ଭୁବନେଶ୍ୱର, (ପିଆଇବି) : ବଲାଙ୍ଗିର ଜିଲ୍ଲାର ବଲାଙ୍ଗିର ରେଳ ଷ୍ଟେସନକୁ ‘ଅମୃତ ଭାରତ ଷ୍ଟେସନ ଯୋଜନା’ ଅଧୀନରେ ଏକ ଆଧୁନିକ ଏବଂ ଯାତ୍ରୀ-ଅନୁକୂଳ ରେଳ ଷ୍ଟେସନରେ ରୂପାନ୍ତରିତ କରାଯାଇଛି। ଏହା ମାନ୍ୟବର ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ଦୂରଦୃଷ୍ଟିକୁ ପ୍ରତିଫଳିତ କରୁଛି, ଯେଉଁଥିରେ ସ୍ଥାନୀୟ ପରମ୍ପରାକୁ ଅକ୍ଷୁର୍ଣ୍ଣ ରଖି ରେଳ ଷ୍ଟେସନଗୁଡ଼ିକୁ ବିଶ୍ୱସ୍ତରୀୟ, ଅନ୍ତର୍ଭୁକ୍ତ ଏବଂ ଭବିଷ୍ୟତ ପାଇଁ ପ୍ରସ୍ତୁତ ପରିବହନ କେନ୍ଦ୍ର ଭାବରେ ବିକଶିତ କରିବାର ଲକ୍ଷ୍ୟ ରଖାଯାଇଛି।
ପ୍ରାୟ ୨୦ କୋଟି ଟଙ୍କା ବ୍ୟୟରେ ପୁନନିର୍ମାଣ ଏହି ଉନ୍ନତ ବଲାଙ୍ଗୀର ଷ୍ଟେସନରେ ଆଧୁନିକ ଯାତ୍ରୀ ସୁବିଧା ସହିତ ପଶ୍ଚିମ ଓଡ଼ିଶାର ସମୃଦ୍ଧ ସାଂସ୍କୃତିକ ପରିଚୟର ମିଶ୍ରଣ ଦେଖିବାକୁ ମିଳୁଛି। ଏହି ପ୍ରକଳ୍ପ ଦ୍ୱାରା ରେଳ ସଂଯୋଗୀକରଣକୁ ଯଥେଷ୍ଟ ମଜଭୁତ କରିବା ସହ ଯାତ୍ରୀଙ୍କ ସୁବିଧା ବୃଦ୍ଧି ଏବଂ ଏହି ଅଞ୍ଚଳର ସାମାଜିକ-ଅର୍ଥନୈତିକ ବିକାଶରେ ସହାୟକ ହେବ ବୋଲି ଆଶା କରାଯାଉଛି।
ଷ୍ଟେସନକୁ ବ୍ୟାପକ ଭାବରେ ଉନ୍ନତ କରାଯାଇଛି, ଯେଉଁଥିରେ ଏକ ନୂତନ ଷ୍ଟେସନ ଭବନ , ବାଧାମୁକ୍ତ ପ୍ରବେଶ ପାଇଁ ଲିଫ୍ଟ ସୁବିଧା ସହ ୧୨ ମିଟର ଓସାରର ଫୁଟ୍ ଓଭର ବ୍ରିଜ୍ ଏବଂ ଗାଡ଼ି ଚଳାଚଳକୁ ସୁଗମ କରିବା ପାଇଁ ପ୍ରବେଶ ପଥକୁ ଚଉଡ଼ା କରାଯାଇଛି। ଅନ୍ୟାନ୍ୟ ପ୍ରମୁଖ ସୁଧାର ମଧ୍ୟରେ ଉନ୍ନତ ପ୍ଲାଟଫର୍ମ ଏବଂ ପ୍ଲାଟଫର୍ମ ସେଲ୍ଟର, ଅପଗ୍ରେଡ୍ ହୋଇଥିବା ଅପେକ୍ଷା ସ୍ଥଳୀ , ଆଧୁନିକ ଶୌଚାଳୟ ସୁବିଧା ଏବଂ ଯାତ୍ରୀଙ୍କ ସୁବିଧା ଓ ସହଜ ଯାତାୟାତ ପାଇଁ ଯାତ୍ରୀ ସୂଚନା ସଂକେତ ବ୍ୟବସ୍ଥା ରହିଛି।
