ଧାନ ବୋଝେଇ ଟ୍ରକ ଧକ୍କାରେ ଯୁବକ ମୃତ : ଝାରବନ୍ଧ ପାଇକମାଲ ରାସ୍ତା ବନ୍ଦ

ପଦ୍ମପୁର, (ନିରୋଜ କୁମାର ପାଣୀ) : ପଦ୍ମପୁର ଉପଖଣ୍ଡ ପାଇକମାଲ ବ୍ଲକ ଝାରବନ୍ଧ ରାସ୍ତା ଚୁହାପାଲି ବ୍ରିଜ ପାଖରେ ଏକ ମର୍ମନ୍ତୁଦ ଟ୍ରକ ଦୁର୍ଘଟଣାରେ ଜଣେ ଯୁବକର ଅକାଳ ମୃତ୍ୟୁ ହୋଇଯାଇଛି । ମୃତକ ହେଲେ ଚୁହାପାଲି ଗ୍ରାମର ରାଜେଶ କୁମ୍ଭାର (୨୦) । ପ୍ରାପ୍ତ ବିବରଣୀରୁ ଜଣାପଡିଛି ଯେ ସୋମବାର ଓଡି ୧୫ସି୧୨୯୪ ନମ୍ବର ଟ୍ରକ ଝାରବନ୍ଧ ବ୍ଲକ ବିଳାସପୁର ଧାନମଣ୍ଡିରୁ ଧାନବସ୍ତା ଫୁଲ ଲୋଡ଼୍‌ କରି ପଦ୍ମପୁର ଅନ୍ନପୂର୍ଣ୍ଣା ରାଇସ ମିଲକୁ ଡ୍ରାଇଭର କୋଦଣ୍ଡ ଭୋଇ (୪୧)ଗାଡି ଚଲାଇ ନେଉଥିଲେ । ସେ ସମୟରେ ଚୁହାପାଲି ବ୍ରିଜ ପାର ହୋଇ ରାଜେଶ କୁମ୍ଭାର ଆସୁଥିବା ବେଳେ ଟ୍ରକ ଧକ୍କା ଦେଇ ଆଗକୁ ପଳାଇ ଯାଇଥିଲା । ଘଟଣା ସ୍ଥଳରେ ଯୁବକ ରାଜେଶ ମୃତ୍ୟୁ ବରଣ କରି ପଡି ଥିବାବେଳେ ଗ୍ରାମବାସୀ ଉକ୍ତ ଦୁର୍ଘଟଣା ଦେଖି ଟ୍ରକକୁ ଅଟକାଇ ପାଇକମାଲ ଝରବନ୍ଧ ରାସ୍ତାକୁ ଅବରୋଧ କରି ରାଜେଶଙ୍କ ପରିବାରକୁ ୧୦ ଲକ୍ଷ ଟଙ୍କା ଦେବା ପାଇଁ ଗ୍ରାମବାସୀ ଅଡ଼ି ବସିଥିଲେ । ପରେ ଗାଡି ମାଲିକ ଆଶ୍ୱାସନା ଦେଇ କ୍ଷତି ପୂରଣ ପାଇଁ ପରିବାରକୁ ଅନୁକମ୍ପା ରାଶି ସାହାଯ୍ୟ କରିବାରୁ ଲୋକେ ଧାରଣରୁ ଉଠି ଥିଲେ । ପାଇକମାଲ ପୋଲିସ ଓ ତହସିଲଦାର ସିନ୍ଧୁସୂତା ପାତ୍ର ମଧ୍ୟ ଘଟଣାସ୍ଥଳରେ ପହଞ୍ଚିଥିଲେ । ପରେ ଶବକୁ ବ୍ୟବଚ୍ଛେଦ ପାଇଁ ପଦ୍ମପୁର ପଠା ଯାଇଥିଲା । ମୃତ ରାଜେଶଙ୍କ ବାପା ବାସୁଦେବ କୁମ୍ଭାର ଏକ ଗରିବ ଶ୍ରେଣୀର ହୋଇଥିବାରୁ ତାଙ୍କୁ କିଛି ସରକାରୀ ସହାୟତା ମିଳୁ ବୋଲି ଗ୍ରାମବାସୀ ଦାବୀ କରିଛନ୍ତି ।