ଗାଜିଆବାଦ : ଉତ୍ତରପ୍ରଦେଶର ଗାଜିଆବାଦରେ ଜଣେ ଯୁବକଙ୍କୁ ପିଟିପିଟି ହତ୍ୟା କରିବା ଭଳି ଏକ ସମ୍ବେଦନଶୀଳ ମାମଲା ସାମ୍ନାକୁ ଆସିଛି । ହତ୍ୟାର ଶିକାର ହୋଇଥିବା ବ୍ୟକ୍ତି ଜଣକ ମୁସ୍ତାଫାବାଦ ନିବାସୀ ପରଭେଜ ବୋଲି ଜଣାପଡିଛି । ପରଭେଜଙ୍କୁ ମାଡ ମାରିବା ପରେ ଅଭିଯୁକ୍ତମାନେ ନିଜେ ପୋଲିସକୁ ଫୋନ କରିଥିଲେ ଏବଂ ପୋଲିସ ଘଟଣାସ୍ଥଳରେ ପହଞ୍ଚିବା ପରେ ଅଭିଯୁକ୍ତମାନେ କହିଥିଲେ ଯେ, ପରଭେଜ ଚୋରି କରିବା ପାଇଁ ଘରେ ପ୍ରବେଶ କରିଥିଲେ । ତେଣୁ ତାଙ୍କୁ ମାଡ ଦିଆଯାଇଥିଲା । ଅଭିଯୁକ୍ତଙ୍କଠାରୁ ମିଳିଥିବା ସୂଚନା ପରେ ପୋଲିସ ପହଞ୍ଚି ପରଭେଜଙ୍କୁ ଗାଜିଆବାଦ ସ୍ଥିତ ଏକ ହସ୍ପିଟାଲରେ ଭର୍ତ୍ତି କରିଥିଲା, ଯେଉଁଠାରେ ଚିକିତ୍ସା ସମୟରେ ପରଭେଜଙ୍କର ମୃତ୍ୟୁ ହୋଇଥିଲା । ମୃତ ପରଭେଜଙ୍କ ପିତା ତାଙ୍କ ପୁଅକୁ ହତ୍ୟା କରିଥିବା ଅଭିଯୋଗ କରିଥିଲେ, ଏହା ପରେ ପୋଲିସ ଅନୁସନ୍ଧାନ କରିଥିଲା ଏବଂ ମାମଲା ଅନ୍ୟ ଦିଗକୁ ଯାଇଥିଲା ।
ପୋଲିସ ଘଟଣାର ତଦନ୍ତ କରିବା ମାତ୍ରେ ଜାଣିବାକୁ ପାଇଲା ଯେ, ହତ୍ୟା ଚୋରି ସନ୍ଦେହରେ ନୁହେଁ ବରଂ ଅନ୍ୟ କୌଣସି କାରଣରୁ ହୋଇଛି । ପରଭେଜ ଏହି ହତ୍ୟାକାଣ୍ଡର ମୁଖ୍ୟ ଅଭିଯୁକ୍ତ ସଞ୍ଜୟଙ୍କ ଝିଅଙ୍କୁ ଜାଣିଥିଲେ । ପରଭେଜ ସଞ୍ଜୟଙ୍କ ଝିଅଙ୍କୁ ଭେଟିବାକୁ ଆସିଥିଲେ । ଏହି ସମୟରେ ପରିବାର ସଦସ୍ୟ ତାଙ୍କୁ ଧରି ବହୁତ ମାଡ ମାରିଥିଲେ । ମାଡ ମାରିବା ପରେ ପରଭେଜ ଚେତାଶୂନ୍ୟ ହୋଇପଡିଥିଲେ, ସଞ୍ଜୟ ଏବଂ ତାଙ୍କ ପରିବାର ସଦସ୍ୟମାନେ ଏହାକୁ ଚୋରି ମାମଲାର ରୂପ ଦେଇ ମାମଲା ରୁଜୁ କରିଥିଲେ ।