କଳାହାଣ୍ଡି, (ପି.କେ. ସାହୁ) : କଳାହାଣ୍ଡି ଜିଲ୍ଲା କୋକସରା ବ୍ଲକ କନ୍ଦାବୁଟ୍ରା ପଞ୍ଚାୟତ ତୁନଗାଁ ଗ୍ରାମର ୫ ନମ୍ବର ୱାର୍ଡର ୧୨୨୮ ଭୋଟର ଆଜି ପଞ୍ଚାୟତ ନିର୍ବାଚନରେ ଭୋଟ୍ ବର୍ଜନ କରିଥିବା ଜଣାପଡିଛି । ସୂଚନା ଅନଚସାରେ ୨୦୧୫ରେ କାଶିବାହାଲ ପଞ୍ଚାୟତରୁ କନ୍ଦାବୁତ୍ରା ପଞ୍ଚାୟତ ବିଭାଜନ ହୋଇଥିଲା । ସେହି ସମୟରେ ନୂତନ ପଞ୍ଚାୟତ କାର୍ଯ୍ୟାଳୟ ତୁନଗାଁରେ ସ୍ଥାପନ ହେବା ପାଇଁ କନ୍ଦାବୁତ୍ରା ଓ ତୁନ ଗାଁ ଗ୍ରାମବାସୀଙ୍କ ମଧ୍ୟରେ ଚୁକ୍ତିନାମା ହୋଇଥିଲା । ହେଲେ ଚୁକ୍ତିକୁ ଅଣଦେଖା କରି ନୂତନ ପଞ୍ଚାୟତ କାର୍ଯ୍ୟାଳୟ କନ୍ଦାବୁଟ୍ରାରେ ନିର୍ମାଣ ହେଉଥିବାରୁ ଏହାକୁ ପ୍ରତିବାଦ କରି ତୁନଗାଁର ଜନସାଧାରଣ ଅନେକ ସମୟରେ ଜିଲ୍ଲା ପ୍ରଶାସନ ବ୍ଲକ ପ୍ରଶାସନ ସ୍ଥାନୀୟ ନେତା ମନ୍ତ୍ରୀଙ୍କୁ ବାରମ୍ବାର ଲିଖିତ ଅଭିଯୋଗ କରି ଆସୁଛନ୍ତି । ହେଲେ ୫ ବର୍ଷ ପରେ ମଧ୍ୟ କୌଣସି ସମାଧାନ ନହେବାରୁ ଏହି ମାମଲା କୋର୍ଟ ପର୍ୟ୍ୟନ୍ତ ମଧ୍ୟ ପହଞ୍ଚିଥିବା ବେଳେ ତୁନଗାଁ ଗ୍ରାମର ୫ ନମ୍ବର ୱାର୍ଡର ୧୨୨୮ ଭୋଟର ଆଜି ଭୋଟ୍ ବର୍ଜନ କରିଥିବା ଜଣାପଡିଛି । ଘଟଣାସ୍ଥଳରେ ପ୍ରଶାସନ ପହଞ୍ଚି ଗ୍ରାମବାସୀଙ୍କ ସହ ଆଲୋଚନା କରିଥିଲେ ମଧ୍ୟ ଗ୍ରାମବାସୀମାନେ ନିଜ ଜିଦ୍ରେ ଅଟଳ ରହିଥିବା ଜଣାପଡିଛି ।