ବ୍ରହ୍ମପୁର, (କେ.ସତ୍ୟନାରାୟଣ ରେଡ୍ଡୀ) : ଛତ୍ରପୁର ବ୍ଲକ ଅନ୍ତର୍ଗତ ଅଗସ୍ତି ନୂଆଗାଁ ଗ୍ରାମ ନିକଟସ୍ଥ ସମୁଦ୍ର ଉପକୂଳରେ ଥିବା ଓଡ଼ିଶା ସରକାରଙ୍କ ଝାଉଁ ଓ କାଜୁ ଜଙ୍ଗଲର ସଠିକ ସୀମା ନିର୍ଦ୍ଧାରଣ ହୋଇନଥିବା ହେତୁ ଗ୍ରାମବାସୀ ଓ ଘରୋଇ ଜଙ୍ଗଲ ମାଲିକଙ୍କ ମଧ୍ୟରେ ଅନେକ ଥର ଝଗଡ଼ା, ଗଣ୍ଡଗୋଳ, ହଣାମରା ଭଲି ତିକ୍ତତା ଭଲି ପରିସ୍ଥିତି ଉପୁଜିଛି । ଏହି ସମସ୍ୟାର ସମାଧାନ ପାଇଁ ସୀମା ନିର୍ଦ୍ଧାରଣ ନିମନ୍ତେ ଆଜି ଅଗସ୍ତି ନୂଆଗାଁ ଗ୍ରାମ୍ୟ କମିଟି ଗଞ୍ଜାମ ଜିଲ୍ଲାପାଳଙ୍କୁ ଭେଟି ଏକ ଦାବୀପତ୍ର ପ୍ରଦାନ କରିଛନ୍ତି । ସୂଚନା ଯୋଗ୍ୟ ଯେ, ଅଗସ୍ତି ନୂଆଗାଁ ଗ୍ରାମ୍ୟ କମିଟୀ ଓ ଏହି ଗ୍ରାମ ଅଧୀନରେ କାର୍ଯ୍ୟ କରୁଥିବା ବନ ସୁରକ୍ଷା ସମିତି, ବନ ବିଭାଗ ତରଫରୁ ସୁରକ୍ଷା ନିମନ୍ତେ ପ୍ରଦାନ କରିଥିବା ଜଙ୍ଗଲ ମଧ୍ୟରେ କୌଣସି ଉନୟନ କାର୍ଯ୍ୟ କିମ୍ବା ରକ୍ଷଣାବେକ୍ଷଣ କରିବା କଷ୍ଟସାଧ୍ୟ ହେଉଛି । ଓଡ଼ିଶା ସରକାରଙ୍କ ବନ ବିଭାଗ ତରଫରୁ ୨୦୦୪ ମସିହାରେ ଅଗସ୍ତି ନୂଆଗାଁ ଗ୍ରାମକୁ ବନ ସୁରକ୍ଷା ସମିତି ଗଠନ ମାଧ୍ୟମରେ ସମୁଦ୍ର ଉପକୂଳରେ ଥିବା ୫୦ ହେକ୍ଟର ଝାଉଁ ଓ କାଜୁ ଜଙ୍ଗଲର ସୁରକ୍ଷା ଏଵଂ ରକ୍ଷଣାବେକ୍ଷଣ ନିମନ୍ତେ ପ୍ରଦାନ କରଯାଇଥିଲା । କିନ୍ତୁ ପରବର୍ତ୍ତୀ ସମୟରେ ଅଗସ୍ତି ନୂଆଗାଁ ବନ ସୁରକ୍ଷା ସମିତି ଅଧିନରେ ୫୦ ହେକ୍ଟର ଥିଲେ ବି, ଜଙ୍ଗଲ ସୁରକ୍ଷା ଦୃଷ୍ଟିରୁ ବନ ବିଭାଗ ନିକଟସ୍ଥ ନୋଳିଆ ନୂଆଗାଁ ଗ୍ରାମକୁ ୫୦ ହେକ୍ଟର ମଧ୍ୟରୁ ୨୪ ହେକ୍ଟର ଜଙ୍ଗଲକୁ ରକ୍ଷଣାବେକ୍ଷଣ ନିମନ୍ତେ ଦାୟିତ୍ଵ ଦେଇଥିଲେ । ଆଉ ଅବଶିଷ୍ଟାଂଶ ୨୬ ହେକ୍ଟର ଝାଉଁ ଓ କାଜୁ ଜଙ୍ଗଲକୁ ବହୁ ବର୍ଷ ଧରି ଅଗସ୍ତିନୂଆଗାଁ ଗ୍ରାମବାସୀଙ୍କ ଦ୍ୱାରା ପରିଚାଳିତ ବନ ସୁରକ୍ଷା ସମିତି ରକ୍ଷଣାବେକ୍ଷଣ କରିଆସୁଛି । କିନ୍ତୁ ୨୬ ହେକ୍ଟର ସରକାରୀ ଝାଉଁ ଓ କାଜୁ ଜଙ୍ଗଲକୁ ଲାଗି ଅଗସ୍ତିନୂଆଗାଁ ଗ୍ରାମର ୨୦ ଉର୍ଦ୍ଧରୁ ବେସରକାରୀ ଜଙ୍ଗଲ ଜମି ମାଲିକମାନଙ୍କ ଜମି ରହିଛି । ସଠିକ୍ ଭାବେ ସୀମା ନିର୍ଦ୍ଧାରଣ ହୋଇନଥିବା ହେବା ଫଳରେ ଦୀର୍ଘ ବର୍ଷ ଧରି ବେସରକାରୀ ଜମି ମାଲିକ ଓ ଅଗସ୍ତିନୂଆଗାଁ ବନ ସୁରକ୍ଷା ସମିତିଙ୍କ ମଧ୍ୟରେ ଅପ୍ରତିକର ପରିସ୍ଥିତି ସୃଷ୍ଟି ହୋଇଛି । ଅନେକ ସମୟରେ ଉଭୟଙ୍କ ମଧ୍ୟରେ ବଚସା ଓ ତିକ୍ତତା ପରିସ୍ଥିତି ସୃଷ୍ଟି ହୋଇଛି । ଏହି ସମସ୍ୟାକୁ ନେଇ ଗ୍ରାମ ବୈଠକରେ ଅଗସ୍ତି ନୂଆଗାଁ ଗ୍ରାମ୍ୟ କମିଟି, ବନ ସୁରକ୍ଷା ସମିତି ଓ ୨୦ରୁ ଉର୍ଦ୍ଧ ବେସରକାରୀ ଜମି ମାଲିକଙ୍କ ମଧ୍ୟରେ ତ୍ରିପାକ୍ଷିକ ଆଲୋଚନା କରାଯିବା ପରେ, ସରକାରୀ ଜଙ୍ଗଲ ଓ ବେସରକାରୀ ଜଙ୍ଗଲର ସ୍ଥାୟୀ ସୀମା ନିର୍ଦ୍ଧାରଣ କରିବା ପାଇଁ ଆଜି ଅଗସ୍ତି ନୂଆଗାଁ ଗ୍ରାମ୍ୟ କମିଟି ଜିଲ୍ଲାପାଳଙ୍କୁ ଭେଟି ଏକ ଦାବିପତ୍ର ପ୍ରଦାନ କରିଛନ୍ତି । ଦାବିପତ୍ର ପ୍ରଦାନ ବେଳେ ଅଗସ୍ତିନୂଆଗାଁ ଗ୍ରାମ୍ୟ କମିଟିର ସଭାପତି ରଜତ୍ କୁମାର ନାୟକ, ସମ୍ପାଦକ କାଳୀ ଚରଣ ଗୌଡ଼ ଓ କୋଷାଧ୍ୟକ୍ଷ ବିଜୟ କୁମାର ଗୌଡ଼, ସଦସ୍ୟ ତପନ କୁମାର ନାହାକ ପ୍ରମୁଖ ବହୁ ଗାଁ ଲୋକେ ଉପସ୍ଥିତି ଥିଲେ ।