ନୂଆଦିଲ୍ଲୀ : ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ରୁଷର ରାଷ୍ଟ୍ରପତି ଭ୍ଲାଦିମିର ପୁତିନ ସୋମବାର ଦିନ ନୂଆଦିଲ୍ଲୀରେ ସାକ୍ଷାତ କରି ଆଞ୍ଚଳିକ ତଥା ବିଶ୍ୱ ସ୍ତରୀୟ ବିକାଶ ସହିତ ମହାମାରୀ ପରେ ଆଫଗାନିସ୍ତାନର ପରିସ୍ଥିତି ଉପରେ ଆଲୋଚନା କରିଛନ୍ତି । ଏକ ଉଚ୍ଚ ସ୍ତରୀୟ ପ୍ରତିନିଧିଙ୍କ ସହ ପୁତିନ ଏକବିଂଶତମ ଭାରତ-ରୁଷ ବାର୍ଷିକ ସମ୍ମିଳନୀ ପାଇଁ ନୂଆଦିଲ୍ଲୀ ଗସ୍ତ କରିଛନ୍ତି । ୨୦୨୨ରେ ୨୨ତମ ଭାରତ-ରୁଷ ବାର୍ଷିକ ସମ୍ମିଳନୀ ପାଇଁ ସେ ମୋଦୀଙ୍କୁ ରୁଷ ପରିଦର୍ଶନ କରିବାକୁ ଆମନ୍ତ୍ରଣ କରିଥିଲେ । ନିମ୍ନଲିଖିତ ପ୍ରସଙ୍ଗରେ ଦୁଇ ନେତାଙ୍କ ମଧ୍ୟରେ ଆଲୋଚନା ହୋଇଥିଲା ।
କୋଭିଡ଼ ମହାମାରୀର ଆହ୍ୱାନ ସତ୍ୱେ ଦୁଇ ଦେଶ ମଧ୍ୟରେ ସ୍ୱତନ୍ତ୍ର ତଥା ସୁବିଧାଜନକ ରଣନୀତିକ ଭାଗିଦାରୀ ଜାରି ରହିଥିବା ଅଗ୍ରଗତିରେ ଦୁଇ ନେତା ସନ୍ତୋଷ ବ୍ୟକ୍ତ କରିଛନ୍ତି । ବୈଦେଶିକ ଏବଂ ପ୍ରତିରକ୍ଷା ମନ୍ତ୍ରୀଙ୍କ ୨ + ୨ ସଂଳାପର ପ୍ରଥମ ବୈଠକ ଏବଂ ନୂଆଦିଲ୍ଲୀରେ ସାମରିକ ଏବଂ ସାମରିକ-ବୈଷୟିକ ସହଯୋଗ ଉପରେ ଆନ୍ତଃସରକାରୀ ଆୟୋଗର ବୈଠକକୁ ସେମାନେ ସ୍ୱାଗତ କରିଛନ୍ତି ।
ନେତାମାନେ ଅଧିକ ଅର୍ଥନୈତିକ ସହଯୋଗର ଆବଶ୍ୟକତା ଉପରେ ଆଲୋକପାତ କରିଥିଲେ ଏବଂ ଏହି ପରିପ୍ରେକ୍ଷୀରେ ଦୀର୍ଘମିଆଦି, ପୂର୍ବାନୁମାନଯୋଗ୍ୟ ଏବଂ ସ୍ଥାୟୀ ଅର୍ଥନୈତିକ ସହଯୋଗ ପାଇଁ ଅଭିବୃଦ୍ଧିର ନୂତନ ଚାଳକ ଉପରେ ଗୁରୁତ୍ୱାରୋପ କରିଥିଲେ । ପାରସ୍ପରିକ ବିନିଯୋଗର ସଫଳତାର କାହାଣୀକୁ ସେମାନେ ପ୍ରଶଂସା କରିବା ସହ ପରସ୍ପରର ଦେଶରେ ଅଧିକ ପୁଂଜି ବିନିଯୋଗ ପାଇଁ ଆଗ୍ରହ ପ୍ରକାଶ କରିଛନ୍ତି ।
ଆନ୍ତର୍ଜାତୀୟ ଉତ୍ତର-ଦକ୍ଷିଣ ପରିବହନ କରିଡର ଏବଂ ପ୍ରସ୍ତାବିତ ଚେନ୍ନାଇ-ଭ୍ଲାଡିଭୋଷ୍ଟୋକ ପୂର୍ବାଞ୍ଚଳ ସାମୁଦ୍ରିକ କରିଡର ମାଧ୍ୟମରେ ସଂଯୋଗର ଭୂମିକା ଉପରେ ଆଲୋଚନା କରାଯାଇଥିଲା । ଏହି ଦୁଇ ନେତା ଭାରତର ରାଜ୍ୟଗୁଡିକ ସହିତ, ରୁଷର ବିଭିନ୍ନ ଅଂଚଳରେ ବିଶେଷକରି ରୁଷର ଦୂର ପୂର୍ବ ସହିତ ଅଧିକ ଆନ୍ତ ଆଂଚଳିକ ସହଯୋଗ ପାଇଁ ଆଗ୍ରହ ପ୍ରକାଶ କରିଥିଲେ ।
କୋଭିଡ଼ ମହାମାରୀ ବିରୋଧରେ ଲଢେ଼ଇରେ ଚାଲିଥିବା ଦ୍ୱିପାକ୍ଷିକ ସହଯୋଗକୁ ସେମାନେ ପ୍ରଶଂସା କରିଥିଲେ, ଆବଶ୍ୟକ ସମୟରେ ଦୁଇ ଦେଶ ପରସ୍ପରକୁ ପ୍ରଦାନ କରୁଥିବା ମାନବିକ ସହାୟତା ସହିତ । ନେତାମାନେ ଆଞ୍ଚଳିକ ତଥା ବିଶ୍ୱ ସ୍ତରୀୟ ବିକାଶ ଉପରେ ଆଲୋକପାତ କରିଥିଲେ, ଯାହା ମହାମାରୀର ପରବର୍ତ୍ତୀ ବିଶ୍ୱ ଅର୍ଥନୈତିକ ପୁନରୁଦ୍ଧାର ଏବଂ ଆଫଗାନିସ୍ତାନର ସ୍ଥିତିକୁ ନେଇ ଆଲୋଚନା ହୋଇଥିଲା ।
ସେମାନେ ସହମତ ହୋଇଥିଲେ ଯେ ଆଫଗାନିସ୍ତାନ ଉପରେ ଦୁଇ ଦେଶ ସମାନ ଦୃଷ୍ଟିକୋଣ ଏବଂ ଚିନ୍ତାଧାରା ବାଣ୍ଟିଛନ୍ତି ଏବଂ ଆଫଗାନିସ୍ତାନ ଉପରେ ପରାମର୍ଶ ଏବଂ ସହଯୋଗ ପାଇଁ ଏନ୍ଏସ୍ଏ ସ୍ତରରେ ପ୍ରସ୍ତୁତ ଦ୍ୱିପାକ୍ଷିକ ରୋଡମ୍ୟାପକୁ ପ୍ରଶଂସା କରିଛନ୍ତି । ସେମାନେ ଦର୍ଶାଇଛନ୍ତି ଯେ, ଉଭୟ ଆନ୍ତର୍ଜାତୀୟ ପ୍ରସଙ୍ଗରେ ଉଭୟ ପକ୍ଷ ସମାନ ଦୃଷ୍ଟିକୋଣ ବାଣ୍ଟିଛନ୍ତି ଏବଂ ମିଳିତ ଜାତିସଂଘ ସୁରକ୍ଷା ପରିଷଦ ସମେତ ବହୁପକ୍ଷୀୟ ଫୋରମରେ ସହଯୋଗକୁ ଆହୁରି ମଜବୁତ କରିବାକୁ ସହମତ ହୋଇଛନ୍ତି । ମିଳିତ ଜାତିସଂଘ ସୁରକ୍ଷା ପରିଷଦର ଅଣସ୍ଥାୟୀ ସଦସ୍ୟତା ଏବଂ ୨୦୨୧ ମସିହାରେ ବ୍ରିକ୍ସର ସଫଳ ଅଧ୍ୟକ୍ଷତା ପାଇଁ ପୁତିନ ମୋଦୀଙ୍କୁ ଅଭିନନ୍ଦନ ଜଣାଇଥିବା ବେଳେ ପ୍ରଧାନମନ୍ତ୍ରୀ ମୋଦୀ ପୁତିନଙ୍କୁ ଆର୍କଟିକ୍ କାଉନସିଲ୍ର ସଭାପତି ଭାବରେ ଅଭିନନ୍ଦନ ଜଣାଇଛନ୍ତି ।