ନୋଏଡା : ୟୁପିରୁ ଏକ ଆଶ୍ଚର୍ଯ୍ୟଜନକ ମାମଲା ସାମ୍ନାକୁ ଆସିଛି । ଏଠାରେ ଜଣେ ପ୍ରେମିକାଙ୍କ ଉପରେ ଅଭିଯୋଗ ହୋଇଛି ଯେ, ସେ ତାଙ୍କ ପ୍ରେମିକଙ୍କୁ ତାଙ୍କ ଘରକୁ ନିମନ୍ତ୍ରଣ କରି ଭାଇମାନଙ୍କ ସହିତ ମାଡ଼ ମାରିଥିଲେ । ଏହା ବ୍ୟତୀତ, ଏହି ପ୍ରେମିକା ଜଣକ ତାଙ୍କ ପ୍ରେମିକଙ୍କୁ ଜବରଦସ୍ତ ସଲଫାସ୍ ଟାବଲେଟ୍ ଖୁଆଇ ଦେଇଥିଲେ ।
ଏହି ବିଷୟ ଗୌତମ ବୁଦ୍ଧ ନାଗର ଜିଲ୍ଲାର ଦାଦ୍ରି ପୋଲିସ ଷ୍ଟେସନ ଅଂଚଳର । ମଙ୍ଗଳବାର ଦିନ ପୋଲିସ ଏହି ସୂଚନା ଦେଇଛି । ଯୁବକ ଜଣକ ଗୁରୁତର ଅବସ୍ଥାରେ ଡାକ୍ତରଖାନା ନିଆଯାଇଥିବା ବେଳେ ମଙ୍ଗଳବାର ରାତିରେ ତାଙ୍କର ମୃତ୍ୟୁ ହୋଇଥିବା ପୋଲିସ କହିଛି ।
ପୋଲିସ ଘଟଣାର ତଦନ୍ତ କରୁଛି ଏବଂ ଏହି ଘଟଣାରେ ଏକ ମାମଲା ରୁଜୁ ହୋଇଛି । ଅତିରିକ୍ତ ଡେପୁଟି କମିଶନର ଅଫ୍ ପୋଲିସ୍ (ତୃତୀୟ) ବିଶାଲ ପାଣ୍ଡେ କହିଛନ୍ତି ଯେ, ଦାଦ୍ରି ଅଞ୍ଚଳର ଅନଙ୍ଗପୁର ଗାଁର ବାସିନ୍ଦା ଗୌରବଙ୍କ ଚିନ୍ତି ଗାଁର ରିଙ୍କି ନାମକ ଜଣେ ଝିଅ ସହିତ ସମ୍ପର୍କ ଥିଲା ।
ସୂଚନା ଅନୁସାରେ ରିଙ୍କି ଗୌରବଙ୍କୁ ଫୋନ୍ କରି ତାଙ୍କ ଗାଁକୁ ଡାକିଲେ, ଯେଉଁଠାରେ ଉଭୟଙ୍କ ମଧ୍ୟରେ ଝଗଡା ହୋଇଥିଲା । ତା’ପରେ ପ୍ରେମିକା ଜଣକ ତାଙ୍କ ଭାଇ କୁନାଲ, ସାହିଲ ଆଦିଙ୍କୁ ଡାକିଲେ । ଶ୍ରୀ ପାଣ୍ଡେ କହିଛନ୍ତି ଯେ, ଗୌରବଙ୍କୁ ପ୍ରଥମେ ପ୍ରେମିକାର ଭାଇମାନେ ପ୍ରବଳ ମାଡ଼ ମାରିଥିଲେ ଏବଂ ପରେ ଜବରଦସ୍ତ ସଲଫାସ୍ ଟାବଲେଟ୍ ଖୁଆଇ ଦେଇଥିଲେ । ଗୌରବଙ୍କ ମୃତ୍ୟୁ ପରଠାରୁ ଅଭିଯୁକ୍ତମାନେ ଫେରାର୍ ଥିବା ବେଳେ ସେମାନଙ୍କ ସନ୍ଧାନ ଚାଲିଛି ।