କୋଲକାତା : ଭାରତୀୟ ଜନତା ପାର୍ଟି (ବିଜେପି) ରେ ଯୋଗ ଦେବା ପାଇଁ ତୃଣମୂଳ କଂଗ୍ରେସ(ଟିଏମସି) ଛାଡିଥିବା ରାଜୀବ ବାନାର୍ଜୀଙ୍କ ନାମ ନରଖି ପଶ୍ଚିମବଙ୍ଗର ମୁଖ୍ୟମନ୍ତ୍ରୀ ମମତା ବାନାର୍ଜୀ ଅଭିଯୋଗ କରିଛନ୍ତି ଯେ, ତାଙ୍କ କାର୍ୟ୍ୟକାଳ ମଧ୍ୟରେ ଜଙ୍ଗଲ ବିଭାଗ ନିଯୁକ୍ତିରେ ଅନିୟମିତତା ହୋଇଛି । ଦଳ ଛାଡୁଥିବା ନେତାଙ୍କ ଉପରେ ତୃଣମୂଳ କଂଗ୍ରେସ ସଭାପତି ଆକ୍ରମଣ କରି କହିଛନ୍ତି ଯେ, ଆସନ୍ତା ବିଧାନସଭା ନିର୍ବାଚନରେ ଏହି ନେତାମାନେ ପରାସ୍ତ ହେବେ ଏବଂ ନିର୍ବାଚନ ପରେ ସେମାନଙ୍କ ଦୋକାନ ବନ୍ଦ ହେବ । ସେ କହିଛନ୍ତି, ବନ ବିଭାଗରେ ଜଙ୍ଗଲ ସହାୟକ ନିଯୁକ୍ତି ଦାୟିତ୍ତ୍ୱରେ ଥିବା ଜଣେ ବ୍ୟକ୍ତି ଦୁର୍ନୀତିଗ୍ରସ୍ତ କାର୍ୟ୍ୟକଳାପରେ ସମ୍ପୃକ୍ତ ଥିବା ଜଣାପଡିଛି । ଏହାର ତଦନ୍ନ୍ତ ହେବ । ସବୁକିଛି ଅନୁସନ୍ଧାନ କରାଯିବ । ଏହି ବ୍ୟକ୍ତି ଦୁର୍ନୀତିରେ ଲିପ୍ତ ରହିବା ପରେ ବିଜେପିରେ ଯୋଗ ଦେଇଛନ୍ତି ଏବଂ ବର୍ତ୍ତମାନ ଅନ୍ୟମାନଙ୍କୁ ଭାଷଣ ଦେଉଛନ୍ତି ।
ସେ ଆହୁରି କହିଛନ୍ନ୍ତି ଯେ, ରାଜୀବ ବାନାର୍ଜୀ ତୃଣମୂଳ କଂଗ୍ରେସ ଛାଡି ଗତ ସପ୍ତାହରେ ବିଜେପିରେ ଯୋଗ ଦେଇଥିଲେ ଏବଂ ସେ ରାଜ୍ୟ ସରକାରଙ୍କ ପୂର୍ବତନ ଜଙ୍ଗଲ ମନ୍ତ୍ରୀ ଥିଲେ । ତୃଣମୂଳ କଂଗ୍ରେସ ଛାଡି ବିଜେପି ପକ୍ଷକୁ ଯାଇଥିବା ଲୋକଙ୍କୁ ସମାଲୋଚନା କରି ବାନାର୍ଜୀ ଦାବୀ କରିଛନ୍ତି ଯେ, କେବଳ ଲୋଭୀମାନେ ବିଜେପିରେ ଯୋଗ ଦେଉଛନ୍ତି । ସେ କହିଛନ୍ତି ଯେ ଯେଉଁମାନେ ଦଳ ଛାଡିବାକୁ ଚାହୁଁଛନ୍ତି, ସେମାନେ ତୁରନ୍ତ ଛାଡିବା ଉଚିତ୍ । କବାଟ ଖୋଲା ଅଛି, କିନ୍ତୁ ଯଦି ଆପଣ ପାର୍ଟିରେ ଅଛନ୍ତି ତେବେ ଆପଣଙ୍କୁ ଜଣେ ଶୃଙ୍ଖଳିତ ସଭ୍ୟ ପରି କାର୍ୟ୍ୟ କରିବାକୁ ପଡିବ । ଯେଉଁମାନେ ଅନ୍ୟ ଦଳରେ ଯୋଗ ଦେଇଛନ୍ତି ସେମାନେ ଆଗାମୀ ବିଧାନସଭା ନିର୍ବାଚନରେ ହାରିଯିବେ ଏବଂ ଏହା ପରେ ସେମାନଙ୍କ ରାଜନୀତି ଦୋକାନ ବନ୍ଦ ହୋଇଯିବ।