- ସଙ୍ଗୀତ ଓ କଳା ମାଧ୍ୟମରେ ସଦାପ୍ରଭୁଙ୍କ ମହିମା ଗାନ ସହ କଳାକାରମାନଙ୍କ ମହାମିଳନ
ବଲାଙ୍ଗିର, (କେପିଏନ୍ଏସ୍) : ପଶ୍ଚିମ ଓଡ଼ିଶାର ଖ୍ରୀଷ୍ଟୀୟ ସଙ୍ଗୀତ ଓ କଳା-ସଂସ୍କୃତିର ପରମ୍ପରାକୁ ସମୃଦ୍ଧ କରିବା ସହ ସର୍ବଶକ୍ତିମାନ ସଦାପ୍ରଭୁ ପରମେଶ୍ୱରଙ୍କ ମହିମା, ଗୌରବ ଓ ପ୍ରଶଂସାକୁ ସଙ୍ଗୀତ ମାଧ୍ୟମରେ ପ୍ରଚାର କରିବାର ମହତ୍ ଉଦ୍ଦେଶ୍ୟ ନେଇ ଗତ ୧୦ ଅକ୍ଟୋବର ୨୦୨୬ ତାରିଖ ସନ୍ଧ୍ୟାରେ ବଲାଙ୍ଗିରସ୍ଥିତ ମିଶନ କମ୍ପାଉଣ୍ଡ ଆସେମ୍ବଲି ହଲ୍ଠାରେ ‘ଢୋଲ ମୁହୁରୀ’ କାର୍ଯ୍ୟକ୍ରମ ମହାସମାରୋହରେ ଅନୁଷ୍ଠିତ ହୋଇଥିଲା । ୟୁଟ୍ୟୁବ୍ର ଦି ଆଲଫା ପ୍ରଡକ୍ସନ୍ ହାଉସ୍ (ସୌରଭ ବାରିକ) ଓ ଆୟୁଷ ଶାନ୍ ଅଫିସିଆଲ୍ (ଆୟୁଷ ଶାନ)ଙ୍କ ଉଦ୍ୟମରେ ଆୟୋଜିତ ଏହି ସାଂସ୍କୃତିକ ଓ ଆଧ୍ୟାତ୍ମିକ ସମାବେଶରେ ପଶ୍ଚିମ ଓଡ଼ିଶାର ଖ୍ରୀଷ୍ଟୀୟ କଳାକାର, ସଙ୍ଗୀତଜ୍ଞ, ଗୀତିକାର, ଲେଖକ, ପ୍ରଯୋଜକ ଓ ସଙ୍ଗୀତ ନିର୍ଦ୍ଦେଶକମାନେ ଏକତ୍ରିତ ହୋଇଥିଲେ । ସେମାନଙ୍କର ଏହି ମହାମିଳନ କେବଳ କଳାତ୍ମକ ପ୍ରତିଭାର ପରିପ୍ରକାଶ ନଥିଲା ବରଂ ଖ୍ରୀଷ୍ଟୀୟ ବିଶ୍ୱାସ, ଭାଇଚାରା, ଐକ୍ୟ ଓ ସଦାପ୍ରଭୁଙ୍କ ପ୍ରତି ସମର୍ପଣଭାବର ଏକ ଅନନ୍ୟ ପରିଚୟ ଥିଲା । କଳା ଓ ସଙ୍ଗୀତକୁ ଆଧାର କରି ପରମେଶ୍ୱରଙ୍କ ପବିତ୍ର ନାମର ଗୌରବ ପ୍ରଚାର କରିବା ସହ ଖ୍ରୀଷ୍ଟୀୟ ସଙ୍ଗୀତ ପରମ୍ପରାର ପ୍ରସାର ଓ କଳାକାରମାନଙ୍କ ମଧ୍ୟରେ ସହଯୋଗର ସେତୁ ଗଢ଼ିବା ଏହି ଆୟୋଜନର ଏକ ପ୍ରମୁଖ ଲକ୍ଷ୍ୟ ଥିଲା । କାର୍ଯ୍ୟକ୍ରମରେ ସମ୍ବଲପୁର ଧର୍ମାଞ୍ଚଳର ବିଶପ୍ ମହାମାନ୍ୟ ଇମାନୁଏଲ୍ ଦାନି ମୁଖ୍ୟ ଅତିଥି ଭାବେ ଯୋଗଦେଇଥିବା ବେଳେ ସୌରା ସୁସମାଚାର ଗାୟକ ସାଧକ କର୍ଜୀ ସମ୍ମାନିତ ଅତିଥି ଭାବେ ଉପସ୍ଥିତ ଥିଲେ । ଏଥିସହ ପୂର୍ବତନ ବିଶପ୍ ମହାମାନ୍ୟ ରାଇଟ୍ ରେଭରେଣ୍ଡ ପିନୁଏଲ୍ ଦିପ, ସମ୍ବଲପୁର ଧର୍ମାଞ୍ଚଳର ସମ୍ପାଦକ ସୌମ୍ୟ ରଞ୍ଜନ ବାଗ ଓ କୋଷାଧ୍ୟକ୍ଷ ପୁଣ୍ୟମୂର୍ତ୍ତି ଖ୍ରୀଷ୍ଟଦାସ ପ୍ରମୁଖ ଯୋଗଦେଇଥିଲେ । ଉପସ୍ଥିତ ଅତିଥିବୃନ୍ଦଙ୍କ ଦ୍ୱାରା ପ୍ରଦୀପ ପ୍ରଜ୍ୱଳନ କରାଯାଇ କାର୍ଯ୍ୟକ୍ରମର ଶୁଭାରମ୍ଭ ହୋଇଥିଲା । ଏହି ଅବସରରେ ଲଘୁ ସମ୍ପ୍ରଦାୟର ରାଜ୍ୟ ସମ୍ପାଦକ ତଥା ବିଜୁ ଜନତା ଦଳ ସହ ସମ୍ପୃକ୍ତ ଗମଲିଏଲ୍ ନାଗ, ୱାର୍ଡ ନମ୍ବର ୩ର କାଉନସିଲର ଶ୍ରୀମତୀ ରଜନୀ ବନଛୋର ଏବଂ ବଲାଙ୍ଗିର ଜିଲ୍ଲା ପରିଷଦ ମଣ୍ଡଳୀର ସଭାପତି ଆଚାର୍ଯ୍ୟ ନିମୁଏଲ୍ ନାଗ ଉପସ୍ଥିତ ରହିଥିଲେ । ଏଥିସହ ସ୍ୱର୍ଗତଃ କଣ୍ଠଶିଳ୍ପୀ ହ୍ୟୁମାନ ସାଗରଙ୍କ ମାତା ଶ୍ରୀମତୀ ଶେଫାଳୀ ସୁନା ଏବଂ ସ୍ୱର୍ଗତଃ ବାପି ଡେଭିଡ୍ଙ୍କ ଧର୍ମପତ୍ନୀ ଶ୍ରୀମତୀ ରୋଜାଲିନ ବେହେରାଙ୍କ ଉପସ୍ଥିତି କାର୍ଯ୍ୟକ୍ରମକୁ ଭାବପୂର୍ଣ୍ଣ ଗରିମା ପ୍ରଦାନ କରିଥିଲା । କାର୍ଯ୍ୟକ୍ରମର ଅନ୍ୟତମ ଆକର୍ଷଣ ଥିଲା ବିଭିନ୍ନ ୟୁଟ୍ୟୁବର୍ମାନଙ୍କୁ ସମ୍ମାନିତ କରିବାର ପର୍ବ । ଡିଜିଟାଲ୍ ମଞ୍ଚ ମାଧ୍ୟମରେ ଖ୍ରୀଷ୍ଟୀୟ ସଙ୍ଗୀତ, ସଂସ୍କୃତି ଓ ସୃଜନଶୀଳତାର ପ୍ରସାରରେ ଅବଦାନ ରଖୁଥିବା ବ୍ୟକ୍ତିମାନଙ୍କୁ ସମ୍ମାନ ଜଣାଇବା ଏହି ପଦକ୍ଷେପର