ସୁବର୍ଣ୍ଣପୁର, (ପ୍ରଭୁଦତ୍ତ ରଥ) : ସୁବର୍ଣ୍ଣପୁରର ତ୍ରିବେଣୀ ସଂଗମ ସ୍ୱର୍ଣ୍ଣ ପ୍ରୟାଗ ଘାଟରେ ଦ୍ଦ୍ୱାଦଶତମ “ସଂଗମ ଆଳତି” ସମାରୋହ ଅନୁଷ୍ଠିତ ହୋଇଯାଇଛି । ନଦୀର ସୁରକ୍ଷା ଓ ପ୍ରବାହିତ ନଦୀ ଜଳର ସ୍ୱଚ୍ଛତା ବାର୍ତ୍ତାରେ ଆୟୋଜିତ ସଂଗମ ଆଳତି ସମାରୋହର ମଣ୍ଡପରେ ଉଦୟମାନ ଚନ୍ଦ୍ରକୁ ଆଲଟ-ଚାମର ସେବା ସହ କର୍ପୁରମିଶା ତ୍ରିଆଳତି ଅର୍ପଣ କରାଯାଇଛି । ଦ୍ୱିତୀୟ ବାରାଣସୀ ଭାବେ ପରିଚିତ ସୁବର୍ଣ୍ଣପୁରର ମହାନଦୀ, ତୈଲ ଓ କର୍ପୁର ନଦୀର ସଂଗମସ୍ଥଳିରେ ଆୟୋଜିତ ଏହି ଭବ୍ୟ ଆଧ୍ୟାତ୍ମିକ ସମାରୋହରେ ସାଧୁ ଗିରିବର ଦାସ ଓ ପଣ୍ଡିତ ସଚ୍ଚିଦାନଂଦ ମିଶ୍ର ଅତିଥିଭାବେ ଯୋଗଦେଇ ସୁବର୍ଣ୍ଣପୁରର ସାଂସ୍କୃତିକ ଅବତାରଣା ସହ ନଦୀର ସୁରକ୍ଷା ଓ ଜଳର ପବିତ୍ରତାକୁ ନେଇ ବାର୍ତ୍ତା ଦେଇଥିଲେ । ଏହି ଅବସରରେ ଯଶସ୍ୱୀ ବିଦ୍ୱାନ ଆଚାର୍ଯ୍ୟ ମେଘନାଦ ପାଣିଗ୍ରାହୀଙ୍କୁ ସୁବର୍ଣ୍ଣ ଗୌରବ ସମ୍ମାନରେ ସମ୍ମାନିତ କରାଯାଇଥିଲା ।