ବ୍ରହ୍ମପୁର, (କେ. ସତ୍ୟନାରାୟଣ ରେଡ୍ଡୀ) : ଛତ୍ରପୁର ବ୍ଲକ ଅନ୍ତର୍ଗତ କଣମଣା ଗ୍ରାମରେ ଶୁକ୍ରବାର ସନ୍ଧ୍ୟାରେ ଆୟୋଜିତ ସାନ୍ଧ୍ୟ-ରଜନୀରେ ନିଆରା ଭଲିବଲ୍ ଟୁର୍ଣ୍ଣାମେଣ୍ଟ ଉଦଘାଟିତ ହୋଇଯାଇଛି । ଗଞ୍ଜାମ ଏସପି ଶୁଭେନ୍ଦୁ କୁମାର୍ ପାତ୍ର ମୁଖ୍ୟଅତିଥି ଭାବେ ଯୋଗଦେଇ ଏହାକୁ ଆନୁଷ୍ଠାନିକ ଭାବେ ଉଦଘାଟନ କରିଥିଲେ । ସାନ୍ଧ୍ୟ-ରଜନୀରେ ଆୟୋଜିତ ଏଭଳି ନିଆରା ଭଲିବଲ୍ ଟୁର୍ଣ୍ଣାମେଣ୍ଟ ଆସର ଯୁବଖେଳାଳୀଙ୍କୁ ବେଶ୍ ଉତ୍ସାହ ଉଦ୍ଦୀପନା ଆଣିବାରେ ସହାୟକ ହେବ ବୋଲି କହି ଗଞ୍ଜାମ ଏସପି ଶ୍ରୀ ପାତ୍ର ଖେଳାଳୀମାନଙ୍କୁ ଉତ୍ସାହିତ କରିଥିଲେ । ପ୍ରଥମ ଦିବସ ସନ୍ଧ୍ୟାରେ ଦାସପୁର ସହ ଆଇ.ଆର୍.ଇ. କଲୋନୀ ମଧ୍ୟରେ ଖେଳ ଅନୁଷ୍ଠିତ ହୋଇଥିବା ବେଳେ ଦ୍ୱିତୀୟ ସନ୍ଧ୍ୟାରେ ସିନ୍ଦିରାପଲ୍ଲୀ ସହ ପାଲୁର୍ ଅଞ୍ଚଳର ଗଜପତିନଗର ଟିମ୍ ମଧ୍ୟରେ ଖେଳ ଅନୁଷ୍ଠିତ ହୋଇଥିଲା । ସରୋଜ୍ କୁମାର୍ ବେହେରା, ଜଗଦୀଶ ସେଠୀ, ଏବଂ ବିଜୟ କୁମାର ବେହେରା ଏହି ଏମ୍.ବି.ସି. ଟୁର୍ଣ୍ଣାମେଣ୍ଟର ଉଦ୍ୟକ୍ତା ଥିବାବେଳେ ଗୋବିନ୍ଦ ନାୟକ ଖେଳ ପରିଚାଳନା କରି ଆସୁଛନ୍ତି । ସାଂସ୍କୃତିକ ମଞ୍ଚରେ ଯୁବପିଢ଼ିଙ୍କ ମନୋରଞ୍ଜନ ନିମନ୍ତେ ରଙ୍ଗାରଙ୍ଗ ସମାରୋହ ସହ ଦୈନିକ ସାନ୍ଧ୍ୟ ରଜନୀରେ ଆରମ୍ଭ ହେଉଥିବା ଏହି ଭଲିବଲ୍ ଟୁର୍ଣ୍ଣାମେଣ୍ଟ ବିଳମ୍ୱିତ ରାତ୍ରିକାଳୀନରେ ସମାହିତ ହୋଇଥାଏ । ଶୀତୁଆ ସଞ୍ଜ ନଇଁବାବେଳେ ବିଚ୍ଛୁରିତ ସ୍ୱଚ୍ଛ ଆଲୋକ ସହ ରଙ୍ଗାରଙ୍ଗ କାର୍ଯ୍ୟକ୍ରମର ବନ୍ଦୋବସ୍ତ ହୋଇ ଖେଳାଳୀଙ୍କୁ ମନୋରଞ୍ଜନ କରି ଆସୁଥିବା ବେଳେ ଦର୍ଶକଙ୍କୁ ବିମୋହିତ କରିଛି ।