ଦାରିଙ୍ଗବାଡ଼ି : ଦାରିଙ୍ଗବାଡ଼ି ଥାନା ଅଞ୍ଚଳ ଲକଟି ଛକ ନିକଟରେ ଗଞ୍ଜେଇ ଚୋରା ଚାଲାଣ ପାଇଁ ଗାଡ଼ି ଅପେକ୍ଷାରେ ରହିଥିବା ବେଳେ ଚାଲାଣକାରୀକୁ ପୋଲିସ ଚତୁରତାର ସହ କାବୁ କରିଥିବା ଜଣାପଡିଛି । ବସ୍ତା ଯୋଗେ ନିଆ ଯାଉଥିବା ୨୩ କିଲୋ ୧୫୦ ଗ୍ରାମ ଗଞ୍ଜେଇ ଜବତ ହୋଇଛି । ପୁଲିସ ତାଙ୍କୁ ଗିରଫ କରି କୋର୍ଟ ଚାଲାଣ କରିଥିବା ଦାରିଙ୍ଗବାଡ଼ି ଥାନା ଅଧିକାରୀ କୌଶିକ ମାଝୀ ସୂଚନା ଦେଇଛନ୍ତି । ଗିରଫ ବ୍ୟକ୍ତି ପଶ୍ଚିମବଙ୍ଗ ଦେବିପୁର ଅଞ୍ଚଳର ବାପି କର୍ମାକର ବୋଲି ଜଣାପଡ଼ିଛି । ସୂଚନା ଅନୁସାରେ, ଦାରିଙ୍ଗବାଡ଼ି ପୋଲିସ ବିଶେଷ ସୂତ୍ରରୁ ଖବର ପାଇ କାର୍ଯ୍ୟାନୁଷ୍ଠାନ ଆରମ୍ଭ କରିଥିଲା । ଥାନା ଅଧିକାରୀ କୌଶିକ ମାଝୀଙ୍କ ନିର୍ଦ୍ଦେଶକ୍ରମେ ଏଏସଆଇ ପି. ଶ୍ରୀନିବାସ ରାଓ, ସୁବାଷ ଚନ୍ଦ୍ର ବାଏକ ସମେତ ପୋଲିସ ଫୋର୍ସ ଲକଟି ଛକ ନିକଟରେ ଚଢ଼ାଉ କରି ୨୩ କିଲୋ ୧୫୦ ଗ୍ରାମ ଗଞ୍ଜେଇ ଜବତ କରିଥିଲା । ଏହା ସହ ଜଣକୁ ଗିରଫ କରିଥିଲା । ମାମଲା ନମ୍ବର ୧୯/୨୩ ରେ ରୁଜ୍ଜୁ କରି ପୋଲିସ ଏହାର ଅଧିକ ତଦନ୍ତ କରୁଥିବା ଜଣାପଡିଛି ।