ବରଗଡ, (ନିରୋଜ କୁମାର ପାଣୀ) : ପଶ୍ଚିମ ଓଡ଼ିଶାର ମାଟିରେ ଧର୍ମ, ପରମ୍ପରା ଓ ଲୋକବିଶ୍ୱାସର ଅନନ୍ୟ ସମନ୍ୱୟ ହେଉଛି ଅନନ୍ତ ନାରାୟଣୀ ପୂଜା । ଭକ୍ତିର ଦୀପଶିଖା, ଶଙ୍ଖଧ୍ୱନି ଓ ଆଧ୍ୟାତ୍ମିକ ପରିବେଶ ମଧ୍ୟରେ ବରଗଡ଼ ଜିଲ୍ଲାର ବିଜେପୁର ଅଞ୍ଚଳ ଏବେ ଅନନ୍ତ ନାରାୟଣଙ୍କ ଆରାଧନାରେ ଉତ୍ସବମୁଖର ହୋଇଉଠିଛି । ବିଜେପୁରର ଉପର ମେହେରପଡ଼ା (ଖ), ଉପର ମେହେରପଡ଼ା (କ), ମଧ୍ୟପଡ଼ା, ମାଲପଡ଼ା, ଗାନ୍ଧୀପଡ଼ା, ତଳିପଡ଼ା, ଭୋଏଟିକିରା ଓ ଭୋଏଟିକିରା ଡେଲି ମାର୍କେଟ ଅଞ୍ଚଳରେ ଅନନ୍ତ ନାରାୟଣ ପୂଜା ଅବସରରେ ବିଭିନ୍ନ ପୂଜା ମେଢ଼କୁ ଆକର୍ଷଣୀୟ ଭାବେ ସଜାଯାଇଛି । ମେଢ଼ଗୁଡ଼ିକରେ ଭଗବାନ ବିଷ୍ଣୁଙ୍କ ଅନନ୍ତ ରୂପ ଶ୍ରଦ୍ଧାଳୁଙ୍କ ମନରେ ଭକ୍ତି ଓ ଆଧ୍ୟାତ୍ମିକ ଚେତନା ସୃଷ୍ଟି କରୁଛି । ଭକ୍ତମାନେ ଭଗବାନ ଅନନ୍ତ ନାରାୟଣଙ୍କ ଦର୍ଶନ କରି ସୁଖ, ଶାନ୍ତି ଓ ସମୃଦ୍ଧି ପାଇଁ ପ୍ରାର୍ଥନା କରୁଛନ୍ତି । ଏହି ଭକ୍ତିମୟ ପରିବେଶ ମଧ୍ୟରେ ବରଗଡ଼ ଲୋକସଭା କ୍ଷେତ୍ରର ସାଂସଦ ପ୍ରଦୀପ ପୁରୋହିତ ବିଜେପୁରର ବିଭିନ୍ନ ପୂଜା ମେଢ଼ ପରିଦର୍ଶନ କରିଥିଲେ । ପ୍ରଥମେ ସେ ସ୍ଥାନୀୟ ଓଲ୍ଡ ଇଚ୍ ଗୋଲ୍ଡ ପୂଜା ମେଢ଼ ପରିଦର୍ଶନ କରି ଭଗବାନ ଅନନ୍ତ ନାରାୟଣଙ୍କ ଦର୍ଶନ ଲାଭ କରିଥିଲେ । ପରେ ବିଭିନ୍ନ ପୂଜା ମେଢ଼କୁ ଯାଇ ଭକ୍ତ ଓ ଆୟୋଜକମାନଙ୍କ ସହ ଭାବବିନିମୟ କରିଥିଲେ । ଅନନ୍ତ ଚତୁର୍ଦ୍ଦଶୀର ପବିତ୍ର ଅବସରରେ ସାଂସଦ ଶ୍ରୀ ପୁରୋହିତ ଭଗବାନ ବିଷ୍ଣୁଙ୍କ ଚରଣରେ ଦେଶର ସୁଖ, ଶାନ୍ତି, ସମୃଦ୍ଧି ଏବଂ ସମସ୍ତ ଜନସାଧାରଣଙ୍କ ମଙ୍ଗଳ କାମନା କରିଥିଲେ । ତାଙ୍କ ମେଢ଼ ପରିଦର୍ଶନ ସମୟରେ ସ୍ଥାନୀୟ ଅଞ୍ଚଳରେ ଉତ୍ସାହ ଓ ଭକ୍ତିର ପରିବେଶ ଅଧିକ ଗଭୀର ହୋଇଥିଲା । ଏହି ଅବସରରେ ବ୍ଲକ ଅଧ୍ୟକ୍ଷ ଜୟକୃଷ୍ଣ ଦଣ୍ଡସେନା, ରେଡିଏନ୍ସ କଲେଜର ଚେୟାରମ୍ୟାନ୍ ଅଜିତ ମେହେର, ହଳଧର ମାଝୀ (ରମୁ), ପୂର୍ବତନ ସରପଞ୍ଚ ଭୋଜରାଜ ମେହେର, ବିରେନ୍ଦ୍ର ବରିହା, ଅନନ୍ତ ଦେହେରୀ, ରବିନ୍ଦ୍ର ଭୋଇ, ରାକେଶ ଗଗତିଆ, ବିକାଶ ବିଶି, ଗୁରୁବାରୁ ମେହେର, ଆନନ୍ଦ ମେହେର, ଅନ୍ତର୍ଯ୍ୟାମୀ ମେହେର, ଦିବ୍ୟ ମେହେରଙ୍କ ସମେତ ପୂଜା କମିଟିର ସମସ୍ତ ସଦସ୍ୟ ସାଂସଦଙ୍କ ମେଢ଼ ପରିଦର୍ଶନରେ ସାମିଲ ହୋଇଥିଲେ । ଅନନ୍ତ ନାରାୟଣଙ୍କ ଆରାଧନା ବିଜେପୁରରେ କେବଳ ଏକ ଧାର୍ମିକ ଆୟୋଜନ ନୁହେଁ; ଏହା ମାଟି ସହ ମଣିଷର ସମ୍ପର୍କ, ପରମ୍ପରା ସହ ପିଢ଼ିର ସଂଯୋଗ ଏବଂ ଆସ୍ଥା ସହ ଆତ୍ମାର ଏକ ନିରବ ସଂଳାପର ପ୍ରତୀକ । ପୂଜା ମେଢ଼ଗୁଡ଼ିକରେ ଜଳୁଥିବା ଦୀପଶିଖା ଅନ୍ଧକାର ଦୂର କରି ଆଲୋକର ବାର୍ତ୍ତା ଦେଉଥିବା ବେଳେ, ଅନନ୍ତଙ୍କ ଆଶୀର୍ବାଦ ସମସ୍ତଙ୍କ ଜୀବନରେ ଶାନ୍ତି, ସଦ୍ଭାବ ଓ ମଙ୍ଗଳର ଆଲୋକ ବିଛୁରିତ କରୁ,ଏହି ଭାବନା ସହ ବିଜେପୁରରେ ଅନନ୍ତ ପୂଜା ଉତ୍ସବ ଭକ୍ତି ଓ ଆନନ୍ଦର ସହ ପାଳିତ ହେଉଛି ।