ଜି.ପି.ଆର କଲେଜ କୁନ୍ତରାରେ ଆକସ୍ମିକ ବିପତ୍ତି ପରିଚାଳନା ପ୍ରଶିକ୍ଷଣ ଶିବିର

ଝାରସୁଗୁଡ଼ା, (କେପିଏନ୍‌ଏସ୍‌) : ଓଡ଼ିଶା ସରକାରଙ୍କ ଓ.ଏସ. ଏ.ପି ଦ୍ଵିତୀୟ ବାଟାଲିୟନ, ଓଡ୍ରାପ୍ ଦଳ, ଝାରସୁଗୁଡ଼ା ଆନୁକୂଲ୍ୟରେ ଦୁଇଦିନ ବ୍ୟାପି ଆକସ୍ମିକ ବିପତ୍ତିର ସୁପରିଚାଳନା ପାଇଁ ଜି.ପି.ଆର କଲେଜ, କୁନ୍ତରା, ସମ୍ବଲପୁରରେ ପ୍ରଶିକ୍ଷଣ ଶିବିର ଅନୁଷ୍ଠିତ ହୋଇଯାଇଛି । ଅଧ୍ୟକ୍ଷ ଡ. ରଂଜନ କୁମାର ପାଣିଗ୍ରାହୀଙ୍କ ଦ୍ଵାରା ଉଦଘାଟିତ ଶିବିରକୁ ଜାତୀୟ ସେବା ସଂସ୍ଥା କାର୍ଯ୍ୟ ଅଧିକାରୀ ଅଧ୍ୟାପକ ତରୁଣ କୁମାର ପୃଷେଠ ଓ ରେଡକ୍ରସ କାଉନସେଲର ଅଧ୍ୟାପକ ଶିବ ଶଙ୍କର ମୁଦୁଲି ପରିଚାଳନା କରିଥିଲେ । ପ୍ରଶିକ୍ଷକ ତେଜ ଗୁରୁଙ୍ଗଙ୍କ ନେତୃତ୍ୱରେ ଓଡ୍ରାପର ଅନ୍ୟ ସହଯୋଗୀ ମାନେ ଆକସ୍ମିକ ବିପଦ ସମୟରେ କିଭଳି ନିଜକୁ ବଞ୍ଚାଇବା ସଙ୍ଗେ ସଙ୍ଗେ ଅନ୍ୟର ଧନ ଜୀବନ ରକ୍ଷା କରିହେବ, ସେ ବିଷୟରେ ପ୍ରଶିକ୍ଷଣ ଦେଇଥିଲେ । ଉକ୍ତ କାର୍ଯ୍ୟକ୍ରମରେ ୧୦୦ ଜଣ ଛାତ୍ରଛାତ୍ରୀ ଅଂଶ ଗ୍ରହଣ କରି ପ୍ରଶିକ୍ଷଣ ପ୍ରାପ୍ତ ପରେ କାର୍ଯ୍ୟକ୍ରମର ଅନ୍ତିମ ପର୍ଯ୍ୟାୟରେ ନିଜ ନିଜର ସନ୍ଦେହ ମୋଚନ ପାଇଁ ପ୍ରଶିକ୍ଷକ ଦଳ ସହିତ ଆଲୋଚନା କରିଥିଲେ । କାର୍ଯ୍ୟକ୍ରମରେ ଅଧ୍ୟାପକ ଦୀପକ ପଟେଲ, ଯୋଗେନ୍ଦ୍ର ମୁଦୁଲି, ସନତ କୁମାର ସାହୁ, ଅଧ୍ୟାପିକା ସ୍ମିତା ପଟେଲ, ହୋସିନା ପ୍ରିୟଦର୍ଶିନୀ ନାୟକ, ବର୍ଷା ମୁଦୁଲି ଉପସ୍ଥିତ ଥିବାବେଳେ ଅଧ୍ୟାପିକା ଡଲି ନାୟକ ଧନ୍ୟବାଦ ଅର୍ପଣ କରିଥିଲେ । ସମସ୍ତ ଅଣଶିକ୍ଷକ କର୍ମଚାରୀମାନେ ସହଯୋଗ କରି ଦୁଇଦିନ ବ୍ୟାପି କାର୍ଯ୍ୟକ୍ରମକୁ ସଫଳ କରିବାରେ ସହାୟକ ହୋଇଥିଲେ ।