ମୟୁରଭଞ୍ଜ କାକାବନ୍ଧ ଆଶ୍ରମ ସ୍କୁଲ ହଷ୍ଟେଲରେ ବାସି ଖାଦ୍ୟ ଖାଇ ୧୨ ବର୍ଷୀୟ ଛାତ୍ରଙ୍କ ମୃତ୍ୟୁ ଏବଂ ୧୦୦ରୁ ଅଧିକ ଅସୁସ୍ଥ ହେବା ଘଟଣାରେ ନିଜ ଆଡୁ ମାମଲା ରୁଜ୍ଜୁ କଲେ ଜାତୀୟ ମାନବାଧିକାର ଆୟୋଗ
- ଦୁଇ ସପ୍ତାହ ମଧ୍ୟରେ ଏହି ବିଷୟରେ ଏକ ବିସ୍ତୃତ ରିପୋର୍ଟ ପ୍ରଦାନ ଲାଗି ଓଡ଼ିଶା ମୁଖ୍ୟ ଶାସନ ସଚିବ ଏବଂ ମୟୁରଭଞ୍ଜର ପୋଲିସ ଅଧିକ୍ଷକଙ୍କୁ ନୋଟିସ୍ ଜାରି
- ଏହି ରିପୋର୍ଟରେ ତଦନ୍ତର ସ୍ଥିତି ଏବଂ ପୀଡିତଙ୍କ ସ୍ୱାସ୍ଥ୍ଯାବସ୍ଥା ସମ୍ପର୍କରେ ସୂଚନା ଲାଗି ନିର୍ଦ୍ଦେଶ
ନୂଆଦିଲ୍ଲୀ, (ପିଆଇବି) : ୧୪ ଏପ୍ରିଲ୍ ୨୦୨୬ରେ ଓଡ଼ିଶାର ମୟୂରଭଞ୍ଜ ଜିଲ୍ଲାର କାକାବନ୍ଧ ଆଶ୍ରମ ସ୍କୁଲର ହଷ୍ଟେଲରେ ବାସି ଖାଦ୍ୟ ଖାଇ ଜଣେ ୧୨ ବର୍ଷୀୟ ଛାତ୍ରଙ୍କ ମୃତ୍ୟୁ ଏବଂ ଶତାଧିକ ପିଲା ଅସୁସ୍ଥ ହେବା ସଂପର୍କିତ ଗଣମାଧ୍ୟମ ଖବର ଉପରେ ନିଜଆଡୁ ମାମଲା ରୁଜ୍ଜୁ କରିଛନ୍ତି ଜାତୀୟ ମାନବାଧିକାର ଆଯୋଗ (ଏନଏଚଆରସି)। ରିପୋର୍ଟ ଅନୁଯାୟୀ, ପୀଡିତ ରାଜ୍ୟ ସରକାରଙ୍କ ଅନୁସୂଚିତ ଜନଜାତି ଏବଂ ଅନୁସୂଚିତ ଜନଜାତି କଲ୍ୟାଣ ବିଭାଗ ଦ୍ୱାରା ପରିଚାଳିତ ଏହି ସ୍କୁଲର ୫ମ ଶ୍ରେଣୀର ଛାତ୍ର ଥିଲେ।
ଆୟୋଗ ଉଲ୍ଲେଖ କରିଛନ୍ତି ଯେ ଯଦି ଖବରଟି ସତ୍ୟ ହୋଇଥାଏ, ତେବେ ଏହା ପୀଡିତଙ୍କ ମାନବାଧିକାର ଉଲ୍ଲଂଘନ ନେଇ ଗମ୍ଭୀର ପ୍ରସଙ୍ଗ ଉଠାଇଥାଏ। ଫଳସ୍ୱରୂପ, ଆୟୋଗ ଓଡ଼ିଶା ସରକାରଙ୍କ ମୁଖ୍ୟ ସଚିବ ଏବଂ ମୟୂରଭଞ୍ଜର ପୋଲିସ ଅଧିକ୍ଷକଙ୍କୁ ନୋଟିସ୍ ଜାରି କରି ଦୁଇ ସପ୍ତାହ ମଧ୍ୟରେ ଏହି ବିଷୟରେ ଏକ ବିସ୍ତୃତ ରିପୋର୍ଟ ମାଗିଛନ୍ତି। ଏହି ରିପୋର୍ଟରେ ତଦନ୍ତର ବର୍ତ୍ତମାନର ସ୍ଥିତି ଏବଂ ପ୍ରଭାବିତ ଛାତ୍ରଛାତ୍ରୀଙ୍କ ସ୍ବାସ୍ଥ୍ୟାବସ୍ଥା ସଂପର୍କିତ ସୂଚନା ଅନ୍ତର୍ଭୁକ୍ତ କରିବାକୁ କୁହାଯାଇଛି।
୧୫ ଏପ୍ରିଲ୍ ୨୦୨୬ରେ ପ୍ରକାଶିତ ଗଣମାଧ୍ୟମ ରିପୋର୍ଟ ଅନୁଯାୟୀ, ପ୍ରାୟ ୬୭ ଜଣ ଛାତ୍ରଛାତ୍ରୀଙ୍କ ଅବସ୍ଥା ଗୁରୁତର ହେବା ପରେ ସେମାନଙ୍କୁ ବାରିପଦା ମେଡିକାଲ କଲେଜ ଏବଂ ହସ୍ପିଟାଲକୁ ସ୍ଥାନାନ୍ତର କରାଯାଇଥିଲା। ଆଉ ୪୧ ଜଣ ପିଲାଙ୍କୁ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଯାଇଛି ।