ବଲାଙ୍ଗିର, (କେପିଏନ୍ଏସ୍) : ବଡ଼ ଭାଇ ଛୁରା ଭୁସି ସାନ ଭାଇକୁ ହତ୍ୟା କରିବା ଭଳି ଏକ ଚାଂଚଲ୍ୟକର ଖବର ଆସିଛି । ସୂଚନା ଅନୁସାରେ ପୁଇଁନ୍ତଲା ବ୍ଲକ ଅନ୍ତର୍ଗତ ଆଟଗାଁରେ ଘଟିଛି ଏଭଳି ଘଟଣା । ଗାଁର ନିବାସୀ ସନ୍ତୋଷ କୁଅଁରଙ୍କ ବଡ଼ ପୁଅ ସୁବ୍ରତ କୁଅଁର ସାନ ପୁଅ ତେଜରାଜ କୁଅଁରଙ୍କୁ ଛୁରି ଭୁସି ହତ୍ୟା କରିଥିବା ଜଣାପଡ଼ିଛି । ଗାଁରେ ସନ୍ତୋଷଙ୍କ ଏକ ମାଂସ ଦୋକାନ ଥିବା ବେଳେ ଦୁଇ ପୁଅ ତାଙ୍କୁ ସହଯୋଗ କରନ୍ତି । ଗତକାଲି କୌଣସି କାରଣରୁ ଦୁଇ ପୁଅଙ୍କ ମଧ୍ୟରେ ଝଗଡ଼ା ହୋଇଥିଲା । ଏଥିରେ ଉତ୍କ୍ଷିପ୍ତ ହୋଇ ବଡ଼ ପୁଅ ସୁବ୍ରତ ସାନ ପୁଅ ତେଜରାଜଙ୍କ ପେଟରେ ଛୁରା ଭୁସି ଦେଇଥିଲା । ଗୁରୁତର ଅବସ୍ଥାରେ ସନ୍ତୋଷ ତାଙ୍କ ସାନ ପୁଅ ତେଜରାଜକୁ ଭୀମ ଭୋଇ ମେଡ଼ିକାଲ କଳେଜ ହସ୍ପିଟାଲ୍ରେ ଆଣି ଭର୍ତ୍ତି କରିଥିବା ବେଳେ ତାଙ୍କ ମୃତ୍ୟୁ ଘଟିଥିଲା । ପୁଇଁନ୍ତଲା ଥାନା ପକ୍ଷରୁ ଘଟଣାର ତଦନ୍ତ ଚାଲିଥିବା ବେଳେ ଅଭିଯୁକ୍ତକୁ ଗିରଫ କରିବା ପାଇଁ ତନାଘନା ଉଦ୍ୟମ ଚାଲିଥିବା କୁହାଯାଇଛି ।