ରାଜ୍ୟସ୍ତରୀୟ ପାଣି ପଞ୍ଚାୟତ ପକ୍ଷ ପାଳନ କାର୍ଯ୍ୟକ୍ରମରେ ସମ୍ମାନୀତ ହେଲା ବଲାଙ୍ଗିର ଉଠା ଜଳସେଚନ ବିଭାଗ

ବଲାଙ୍ଗିର, (କେପିଏନ୍‌ଏସ୍‌) : ରାଜ୍ୟସ୍ତରୀୟ ପାଣି ପଞ୍ଚାୟତ ପକ୍ଷ ପାଳନ କାର୍ଯ୍ୟକ୍ରମରେ ସମ୍ମାନୀତ ହେଲା ବଲାଙ୍ଗିର ଜିଲ୍ଲା । ଭୁବନେଶ୍ୱର ସ୍ଥିତ ବିଜୁ ପଟ୍ଟନାୟକ ଖେଳପଡିଆ ଠାରେ ରାଜ୍ୟସ୍ତରୀୟ ପାଣି ପଞ୍ଚାୟତ ପକ୍ଷ ପାଳନ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା । ଏହି ଉତ୍ସବରେ ମୁଖ୍ୟ ଅତିଥି ଭାବରେ ମୁଖ୍ୟମନ୍ତ୍ରୀ ମୋହନ ମାଝୀ ଉପସ୍ଥିତ ଥିଲେ । ସମ୍ମାନୀତ ଅତିଥି ଭାବରେ ଉପମୁଖ୍ୟମନ୍ତ୍ରୀ କନକ ବର୍ଦ୍ଧନ ସିଂ ଦେଓ ଉପସ୍ଥିତ ଥିଲେ । ଏହି ଉତ୍ସବେ ଶ୍ରେଷ୍ଠ ପାଣି ପଞ୍ଚାୟତ, ଶ୍ରେଷ୍ଠ ଅଧିକାରୀ, ଶ୍ରେଷ୍ଠ ପ୍ରକଳ୍ପ ଓ କୃତୀ ଛାତ୍ରଛାତ୍ରୀମାନଙ୍କୁ ପୁରସ୍କୃତ କରାଯାଇଥିଲା । ବଲାଙ୍ଗିର ଜିଲ୍ଲାର ଶ୍ରେଷ୍ଠ ପାଣି ପଞ୍ଚାୟତ ଭାବରେ ଗୌଡଗୋଠ ମାଥନପଲା (କ୍ଷୁଦ୍ର ଜଳସେଚନ), ଶ୍ରେଷ୍ଠ ପ୍ରକଳ୍ପ ଉଠା ଜଳସେଚନ ତେନ୍ତୁଳିଖୁଣ୍ଟି, ଶ୍ରେଷ୍ଠ କୃଷକ ଭାବରେ ଗୁଡଭେଲାର ଚାଷୀ କାନ୍ତ ରଣା ଓ ଶ୍ରେଷ୍ଠ ତଥା ଦକ୍ଷ କୃଷି ଅଧିକାରୀ ଭାବରେ ଉଠା ଜଳସେଚନ ବିଭାଗର ନିର୍ବାହୀ ଯନ୍ତ୍ରୀ ସଚିତାନନ୍ଦ ଦଳାଇଙ୍କୁ ମୁଖ୍ୟମନ୍ତ୍ରୀ ଉପଢୌକନ, ମାନପତ୍ର ଓ ଟ୍ରଫି ପ୍ରଦାନ କରିଥିଲେ । ପୁରସ୍କୃତ ହେବାପରେ ସେମାନେ ଖୁସି ପ୍ରକାଶ କରିବା ସହିତ ରାଜ୍ୟ ସରକାରଙ୍କୁ ଧନ୍ୟବାଦ ଅର୍ପଣ କରିଥିଲେ । ଏହି ସମ୍ମାନ ଆମର ଉତ୍ସାହକୁ ଦ୍ୱିଗୁଣିତ କରିବ ଏବଂ ଆଗାମୀ ଦିନରେ ଚାଷୀଙ୍କ ବୃହତ୍ତର ସ୍ୱାର୍ଥ ପାଇଁ ଆମେ ଆହୁରି କାମ କରିବୁ ବୋଲି ନିର୍ବାହୀ ଯନ୍ତ୍ରୀ କହିଥିଲେ ।