙ୍କ ନିର୍ଦ୍ଦେଶିତ ଗୋଷ୍ଠୀ ଗତ କାଠପାଦ ନୃତ୍ୟ ଆଦି ବିଭିନ୍ନ ସାଂସ୍କୃତିକ ଅନୁଷ୍ଠାନ ପକ୍ଷରୁ ନାନା ନୃତ୍ୟ ପରିବେଷଣରେ ଦର୍ଶକ ବେଶ୍ ବିଭୋର ହୋଇଯାଇଥିଲେ ।