ବଲାଙ୍ଗିର, (ଦେବାଶିଷ ମିଶ୍ର) : ସ୍ଥାନୀୟ ରେଲୱେ ଷ୍ଟେସନ ରୋଡ଼୍ ନିବାସୀ ବରିଷ୍ଠ ଆଇନଜୀବୀ ଶ୍ରୀକାନ୍ତ ପଟ୍ଟନାୟକଙ୍କ ଦେହାନ୍ତ ହୋଇଯାଇଥିବା ସୂଚନା ମିଳିଛି । କିଛି ଦିନ ହେଲା ସେ ପ୍ରୋଷ୍ଟେଡ୍ କ୍ୟାନ୍ସର୍ ରୋଗରେ ପୀଡ଼ିତ ଥିଲେ । ଆଜି ସକାଳ ୮ଟା ସମୟରେ ତାଙ୍କ ପରଲୋକ ହୋଇଥିବା ଜଣାପଡ଼ିଛି । ମିଷ୍ଟଭାଷୀ, ପରୋପକାରୀ ତଥା ମେଳାପୀ ସ୍ୱର୍ଗତ ପଟ୍ଟନାୟକ ନୂଆ ଆଇନଜୀବୀମାନଙ୍କ ପାଇଁ ପଥ ପ୍ରଦର୍ଶକ ଥିଲେ । ଏଣୁ ସେ ଓକିଲ ଜଗତରେ ବେଶ୍ ସୁନାମ ଅର୍ଜନ କରିଥିଲେ । ତାଙ୍କ ଦେହାନ୍ତରେ ଆଇନଜୀବୀ ଜଗତରେ ଶୋକର ଛାୟା ଖେଳିଯାଇଛି । ତାଙ୍କ ମୃତ୍ୟୁ ଖବର ପାଇବା ପରେ ବଲାଙ୍ଗିର ବାର୍ ଏସୋସିଏସନ୍ ପକ୍ଷରୁ ତୁରନ୍ତ ଏକ କାର୍ଯ୍ୟକାରୀ କମିଟି ବୈଠକ ଡକାଯାଇ ସଭାପତି ପ୍ରବୀଣ କୁମାର ମିଶ୍ରଙ୍କ ଅଧ୍ୟକ୍ଷତାରେ ଅନୁଷ୍ଠିତ ଶୋକସଭାରେ ଗଭୀର ଶୋକ ପ୍ରକାଶ କରାଯାଇଥିବା ଜଣାପଡ଼ିଛି । ଏହି ଶୋକସଭାରେ ସଭାପତି ଶ୍ରୀ ମିଶ୍ରଙ୍କ ସହ ସାଧାରଣ ସଂପାଦକ ଅମନ ନାଗ ତଥା ସମସ୍ତ କାର୍ଯ୍ୟକାରୀ କମିଟି ସଦସ୍ୟ ଉପସ୍ଥିତ ରହି ସ୍ୱର୍ଗତ ଶ୍ରୀକାନ୍ତ ପଟ୍ଟନାୟକଙ୍କ ଉଦ୍ଦେଶ୍ୟରେ ଅଶ୍ରୁଳ ସ୍ମୃତିତର୍ପଣ କରିଛନ୍ତି । ସଭାପତି ଶ୍ରୀ ମିଶ୍ର ଏଭଳି ଦୁଃଖଦ ସମୟରେ ସ୍ୱର୍ଗତ ପଟ୍ଟନାୟକଙ୍କ ପରିବାରବର୍ଗକୁ ସମବେଦନା ଜଣାଇବା ସହ ଅମର ଆତ୍ମାର ସଦ୍ଗତି କାମନା କରିଛନ୍ତି ।