ମାନିଲା : ଆଜି ସକାଳେ ଫିଲିପାଇନ୍ସରେ ଦୁନିଆର ସବୁଠାରୁ ଶକ୍ତିଶାଳୀ ତୋଫାନ ଗୋନି ଧକ୍କା ଦେଇଛି । ଏହି କାରଣରୁ ପ୍ରବଳ ବର୍ଷା ଓ ପ୍ରବଳ ପବନ ଯୋଗୁଁ ଏପର୍ୟ୍ୟନ୍ତ ୪ ଜଣଙ୍କର ମୃତ୍ୟୁ ହୋଇଛି । ରାଜଧାନୀ ମାନିଲା ସମେତ ତୋଫାନ୍ର ରାସ୍ତାରେ ପଡ଼ିଥିବା ସ୍ଥାନରୁ ପ୍ରାୟ ୧୦ ଲକ୍ଷ ଲୋକଙ୍କୁ ସ୍ଥାନାନ୍ତର କରାଯାଇଛି । ମାନିଲାର ଅନ୍ତର୍ଜାତୀୟ ବିମାନବନ୍ଦରକୁ ମଧ୍ୟ ବନ୍ଦ କରିବାକୁ ନିର୍ଦ୍ଦେଶ ଦିଆଯାଇଛି ।
ସରକାରୀ ବିପର୍ୟ୍ୟୟ ମୁକାବିଲା ଏଜେନ୍ସିର ମୁଖ୍ୟ ରିକାର୍ଡୋ ଜାଲାଡ଼୍ କହିଛନ୍ତି ଯେ, ଅନେକ ଲୋକ ଅଛନ୍ତି ଯେଉଁମାନେ ତୋଫାନ ପରେ ବିପଦପୂର୍ଣ୍ଣ ଅଞ୍ଚଳରେ ଅଛନ୍ତି । ଆମେ ବଡ଼ ଧରଣର କ୍ଷତିର ଆଂଶକା କରୁଛୁ । ଘୂର୍ଣ୍ଣିବଳୟ ଗୋନି ସକାଳ ସମୟରେ ୨୨୫ କିଲୋମିଟର ବେଗରେ ପବନ ସହିତ କାଟାଡୁଆନିସ୍ ପ୍ରଦେଶକୁ ଆସିଥିଲା ଏବଂ ଏହି ପବନ ମଧ୍ୟ ହାରାହାରି ୨୮୦ କିଲୋମିଟର ବେଗରେ ଗତି କରିଥିଲା ।
ଏହି ଘୂର୍ଣ୍ଣିବଳୟ ବର୍ତ୍ତମାନ ମାନିଲା ସମେତ ଜନସଂଖ୍ୟା ଅଧିକ ଥିବା ପଶ୍ଚିମ ଅଞ୍ଚଳ ଆଡକୁ ଗତି କରୁଛି । ଏହା ସେଇ ଅଂଚଳ ଦେଇ ଗତି କରିବାକୁ ଯାଉଛି, ଯେଉଁ ଅଂଚଳରେ ଏକ ସପ୍ତାହ ପୂର୍ବରୁ ଝଡ଼ ତୋଫାନ ଦ୍ୱାରା କ୍ଷତିଗ୍ରସ୍ତ ହୋଇଥିଲା ଏବଂ ଅତି କମରେ ୨୨ ଜଣଙ୍କର ମୃତ୍ୟୁ ହୋଇଥିଲା । ଆଜିର ଝଡ଼ ତୋଫାନ ପରେ ଲୋକମାନେ ମୃତ୍ୟୁବରଣ କରିଥିବା ଖବର ମଧ୍ୟ ଆସିଛି ।
ଆଲବେ ପ୍ରଦେଶର ରାଜ୍ୟପାଳ ଅଲ ଫ୍ରାନ୍ସିସ୍ ବିଚାରା ବିପର୍ୟ୍ୟୟର ମୁକାବିଲା ପାଇଁ ବରିଷ୍ଠ ଅଧିକାରୀଙ୍କ ସହ ଏକ ବୈଠକରେ କହିଛନ୍ତି ଯେ, ମାୟନ୍ ଆଗ୍ନେୟଗିରିର ପ୍ରବାହରେ ତାଙ୍କ ପ୍ରଦେଶରେ ଅତି କମରେ ଦୁଇ ଜଣଙ୍କର ମୃତ୍ୟୁ ଘଟିଛି । ଏହାଦ୍ୱାରା ଗ୍ରାମବାସୀଙ୍କ ଜୀବନ ବିପଦରେ ପଡ଼ିଛି । ତେବେ ଅନ୍ୟ ଅଧିକାରୀମାନେ କହିଛନ୍ତି ଯେ, ସେମାନେ ଏହାର ତଦନ୍ତ ଜାରି ରଖିଛନ୍ତି । ଏହି ସଭା ଟେଲିଭିଜନରେ ପ୍ରସାରିତ ହୋଇଛି ।
ଆସନ୍ତା ୧୨ ଘଣ୍ଟା ମଧ୍ୟରେ ପ୍ରବଳ ପବନ ଏବଂ ପ୍ରବଳ ବର୍ଷା ହେବାର ପୂର୍ବାନୁମାନ କରିଛି ଫିଲିପାଇନ୍ସ ପାଣିପାଗ ବିଭାଗ । ବିଶେଷଜ୍ଞମାନେ କହିଛନ୍ତି ଯେ, ରବିବାର ବିଳମ୍ବିତ ରାତିରେ କିମ୍ବା ସୋମବାର ଆରମ୍ଭରେ ଅତି ଘଞ୍ଚ ଜନବହୁଳ ମାନିଲାରେ ଏହି ବାତ୍ୟା ମାନିଲା ପ୍ରଭାବ ପକାଇବ । ସବୁଠାରୁ ଖରାପ ପରିସ୍ଥିତିର ସାମ୍ନା କରିବାକୁ ସେ ଲୋକଙ୍କୁ ପ୍ରସ୍ତୁତ ହେବାକୁ କହିଛନ୍ତି ।