ବୌଦ୍ଧ, (ବଂଶୀଧର ମାଝୀ) : ବୌଦ୍ଧ ଥାନା ଅନ୍ତର୍ଗତ ପଦ୍ମପୁର୍ ପଞ୍ଚାୟତର ମକୁନ୍ଦପୁର୍ ଗ୍ରାମରେ ରବିବାର ବିଳମ୍ବିତ ରାତିରେ ଏକ ଅଭାବନୀୟ ଘଟଣା ଘଟିଛି । ମିଳିଥିବା ସୂଚନା ଅନୁଯାୟୀ କଣ୍ଟାମାଳ ବ୍ଲକ ଥାଟିପାଲି ଗ୍ରାମର ବୁଲୁ ମହାନନ୍ଦିଆ, ଗମ୍ଭାରୀ ପଦର ଗ୍ରାମର ପ୍ରମୋଦ ମହାନନ୍ଦିଆ ଓ ଜାଲ କୁମ୍ଭାର ରାତି ପ୍ରାୟ ୨ଟା ସମୟରେ ମକୁନ୍ଦପୁର୍ ଗ୍ରାମ ନୂଆସାହି ହରିଜନପଡାର ରମେଶ ମହାନନ୍ଦିଆଙ୍କ ଘରକୁ ଆସିଥିଲେ ।
ଏହି ସମୟରେ ପଦାକୁ ବାହାରିଥିବା ସେହିପଡାର ପଞ୍ଚାନନ କଲତା ସେମାନଙ୍କୁ ଦେଖି ଏତେ ରାତିରେ ତୁମେମାନେ ଆମ ପଡାକୁ କାହିଁକି ଆସିଛ ବୋଲି ପଚାରି ଦେବାରୁ ଏତିକି କଥାରେ ଉତ୍ୟକ୍ତ ହୋଇ ବୁଲୁ ମହାନନ୍ଦିଆ ଏକ ବ୍ଲେଡରେ ପଞ୍ଚାନନ କଲତାଙ୍କୁ ଅତର୍କିତ ଭାବେ ଆକ୍ରମଣ କରିବାରୁ ତାଙ୍କର ପେଟର ଅନ୍ତବୁଜୁଳା ବାହାରି ପଡିଥିଲା ।
ସେ ପ୍ରାଣ ବିକଳରେ ପାଟି କରିବାରୁ ପାଟିଶୁଣି ପଡାବାସୀ ଆକ୍ରମଣକାରୀ ବୁଲୁକୁ କାବୁକରି ନେଇଥିଲେ । ମାତ୍ର ସାଙ୍ଗରେ ଆସିଥିବା ଅନ୍ୟ ଦୁଇଜଣ ଅନ୍ଧାର ରାତିର ସୁଯୋଗ ନେଇ କୌଶଳକ୍ରମେ ଫେରାର ମାରିବାକୁ ସକ୍ଷମ ହୋଇଥିଲେ । ଖବରପାଇ ଜହ୍ନାପଙ୍କ ଫାଣ୍ଡି ପୋଲିସ ଘଟଣାସ୍ଥଳରେ ପହଞ୍ଚି ବୁଲୁ ମହାନନ୍ଦିଆଓ ରମେଶ ମହାନନ୍ଦିଆକୁ ଥାନାକୁ ଆଣି ଅଟକ ରଖି ପଚରା ଉଚରା ଜାରି ରଖିଛି ।
ଅନ୍ୟପଟେ ଗୁରୁତର ଆହତ ପଞ୍ଚାନନଙ୍କୁ ପ୍ରଥମେ ବୌଦ୍ଧ ମୁଖ୍ୟ ଚିକିତ୍ସାଳୟକୁ ଅଣା ଯାଇଥିଲା ମାତ୍ର ତାଙ୍କର ଅବସ୍ଥା ସଂକଟାପନ୍ନ ଥିବାରୁ ସେଠାରୁ ବୁର୍ଲା ଭୀମସାର ମେଡିକାଲକୁ ସ୍ଥାନାନ୍ତର କରାଯାଇଥିବା ଜଣାପଡିଛି । ପୋଲିସ୍ ଘଟଣାର ତଦନ୍ତ କରୁଥିବା ଫାଣ୍ଡି ଅଧିକାରୀ ମମତା ହେମ୍ବ୍ରମ ସୂଚନା ଦେଇଛନ୍ତି ।
