ବଲାଙ୍ଗିର, (କେପିଏନ୍ଏସ୍) : ବଲାଙ୍ଗିର ସହର ଭିତରେ ଆହୁରି ଆହୁରି ବଢ଼ି ଚାଲିଛି ଚୋରଙ୍କ ଉତ୍ପାତ । ପୋଲିସର ତତ୍ପରତା ଯେତେ ବଢ଼ିଲେ ବି ଚୋରଙ୍କୁ ସାବାଡ଼୍ କରିବାରେ ସକ୍ଷମ ହୋଇ ପାରୁନଥିବା ଜଣାପଡ଼ୁଛି । ସ୍ଥାନୀୟ ଲାଲ୍ଟିକ୍ରା ଇରିଗେସନ୍ କଲୋନୀ ପଛପଟେ ରହିଥିବା ରଘୁନାଥନଗରରୁ ଗତରାତିରେ ଦୁଇଟି ଘରୁ ଚୋରି ହୋଇଥିବା ସୂଚନା ମିଳିଛି । ଚୋରମାନେ ଘରର ଝରକା ଭାଙ୍ଗି ଘରେ ପଶି ଘର ଭିତରେ କଳାକନା ବୁଲାଇ ଦେଇଥିବା ଦେଖିବାକୁ ମିଳିଛି । ସୂଚନା ଅନୁସାରେ ରଘୁନାଥନଗରରେ ରହୁଥିବା ମିତ୍ରଭାନୁ ମେହେରଙ୍କ ପରିବାର ଗତ ରାତିରେ ଗୋଟିଏ ବେଡ଼୍ରୁମ୍ରେ ଶୋଇଥିବା ବେଳେ ଅନ୍ୟ ଏକ ବେଡ଼୍ରୁମ୍ର ଝରକାରେ ରହିଥିବା ଗ୍ରିଲ୍ ତାଡ଼ି ଚୋରମାନେ ଘର ଭିତରକୁ ପଶିଥିଲେ ଓ ଘରେ ଥିବା ସୁନା ଗହଣା ସହ ନଗଦ ଟଙ୍କା ମଧ୍ୟ ଚୋରି କରି ନେଇଛନ୍ତି । ଘରର ଆସବାବ ପତ୍ର ଛିନ୍ଛତର କରି ଫିଙ୍ଗି ଫୋପାଡ଼ି ଦେଇଥିବା ଘର ମାଲିକ ମିତ୍ରଭାନୁ କହିଛନ୍ତି । ତେବେ ରଘୁନାଥନଗରର ଅନ୍ୟ ଜଣେ ନିବାସୀ ସୁରେଶ ବରିହାଙ୍କ ଘରୁ ମଧ୍ୟ ଗତରାତିରେ ଚୋରି ହୋଇଥିବା ଜଣାପଡ଼ିଛି । ତାଙ୍କ ଘରୁ ମଧ୍ୟ ଝରକାର ଗ୍ରିଲ୍ ତାଡ଼ି ଚୋରମାନେ ଘରେ ପଶିଥିବା ବେଳେ ଘର ଭିତରୁ କ’ଣ କ’ଣ ଚୋରି ହୋଇଛି ଏ ପର୍ଯ୍ୟନ୍ତ ଜଣାପଡ଼ିନାହିଁ । ଚୋରି ଘଟଣା ସଂପର୍କରେ ମିତ୍ରଭାନୁ ମେହେର ବଲାଙ୍ଗିର ଟାଉନ୍ ଥାନାରେ ଏତଲା ଦେଇ ସାରିଥିବା ବେଳେ ସୁରେଶ ବରିହା ଅନୁପସ୍ଥିତ ଥିବାରୁ ସେ ଏପର୍ଯ୍ୟନ୍ତ ଏତଲା ଦେଇ ନଥିବା ଜଣାପଡ଼ିଛି । ଅନ୍ୟପଟେ ପୁରୁଣା ପ୍ରାଇଭେଟ୍ ବସ୍ଷ୍ଟାଣ୍ଡ ପାଖ ଜଳାରାମ ମନ୍ଦିର ଗଳିରେ ରହିଥିବା ପ୍ରିନ୍ସ ମୋବାଇଲ୍ ଦୋକାନରୁ ମଧ୍ୟ ଗତ ରାତିରେ ଚୋରି ହୋଇଥିବା ସୂଚନା ମିଳିଛି । ବଲାଙ୍ଗିର ସହରରେ ଚୋରଙ୍କ ଉତ୍ପାତ ଶିଖର ଛୁଇଁଥିବା ବେଳେ ବଲାଙ୍ଗିର ପୋଲିସର ତଦନ୍ତ ଓ କାର୍ଯ୍ୟନୁଷ୍ଠାନ ଚୋରଙ୍କୁ ସାବାଡ୍ କରିବାରେ କେତେ ଦୂର ସକ୍ଷମ ହେଉଛି, ତାହା ଦେଖିବାକୁ ବାକି ରହିଲା ।
