ବଲାଙ୍ଗିର, (କେପିଏନ୍ଏସ୍) : ବଲାଙ୍ଗିର ଜିଲ୍ଲା ସଦର ବ୍ଲକ ଅନ୍ତର୍ଗତ ଶିବତଲା ଗ୍ରାମକୁ ବିଧାୟକ କଳିକେଶ ନାରାୟଣ ସିଂହଦେଓଙ୍କ ପରିଦର୍ଶନ କରିଥିଲେ । ବିଧାୟକ କଳିକେଶ ଶିବତଲା ଗ୍ରାମରେ ପହଞ୍ଚିବା ପରେ ଗ୍ରାମବାସୀଙ୍କ ତରଫରୁ ତାଙ୍କୁ ଭବ୍ୟ ସମ୍ବର୍ଦ୍ଧନା ଦିଆଯାଇଥିଲା । ଏହି ଅବସରରେ ଏକ ସଭାର ଆୟୋଜନ କରାଯାଇଥିଲା । ସଦର ବ୍ଲକ ଅଧ୍ୟକ୍ଷା ସରିତା ବାଗ, ଉପାଧ୍ୟକ୍ଷା ପୁଷ୍ପାଞ୍ଜଳି ହୋତା, ପୂର୍ବତନ ବ୍ଲକ ଅଧ୍ୟକ୍ଷ ଗୋଲପ ବାଗ, ପ୍ରଦ୍ୟୁମ୍ନ ହୋତା, ଛବିଳ ପୂଜାରୀ, ସରପଞ୍ଚ ଶୁଭକାନ୍ତି ବେହେରା ଓ ଅଶୋକ ମାଝୀଙ୍କ ନେତୃତ୍ୱରେ ହୋଇଥିବା ଏହି ସଭାରେ ଗ୍ରାମବାସୀ ଉପସ୍ଥିତ ଥିଲେ । ଗ୍ରାମବାସୀମାନେ ଗ୍ରାମର ବିଭିନ୍ନ ସମସ୍ୟା ସମ୍ପର୍କରେ ବିଧାୟକଙ୍କୁ ଜଣାଇଥିଲେ । ଗ୍ରାମର କଲ୍ୟାଣ ମଣ୍ଡପ, ପାନୀୟ ଜଳ ସମସ୍ୟା, ରାସ୍ତା ସମସ୍ୟା, ବିଜୁଳି ସମସ୍ୟା ସମ୍ପର୍କରେ ଜଣାଇବା ସହିତ ଏହାର ସମାଧାନ କରିବାକୁ ଦାବି କରିଥିଲେ । ଏହା ସହିତ ଏକ ନୂତନ ବ୍ଲକ ଗଠନ କରିବାକୁ ଦାବି କରିଥିଲେ । ଯେହେତୁ ଓଡ଼ିଶାରେ ଆହୁରି କିଛି ନୂଆ ବ୍ଲକ ଗଠନ କରିବାକୁ ଯୋଜନା ରହିଥିବା ସରକାର କହୁଥିବା ବେଳେ ବଲାଙ୍ଗିର ଜିଲ୍ଲାରେ ଏକ ନୂଆ ବ୍ଲକ ଗଠନ କରାଯାଉ ବୋଲି ଗ୍ରାମବାସୀ ଦାବି କରିଥିଲେ । ବିଧାୟକ କଳିକେଶ ସେମାନଙ୍କ ସମସ୍ୟା ଶୁଣି ତୁରନ୍ତ ତାର ସମାଧାନ କରିବାକୁ ବିଭାଗୀୟ ଅଧିକାରୀମାନଙ୍କୁ ନିର୍ଦ୍ଦେଶ ଦେଇଛନ୍ତି ଏବଂ ନୂତନ ବ୍ଲକ ଗଠନ ସମ୍ପର୍କରେ ସରକାରଙ୍କୁ ଜଣାଇବେ ବୋଲି ପ୍ରତିଶ୍ରୁତି ଦେଇଛନ୍ତି ।