- ଛାତ୍ରଛାତ୍ରୀଙ୍କୁ ନେଇ ବିରାଟ ସଚେତନତା ପଦଯାତ୍ରା ଅନୁଷ୍ଠିତ
ମୁରିବାହାଲ, (ଦୁର୍ଗାନନ୍ଦ ମହାକୁର) : ବଲାଙ୍ଗିର ଜିଲ୍ଲା ମୁରିବାହାଲ ଥାନା ପୁଲିସ ତଥା ମୁରିବାହାଲ ପଂଚାୟତ ସମିତି ଉଚ୍ଚ ମାଧ୍ୟମିକ ବିଦ୍ୟାଳୟ ଓ ଡ଼ିଗ୍ରୀ ମହାବିଦ୍ୟାଳୟର ଏନଏସଏସ ବିଭାଗ,ପଞ୍ଚାୟତି ଉଚ୍ଚ ବିଦ୍ୟାଳୟ ତଥା ବ୍ଲକ ଡ୍ରାଇଭର ମହାସଂଘର ମିଳିତ ସହଯୋଗରେ ଶୁକ୍ରବାର ଏକ ସଡ଼କ ସୁରକ୍ଷା ସଚେତନତା କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା । ମୁରିବାହାଲ ଥାନା ଆଇଆଇସି ସିପୋରା ସରାୟ ଲୁଗୁନଙ୍କ ପ୍ରତ୍ୟେକ୍ଷ ତତ୍ଵାବଧାନରେ ଅନୁଷ୍ଠିତ ଏହି କାର୍ଯ୍ୟକ୍ରମରେ ପ୍ରଥମେ ଏନଏସଏସ ସ୍ୱେଚ୍ଛାସେବୀମାନଙ୍କୁ ସଚେତନ କରାଯାଇଥିଲା । ଏହା ପରେ ଛାତ୍ରଛାତ୍ରୀମାନେ ଆଗାମୀ କାଲିର ନାଗରିକ ଏବଂ ସେମାନେ ହିଁ ଦେଶର ଉଜ୍ୱଳ ଭବିଷ୍ୟତ ଗଠନ କରିବାରେ ସହାୟକ ହେବେ ବୋଲି କହିବା ସହ ପ୍ରଥମେ ଏମାନଙ୍କଠାରୁ ହିଁ ସଚେତନତାର ଶୁଭାରମ୍ଭ କରିବା ବିଷୟରେ ସେ ବକ୍ତବ୍ୟ ପ୍ରଦାନ କରିଥିଲେ । ସଡକ ସୁରକ୍ଷାର ବାର୍ତ୍ତା କିପରି ସମସ୍ତଙ୍କ ପାଖରେ ପହଂଚି ପାରିବ ସେ ସମ୍ପର୍କରେ ସଚେତନ ପାଇଁ ହାଇସ୍କୁଲ୍ ଖେଳ ପଡିଆରୁ ପ୍ଲାକାର୍ଡ ଧରି ସମସ୍ତ ଛାତ୍ରଛାତ୍ରୀଙ୍କ ଏକ ବିରାଟ ସଚେତନତା ପଦଯାତ୍ରା ବାହାରିଥିଲା । ଏହା ଜଙ୍ଗଲ ବିଭାଗ ଡାକବଙ୍ଗଳା ପର୍ଯ୍ୟନ୍ତ ଯାଇ ଫେରିଥିଲା । ପଦଯାତ୍ରା ବେଳେ ରାସ୍ତାରେ ଯାଉଥିବା କାର୍, ମୋଟର ସାଇକେଲ୍, ଅଟୋ, ବସ୍ ଓ ଟ୍ରକ୍ ଆଦି ଗାଡିର ଚାଳକମାନଙ୍କୁ ସଡକ ସୁରକ୍ଷା ସମ୍ପର୍କରେ ସଚେତନ କରାଯାଇଥିଲା । ହେଲ୍ମେଟ୍ ପିନ୍ଧିଥିବା ଓ ସିଟ୍ବେଲ୍ଟ ଲଗାଇଥିବା ଆରୋହୀମାନଙ୍କୁ ଚକୋଲେଟ୍ ପ୍ରଦାନ କରିଥିବାବେଳେ ହେଲ୍ମେଟ୍ ପିନ୍ଧି ନଥିବା ଆରୋହୀମାନଙ୍କୁ ଫୁଲ ପ୍ରଦାନ କରି ସଚେତନ କରାଯାଇଥିଲା । ଏହି ସଡ଼କ ସୁରକ୍ଷା ସଚେତନତା କାର୍ଯ୍ୟକ୍ରମରେ ଉଚ୍ଚ ମାଧ୍ୟମିକ ବିଦ୍ୟାଳୟ କ୍ରୀଡା ଶିକ୍ଷକ ରାଧେକୃଷ୍ଣ ବଘାର, ହାଇସ୍କୁଲ କ୍ରୀଡା ଶିକ୍ଷକ ନୀତେଶ ତାଣ୍ଡି ଓ ଏନଏସଏସ ବିଭାଗ ସଂଯୋଜକ ଦାୟିତ୍ୱରେ ଥିବା ଶିକ୍ଷକ ଛନ୍ଦାଚରଣ ଖୁଣ୍ଟିଆ, ବିକ୍ରମ ତାଣ୍ଡି, ରେଡକ୍ରସ ପରାମର୍ଶଦାତା ଘନଶ୍ୟାମ ଖମାରୀ ଓ ସାଂସ୍କୃତିକ ବିଭାଗୀୟ ମୁଖ୍ୟ ଭ୍ରିଙ୍ଗରାଜ ରଣାଙ୍କ ସହ ସମସ୍ତ ଶିକ୍ଷକ ଉପସ୍ଥିତ ଥିଲେ । ଏଥିରେ ମୁରିବାହାଲ ଥାନା ଏସଆଇ ଦନାର୍ଦନ ଓରାମ, ପ୍ରମୋଦ କୁମାର ପଧାନ, ଏଏସଆଇ ସୁଶୀଲ କୁମାର ମହାପାତ୍ରଙ୍କ ସହ ସମସ୍ତ ଥାନା କର୍ମଚାରୀମାନଙ୍କ ସହିତ ଏନଏସଏସ ବିଭାଗର ସ୍ୱେଚ୍ଛାସେବୀ ଓ ଡ୍ରାଇଭରମାନେ ସମ୍ପୂର୍ଣ୍ଣ ସହଯୋଗ କରି ଲୋକଙ୍କୁ ସଚେତନ କରିଥିଲେ ।