ରାଜେନ୍ଦ୍ର ବିଶ୍ୱବିଦ୍ୟାଳୟରେ ପ୍ରଥମ ସେମିଷ୍ଟାର ୟୁଜି ଓ ପିଜି ଛାତ୍ରଛାତ୍ରୀଙ୍କ ପାଇଁ ଓରିଏଣ୍ଟେସନ୍ କାର୍ଯ୍ୟକ୍ରମ ଅନୁଷ୍ଠିତ

ବଲାଙ୍ଗିର, (ଦେବାଶିଷ ମିଶ୍ର) : ରାଜେନ୍ଦ୍ର ବିଶ୍ୱବିଦ୍ୟାଳୟର ସମସ୍ତ ୧୮ଟି ବିଭାଗର ନୂତନ ଭାବେ ନାମଲେଖାଇଥିବା ପ୍ରଥମ ସେମିଷ୍ଟାର ସ୍ନାତକ (ୟୁଜି) ଓ ସ୍ନାତକୋତ୍ତର (ପିଜି) ଛାତ୍ରଛାତ୍ରୀଙ୍କ ପାଇଁ ଏକ ଦୁଇଦିନିଆ ଓରିଏଣ୍ଟେସନ୍ (ଆବିଶ୍ରାମ) କାର୍ଯ୍ୟକ୍ରମ ଆୟୋଜିତ ହୋଇଯାଇଛି । ଏହି କାର୍ଯ୍ୟକ୍ରମରେ କୁଳପତି ପ୍ରଫେସର ବିଭୂତି ଭୂଷଣ ମଲ୍ଲିକ ଅଧ୍ୟକ୍ଷତା କରିଥିଲେ । ପିଜି କାଉନସିଲ୍ ଆବାହକ (ଚେୟାରମ୍ୟାନ୍) ଡ. ପ୍ରତାପ କୁମାର ଦାଶ ଉପସ୍ଥିତ ଛାତ୍ରଛାତ୍ରୀମାନଙ୍କୁ ବିଶ୍ୱବିଦ୍ୟାଳୟର ‘ମାପଦଣ୍ଡ ଆଚରଣ ବିଧି’ ସମ୍ପର୍କରେ ଜଣାଇବା ସହ ବାଧ୍ୟତାମୂଳକ ୭୫% ପାଠପଢ଼ା ଉପସ୍ଥାନ, ରାଗିଂ ନିରୋଧୀ ପଦକ୍ଷେପ, ମାନସିକ ସ୍ୱାସ୍ଥ୍ୟ ସଚେତନତା, ହଷ୍ଟେଲ ନିୟମାବଳୀ ଏବଂ ସାଧାରଣ ଶିକ୍ଷାଗତ ଦାୟିତ୍ୱ ଉପରେ ଗୁରୁତ୍ୱାରୋପ କରିଥିଲେ । ଅନ୍ୟାନ୍ୟ ପ୍ରମୁଖ ଅଧିକାରୀମାନେ ଶିକ୍ଷାଦାନ ଓ ପରିଚାଳନା ସମ୍ବନ୍ଧୀୟ ବିବରଣୀ ପ୍ରଦାନ କରିଥିଲେ । ଉପ-ପରୀକ୍ଷା ନିୟନ୍ତ୍ରକ ଡ. ନରେନ୍ଦ୍ର କୁମାର ରାଉତ ପରୀକ୍ଷା ପଦ୍ଧତି ଓ ନିୟମାବଳୀ ବିଷୟରେ ବୁଝାଇଥିଲେ । ଉପ-ରେଜିଷ୍ଟ୍ରାର୍ ବିଶ୍ୱଜିତ୍ ବେହେରା ଶିକ୍ଷାଗତ ନିୟମାବଳୀ ସହ ପାଠ୍ୟକ୍ରମ-ସଂଲଗ୍ନ ଓ ଅତିରିକ୍ତ ପାଠ୍ୟକ୍ରମ ସୁଯୋଗ ବିଷୟରେ ବିସ୍ତୃତ ସୂଚନା ଦେଇଥିଲେ ଏବଂ ବିଭିନ୍ନ ବିଭାଗର ମୁଖ୍ୟ ଡ. ଜଗଜିତ୍ କାମିଲା ବୃତ୍ତି, ଡ. ବଂଶୀଧର ଦୀପ ଗ୍ରନ୍ଥାଗାର ଓ ଶ୍ରୀମତୀ ଦୀପ୍ତି ନାୟକ ଏନ୍.ଏସ୍.ଏସ୍. ସେମାନଙ୍କ ସମ୍ବନ୍ଧିତ ଶାଖାର ନିୟମ ଓ ସୁବିଧାସୁଯୋଗ ପ୍ରସ୍ତୁତ କରିଥିଲେ । ଅଧ୍ୟକ୍ଷୀୟ ଅଭିଭାଷଣ ଦେଇ ପ୍ରଫେସର ମଲ୍ଲିକ ଛାତ୍ରଛାତ୍ରୀମାନଙ୍କୁ ସେମାନଙ୍କର ଶାରୀରିକ ଓ ମାନସିକ ସୁସ୍ଥତାକୁ ପ୍ରାଥମିକତା ଦେବା ସହ କ୍ରମାଗତ ଭାବେ ବଦଳୁଥିବା ଜାତୀୟ ଓ ଆନ୍ତର୍ଜାତୀୟ କ୍ୟାରିୟର ଆହ୍ୱାନର ସାମ୍ନା କରିବା ପାଇଁ ଏକ ସ୍ପଷ୍ଟ ବ୍ୟକ୍ତିଗତ ଲକ୍ଷ୍ୟ ସ୍ଥିର କରିବାକୁ ଆହ୍ୱାନ ଦେଇଥିଲେ । ସେ ମଧ୍ୟ ଅନୁଷ୍ଠାନର ସାମ୍ପ୍ରତିକ ସଫଳତା ଓ ଆଗାମୀ ଯୋଜନାଗୁଡ଼ିକ ବିଷୟରେ ଆଲୋକପାତ କରିଥିଲେ । ଶେଷରେ ଶ୍ରୀମତୀ ଦୀପ୍ତି ନାୟକ ଧନ୍ୟବାଦ ଅର୍ପଣ କରିବା ପରେ କାର୍ଯ୍ୟକ୍ରମ ସଭାସାଙ୍ଗ ହୋଇଥିଲା ।