ରାୟଗଡ଼ା: ରାୟଗଡ଼ା ତାରିଣୀ ଛକରେ ଚଳନ୍ତା ବସରେ ନିଆଁ ଲାଗି ଯାଇଥିଲା । ଗତକାଲି ବିଳମ୍ବିତ ରାତିରେ ନବରଙ୍ଗପୁର କଷାଗୁମୁଡ଼ାରୁ ପୋଲସରା ଯାଉଥିବା ଘରୋଇ ବସରେ ନିଆଁ ଲାଗିଥିଲା । ଫଳରେ ଯାତ୍ରୀବାହୀ ବସଟି ସମ୍ପୂର୍ଣ୍ଣ ଜଳିଯାଇଥିବା ବେଳେ ଯାତ୍ରୀଙ୍କ ଲକ୍ଷାଧିକ ଟଙ୍କା ମୂଲ୍ୟର ସାମଗ୍ରୀ ମଧ୍ୟ ଜଳି ନଷ୍ଟ ହୋଇଯାଇଛି । ହେଲେ ଯାତ୍ରୀମାନେ ଅଳ୍ପକେ ବର୍ତ୍ତି ଯାଇଛନ୍ତି । କଷାଗୁମୁଡ଼ାରୁ ୪୦ଜଣ ଯାତ୍ରୀଙ୍କୁ ନେଇ ବସ ଯାଉଥିଲା । ରାସ୍ତାରେ ଦୁର୍ଗନ୍ଧ ହେଉଥିବା ଯାତ୍ରୀ କହିଥିଲେ ମଧ୍ୟ ବସ ଡ୍ରାଇଭର କି କଣ୍ଡକ୍ଟର ଶୁଣିନଥିଲେ । କିଛି ସମୟ ପରେ ବସର ଚକାରେ ନିଆଁ ଲାଗିଯାଇଥିଲା । ଖବର ପାଇ ରାୟଗଡ଼ାରୁ ଦମକଳ ଗାଡ଼ି ପହଞ୍ଚି ନିଆଁକୁ ଆୟତ୍ତ କରିଛି । ଘଟଣାସ୍ଥଳରୁ ବସର ଡ୍ରାଇଭର ଓ କଣ୍ଡକ୍ଟର ଫେରାର ହୋଇଯାଇଛନ୍ତି ।
