- ମଣିଷ ପରି ମଣିଷଟିଏ ଥିଲେ ସାମ୍ବାଦିକ ସତ୍ୟ ନାରାୟଣ ବେହେରା
ବଲାଙ୍ଗିର, (କେପିଏନ୍ଏସ୍) : ସେ ଥିଲେ ମଣିଷ ପରି ମଣିଷଟିଏ । ଜଣେ ନିଆରା ବ୍ୟକ୍ତିତ୍ୱ ଥିଲେ ବଲାଙ୍ଗିରର ବରିଷ୍ଠ ସାମ୍ବାଦିକ, ଜିଲ୍ଲା ସାମ୍ବାଦିକ ସଂଘର ପ୍ରତିଷ୍ଠାତା ସଭାପତି, ମଂଚ ଓ ଚଳଚ୍ଚିତ୍ର ଅଭିନେତା,ସଂସ୍କୃତି ଗବେଷକ ତଥା ସାରସ୍ୱତ ସାଧକ ସ୍ୱର୍ଗତ ସତ୍ୟନାରାୟଣ ବେହେରା । ତାଙ୍କର ଆଦରପଣ, ସମସ୍ତଙ୍କୁ ଆପଣାର କରିନେବାର ଭାବ ଆଜିର ସମୟରେ ବିରଳ । ତାଙ୍କର ଅବର୍ତ୍ତମାନରେ ଦୁଃଖୀ ମଣିଷ ମୁହଁରେ ଟିକିଏ ହସ ଫୁଟାଇ ପାରିଲେ ହିଁ ତାଙ୍କ ପ୍ରତି ହେବ ପ୍ରକୃତ ଶ୍ରଦ୍ଧାସୁମନ ବୋଲି କହିଛନ୍ତି ବହୁ ବିଶିଷ୍ଟ ବକ୍ତା । ବଲାଙ୍ଗିରରେ ପରିତ୍ୟକ୍ତା ଅସହାୟ ମହିଳା ଓ ଶିଶୁ ମାନଂକୁ ଆଶ୍ରୟ ଦେଇଥିବା ଅନୁଷ୍ଠାନ ପଲ୍ଲୀ ନିକେତନ ଦ୍ୱାରା ପରିଚାଳିତ ସ୍ଵଧାର ଗୃହ ବା ଶକ୍ତି ସଦନକୁ ସତ୍ୟନାରାୟଣ ବେହେରା ସ୍ମୃତି ସେବା ସମ୍ମାନ ପ୍ରଦାନ ଅବସରରେ ସାମ୍ବାଦିକ ସନ୍ଦୀପ କୁମାର କୁଅଁରଙ୍କ ମଂଚ ସଂଯୋଜନାର ଅନୁଷ୍ଠିତ ଏହି ଶ୍ରାଦ୍ଧ ବାର୍ଷିକୀ ସ୍ମୃତି ସଭା ଓ ସେବା ସମ୍ମାନ ପ୍ରଦାନ ସ୍ଵଧାର ଗୃହ ବା ଶକ୍ତି ସଦନ ପରିସରରେ ଆୟୋଜିତ ହୋଇଥି । ଅତିଥି ଭାବରେ ଜିଲ୍ଲା ପରିଷଦ ଅଧ୍ୟକ୍ଷା ଶ୍ରୀମତୀ ଦେବକୀ ସାହୁ, ଅତିରିକ୍ତ ଜିଲ୍ଲାପାଳ ଡ଼. ବିଜୟାନନ୍ଦ ସେଠୀ, ନାଟ୍ୟଭୂଷଣ ଜଗଦାନନ୍ଦ ଛୁରିଆ ଓ ବଲାଙ୍ଗିର ପୌରାଧ୍ୟକ୍ଷା ଶ୍ରୀମତୀ ଲିକା ସାହୁ, ସହକାରୀ ଜିଲ୍ଲାପାଳ ପ୍ରଶାନ୍ତ କୁମାର ମହାପାତ୍ର, ସ୍ଵଧାର ଗୃହ ପ୍ରକଳ୍ପ ସୁରକ୍ଷା ଅଧିକାରୀ ସୁଜାତା ଦୋରା, ଶିକ୍ଷାବିତ ସନାତନ ଠାକୁର ଯୋଗଦେଇଥିଲେ । ସ୍ଵଧାର ଗୃହ ତରଫରୁ ଏହି ସମ୍ମାନ ଗ୍ରହଣ କରିଥିଲେ ଏହାର ସମ୍ପାଦକ ଉଚ୍ଚାଟାନନ୍ଦ ମହାକୁର ଓ ଅନ୍ୟମାନେ । ଧନ୍ୟବାଦ ଅର୍ପଣ କରିଥିଲେ ସାମ୍ବାଦିକ ଶରତ ଚନ୍ଦ୍ର ମିଶ୍ର । ପରେ ପରେ ନ୍ୟାସ ଦ୍ୱାରା ଆୟୋଜିତ ସ୍ଵଧାର ଗୃହ ଅନ୍ତେବାସୀଙ୍କ ସହ ଏକା ସାଙ୍ଗରେ ବସି ଭୋଜନ କରିଥିଲେ ନିମନ୍ତ୍ରିତ ଅତିଥି ଅନ୍ୟମାନେ । ଏହି କାର୍ଯ୍ୟକ୍ରମରେ ସହଯୋଗ କରିଥିଲେ ନ୍ୟାସ ଟ୍ରଷ୍ଟି ସୁଧାକର ବେହେରା, ସୁନୀଲ ବେହେରା, ଗୁପ୍ତେଶ୍ୱର ପୃଷ୍ଟି, ଦେବଦତ୍ତ ବେହେରା ପ୍ରମୁଖ ।