ଉଦ୍ଦେଶ୍ୟ ଥିଲା । ଏହାଦ୍ୱାରା କଳାକାର ଓ ଡିଜିଟାଲ୍ ସୃଷ୍ଟିକର୍ତ୍ତାମାନଙ୍କୁ ଆଗାମୀ ଦିନରେ ଅଧିକ ଉତ୍ସାହ ଓ ନିଷ୍ଠାର ସହ କାର୍ଯ୍ୟ କରିବା ପାଇଁ ପ୍ରେରଣା ମିଳିବ ବୋଲି ଆଶା ପ୍ରକାଶ ପାଇଥିଲା । କାର୍ଯ୍ୟକ୍ରମର ମଞ୍ଚ ପରିଚାଳନା ଓ ସୁନିୟୋଜିତ ଉପସ୍ଥାପନା ଦାୟିତ୍ୱ ସ୍ୱରୂପ ରଞ୍ଜନ ଛତ୍ରିଆ, ମନୋଜ ସାହୁ, ରଶ୍ମି ରଞ୍ଜନ ନନ୍ଦ ଓ ଆୟୁଷ ରଞ୍ଜନ ନନ୍ଦ ନିଷ୍ଠାର ସହ ନିର୍ବାହ କରିଥିଲେ । ସେମାନଙ୍କ ସୁଦକ୍ଷ ମଞ୍ଚ ପରିଚାଳନା କାର୍ଯ୍ୟକ୍ରମକୁ ଶୃଙ୍ଖଳିତ, ଆକର୍ଷଣୀୟ ଓ ସୂଚାରୁରୂପେ ସମ୍ପନ୍ନ କରିବାରେ ସହାୟକ ହୋଇଥିଲା । ଏହି ମହତ୍ ଆୟୋଜନକୁ ସଫଳତାର ସୋପାନରେ ପହଞ୍ଚାଇବାରେ ଭାଇ ସୁଭାଶିଷ ମଣ୍ଡଳ ଓ ତାଙ୍କ ସମଗ୍ର ଦଳଙ୍କ ଅବଦାନ ଅତ୍ୟନ୍ତ ପ୍ରଶଂସନୀୟ ଥିଲା । ସେମାନଙ୍କ ନିଷ୍ଠା, ସମର୍ପଣ ଓ ସମ୍ମିଳିତ ପ୍ରୟାସ ଏହି ଆୟୋଜନକୁ ସଫଳ ଓ ସ୍ମରଣୀୟ କରିବାରେ ପ୍ରମୁଖ ଭୂମିକା ନିର୍ବାହ କରିଥିଲା । ପରିଶେଷରେ, ‘ଢୋଲ ମୁହୁରୀ’ କେବଳ ଏକ ସାଂସ୍କୃତିକ କାର୍ଯ୍ୟକ୍ରମରେ ସୀମାବଦ୍ଧ ନ ରହି ପଶ୍ଚିମ ଓଡ଼ିଶାର ଖ୍ରୀଷ୍ଟୀୟ କଳାକାର ସମାଜ ମଧ୍ୟରେ ଐକ୍ୟ, ଭ୍ରାତୃତ୍ୱ, ସୃଜନଶୀଳତା ଓ ଆଧ୍ୟାତ୍ମିକ ଚେତନାର ଏକ ଅନନ୍ୟ ମଞ୍ଚ ଭାବେ ପରିଗଣିତ ହୋଇଥିଲା । ଏହି ଆୟୋଜନ କଳା ଓ ସଙ୍ଗୀତକୁ ସଦାପ୍ରଭୁଙ୍କ ଆରାଧନାର ମାଧ୍ୟମ ଭାବେ ଗ୍ରହଣ କରିବା ସହ ତାଙ୍କର ଅସୀମ ପ୍ରେମ, କରୁଣା ଓ ଆଶୀର୍ବାଦ ପ୍ରତି କୃତଜ୍ଞତା ଜ୍ଞାପନର ଏକ ସୁନ୍ଦର ପରିପ୍ରକାଶ ଥିଲା ।