ନୂଆଦିଲ୍ଲୀ : ବିଭାଜନ ସମୟରେ ଦେଶ ଏକ ବଡ଼ ଆଘାତ ସୃଷ୍ଟି କରିଛି ଏବଂ ଏହାକୁ ଭୁଲି ହେବନାହିଁ ବୋଲି ସଂଘ ପ୍ରମୁଖ ମୋହନ ଭାଗବତ ଭାରତକୁ ପୁଣି ଥରେ ବିଭାଜନ କରିବାକୁ ଚାହୁଁଥିବା ବ୍ୟକ୍ତିଙ୍କୁ ଟାର୍ଗେଟ କରି କରିଛନ୍ତି । ସେ କହିଛନ୍ତି, ଦେଶ ଆଉ ବିଭାଜିତ ହେବ ନାହିଁ । ନୋଏଡାରେ କୃଷ୍ଣାନନ୍ଦ ସାଗରଙ୍କ ଦ୍ୱାରା ଲିଖିତ ‘ବିଭାଜନକାଳୀନ ଭାରତ କେ ସାକ୍ଷୀ’ ପୁସ୍ତକ ଉନ୍ମୋଚନ କରିବା ବେଳେ ସଂଘ ପ୍ରମୁଖ କହିଛନ୍ତି ଯେ, ଏହା ୧୯୪୭ର ନୁହେଁ, ୨୦୨୧ର ଭାରତ । ସେତେବେଳେ ଦେଶ ବିଭାଜିତ ହୋଇଗଲା, କିନ୍ତୁ ବର୍ତ୍ତମାନ ଦେଶ ଆଉ ବିଭାଜିତ ହେବ ନାହିଁ । ସେ କହିଛନ୍ତି ଯେ, ଯେଉଁମାନେ ଭାରତକୁ ବିଭାଜନ କରିବା କଥା କହୁଛନ୍ତି, ସେମାନେ ନିଜେ ଖଣ୍ଡ ବିଖଣ୍ଡିତ ହୋଇଯିବେ ।
ଏହା ସହିତ ମୋହନ ଭାଗବତ ଏକ ମିଳିତ ଭାରତ ପାଇଁ ଯୁକ୍ତି ବାଢ଼ୁଥିବା ବେଳେ ମାତୃଭୂମିର ବିଭାଜନକୁ ଭୁଲିଯିବା ଉଚିତ ନୁହେଁ ବୋଲି କହିଥିଲେ । ସେ କହିଛନ୍ତି ଯେ, ଏହି ବିଭାଜନକୁ ନେଇ କେହି ଖୁସି ନୁହଁନ୍ତି । ସେ କହିଛନ୍ତି ଯେ, ଯାହା ଭାଙ୍ଗିଛି, ତାହାକୁ ପୁଣି ଯୋଡ଼ିବାକୁ ପଡିବ ।
ମୋହନ ଭାଗବତ କହିଛନ୍ତି ଯେ, ଭାରତ ବିଭାଜନ ପାଇଁ ଏକ ଷଡଯନ୍ତ୍ର ରଚାଯାଇଥିଲା, ଯାହା ଆଜି ବି ଜାରି ରହିଛି । ସେତେବେଳେ ଶାନ୍ତି ପାଇଁ ବିଭାଜନ ହୋଇଥିଲା, କିନ୍ତୁ ଏହା ପରେ ମଧ୍ୟ ଦେଶରେ ଦଙ୍ଗା ଜାରି ରହିଥିଲା । ସେ କହିଛନ୍ତି ଯେ, ହିନ୍ଦୁସ୍ଥାନର ପରିଚୟ ହିନ୍ଦୁ, ତେଣୁ ଏହାକୁ ଗ୍ରହଣ କରିବାରେ କ୍ଷତି କ’ଣ ? ଘରବାହୁଡ଼ା ବିଷୟରେ ସୂଚନା ଦେଇ ସଂଘ ପ୍ରମୁଖ କହିଛନ୍ତି ଯେ, ଯଦି କେହି ପୂର୍ବପୁରୁଷଙ୍କ ଘରକୁ ଫେରିବାକୁ ଚାହାଁନ୍ତି, ତେବେ ଆମେ ସେମାନଙ୍କୁ ସ୍ୱାଗତ କରିବୁ । କିନ୍ତୁ ଯଦି କେହି ଫେରିବାକୁ ଚାହାଁନ୍ତି ନାହିଁ, ସେଥିରେ କିଛି ଯାଏ ଆସେ ନାହିଁ । ଏହା ସହିତ ସେ ଆହୁରି ମଧ୍ୟ କହିଛନ୍ତି ଯେ, ଭାରତ ହେଉଛି ସମଗ୍ର ସମାଜର ମାତା ଏବଂ ମାତୃଭୂମିକୁ ସମସ୍ତେ ସମ୍ମାନ ଦେବା ଆବଶ୍ୟକ ।
ହିନ୍ଦୁ ସମାଜକୁ ବିଶ୍ୱ କଲ୍ୟାଣ ପାଇଁ ସଶକ୍ତିକରଣ କରିବାକୁ ଆହ୍ୱାନ ଦେଇ ସଂଘ ପ୍ରମୁଖ କହିଛନ୍ତି, “ଆମେ ଇତିହାସ ପଢ଼ିବା ଉଚିତ୍ ଏବଂ ଏହାର ସତ୍ୟକୁ ଗ୍ରହଣ କରିବା ଉଚିତ୍ । ଯଦି ରାଷ୍ଟ୍ରକୁ ସଶକ୍ତିକରଣ ଏବଂ ବିଶ୍ୱ କଲ୍ୟାଣରେ ସହଯୋଗ ପାଇଁ ଯୋଗଦାନ କରିବାକୁ ପଡ଼ିବ, ତେବେ ହିନ୍ଦୁ ସମାଜକୁ ସେଥିପାଇଁ ସଶକ୍ତିକରଣ କରିବାକୁ ପଡିବ । ଭାରତର ଆଦର୍ଶ ସମସ୍ତଙ୍କୁ ସାଙ୍ଗରେ ନେଇ ଚାଲିବା । ନିଜକୁ ଠିକ୍ ଏବଂ ଅନ୍ୟମାନଙ୍କୁ ଭୁଲ ବୋଲି ବିବେଚନା କରିବା ଏହାର ଆଦର୍ଶ ନୁହେଁ ।