- ଦୁର୍ଗା ପଣ୍ଡା
ମୁଁ ଯେ ନିର୍ଝର କିଛି ଅଶ୍ରୁର
କେଉଁ ପ୍ରଣୟ ପିଆସୀ ହୃଦୟର
ଆଜି ପରାଜିତ ଏକ ନାୟକ ମୁଁ
କେଉଁ ପରକୀୟା ପ୍ରୀତି କାହାଣୀର ।
ପ୍ରୀତି ହେଲା ପରେ ପ୍ରତାରଣା
ନିଜେ ବରି ନେଲି ସିନା ପରାଜୟ
ଆଜି କ୍ଲାନ୍ତ ଅବଶ ମନ ନେଇ
ଖାଲି ବଂଚିବା ହେଲା ଅଭିନୟ
ମୁଁ ଯେ ଅଶ୍ରୁଳ ଏକ ଶିଳାଲିପି
କେଉଁ ଜୀର୍ଣ୍ଣ, ଆହତ କୋଣାର୍କର ।
ତନ୍ଦ୍ରାହରା ମୋ ଆଖି ଦୁଇ
ଖୋଜେ ବିଭାବରୀ ତୁମ ପଥ ଚାହିଁ
ମୋର ପାଂଶୁଳ ମନ ଚଉହଦୀ
ଯେବେ ଆଶାବରୀ ଗାଏ ସାହାନାଇ
ମୁଁ ଯେ ତୃଷ୍ଣାର ଏକ ଅଭିଲିପି
କେଉଁ ମଝି ଦରିଆର ବତୀଘର । ।