ସୁଗମ ଯାତାୟାତ ପାଇଁ ସର୍କୁଲେଟିଂ ଏବଂ ପାର୍କିଂ ଅଞ୍ଚଳଗୁଡ଼ିକୁ ମଧ୍ୟ ସତର୍କତାର ସହ ନବୀକରଣ କରାଯାଇଛି। ଏହି ଅଞ୍ଚଳର ସାଂସ୍କୃତିକ ଐତିହ୍ୟକୁ ପାଳନ କରି, ଷ୍ଟେସନର ସ୍ଥାପତ୍ୟ ଡିଜାଇନରେ ବଲାଙ୍ଗୀରର ସମୃଦ୍ଧ ଐତିହ୍ୟରୁ ଅନୁପ୍ରାଣିତ ହୋଇ ସମ୍ବଲପୁରୀ ହସ୍ତତନ୍ତ, ପାରମ୍ପରିକ ଢୋକ୍ରା ଧାତୁ କଳା ଏବଂ ସ୍ୱତନ୍ତ୍ର ଆଦିବାସୀ କଳାର ମୋଟିଫ୍ଗୁଡ଼ିକୁ ଅନ୍ତର୍ଭୁକ୍ତ କରାଯାଇଛି।
ଏହି ମିଶ୍ରଣ ଷ୍ଟେସନକୁ ଏକ ସ୍ୱତନ୍ତ୍ର ସ୍ଥାନୀୟ ପରିଚୟ ଦେଇଛି, ଯାହା ଏହାକୁ ପଶ୍ଚିମ ଓଡ଼ିଶାର ଜୀବନ୍ତ ସାଂସ୍କୃତିକ ଆତ୍ମାକୁ ପ୍ରଦର୍ଶନ କରୁଥିବା ଏକ ପ୍ରବେଶ ପଥରେ ପରିଣତ କରିଛି। ବଲାଙ୍ଗୀର ରେଳ ଷ୍ଟେସନର ନବୀକରଣ ଭାରତୀୟ ରେଳବାଇର ସେହି ପ୍ରତିବଦ୍ଧତାକୁ ପ୍ରତିଫଳିତ କରୁଛି, ଯେଉଁଥିରେ କେବଳ ଯାତାୟାତ ପଏଣ୍ଟ ନୁହେଁ, ବରଂ ନିଜ ନିଜ ଅଞ୍ଚଳର ସଂସ୍କୃତି, ପରମ୍ପରା ଏବଂ ଆଶା ଆକାଂକ୍ଷାକୁ ପ୍ରଦର୍ଶନ କରୁଥିବା ଜୀବନ୍ତ ସର୍ବସାଧାରଣ ସ୍ଥାନ ସୃଷ୍ଟି କରିବା ପାଇଁ ଲକ୍ଷ୍ୟ ରଖାଯାଇଛି।
ଏହି ଉନ୍ନତ ଷ୍ଟେସନ ଜିଲ୍ଲାର ବ୍ୟାପକ ବାଣିଜ୍ୟିକ, ଶିକ୍ଷାଗତ ଏବଂ ପର୍ଯ୍ୟଟନ କ୍ଷେତ୍ର ପାଇଁ ସଂଯୋଗୀକରଣକୁ ବୃଦ୍ଧି କରି ଆଞ୍ଚଳିକ ଅଭିବୃଦ୍ଧି ପାଇଁ କାର୍ଯ୍ୟ କରିବ ବୋଲି ଆଶା କରାଯାଉଛି, ଯାହାଦ୍ୱାରା ପଶ୍ଚିମ ଓଡ଼ିଶାର ସାମଗ୍ରିକ ଅର୍ଥନୈତିକ ବିକାଶରେ ସହାୟକ ହେବ।
ବଲାଙ୍ଗୀର ରେଳ ଷ୍ଟେସନର ଏହି ରୂପାନ୍ତର ଭାରତୀୟ ରେଳବାଇର ବିଶ୍ୱସ୍ତରୀୟ ଭିତ୍ତିଭୂମି ପ୍ରଦାନ ଏବଂ ପ୍ରତ୍ୟେକ ଯାତ୍ରୀଙ୍କ ପାଇଁ ଏକ ନିରାପଦ, ସ୍ମାର୍ଟ ଏବଂ ଅଧିକ ଆରାମଦାୟକ ଯାତ୍ରା ଅଭିଜ୍ଞତା ପ୍ରଦାନ କରିବା ଦିଗରେ ଅନ୍ୟ ଏକ ଗୁରୁତ୍ୱପୂର୍ଣ୍ଣ ମାଇଲଖୁଣ୍ଟ ହୋଇଛି।
ଅମୃତ ଭାରତ ଷ୍ଟେସନ ଯୋଜନା ଅଧୀନରେ ପୁନଃବିକଶିତ ହେଉଥିବା ଓଡ଼ିଶାର 59ଟି ରେଳ ଷ୍ଟେସନ ମଧ୍ୟରୁ ବଲାଙ୍ଗୀର ରେଳ ଷ୍ଟେସନ ଅନ୍ୟତମ ଏବଂ ଏହା 17 ଜୁଲାଇ 2026 ରେ ମାନ୍ୟବର ପ୍ରଧାନମନ୍ତ୍ରୀଙ୍କ ଦ୍ୱାରା ଶୁଭ ଉଦଘାଟନ ହେବାକୁ ଥିବା 75ଟି ଷ୍ଟେସନ ମଧ୍ୟରୁ ଗୋଟିଏ ।