lika

ପଥ ଉତ୍ସବକୁ ମନ ଭରି ଉପଭୋଗ କଲେ ରାଉରକେଲା ବାସୀ

gbag
  • ପୁରୀର ସାହିଯାତ ମେଢ଼ ସାଙ୍ଗକୁ ଓଲିଉଡ କଳାକାରଙ୍କ ଦ୍ଵାରା ପରିବେଷିତ ସଙ୍ଗୀତ ମୋହିଲା ଦର୍ଶକଙ୍କ ମନ

ରାଉରକେଲା, (ସସ୍ମିତା ପ୍ରଧାନ) : ଦୀର୍ଘ ଦୁଇ ବର୍ଷ ପରେ ପୁଣି ରାଉରକେଲାକୁ ପଥ ଉତ୍ସବ ଫେରିଥିବା ବେଳେ ଏହାକୁ ମନ ଭରି ଉପଭୋଗ କରିଥିଲେ । ରାଉରକେଲାବାସୀଙ୍କୁ ମନୋରଞ୍ଜନର ଖୋରାକ ଯୋଗାଇବା ପାଇଁ ସ୍ଵାୟତ୍ତ ଶାସନ ଦିବସର ଅବ୍ୟବହିତ ପୂର୍ବରୁ ରାଉରକେଲା ମହାନଗର ନିଗମ ତରଫରୁ ଅନୁଷ୍ଠିତ ଏହି ପଥ ଉତ୍ସବରେ ପ୍ରବଳ ଜନସମାଗମ ହୋଇଥିଲା । ରାଉରକେଲା ମହାନଗର ନିଗମ କାର୍ଯ୍ୟାଳୟ ସମ୍ମୁଖରୁ ଆରମ୍ଭ ହୋଇଥିବା ଏହି ପଥ ଉତ୍ସବ ହନୁମାନ ବାଟିକା ଛକ ପର୍ଯ୍ୟନ୍ତ ଚାଲିଥିଲା । ସକାଳ ୬. ୩୦ ଟାରୁ ଆରମ୍ଭ ହୋଇଥିବା ଏହି ପଥ ଉତ୍ସବରେ ସବୁ ବର୍ଗର ଲୋକଙ୍କ ପାଇଁ ବିଭିନ୍ନ ପ୍ରକାରର ମନୋରଞ୍ଜନ ଭିତ୍ତିକ କାର୍ଯ୍ୟକ୍ରମ ରହିଛି । ଶିଶୁଙ୍କଠାରୁ ଆରମ୍ଭ କରି ଯୁବ ବର୍ଗ, ବରିଷ୍ଠ ନାଗରିକ, ମହିଳାମାନଙ୍କ ଲାଗି ବିଭିନ୍ନ ପ୍ରକାରର କ୍ରିୟାକଳାପ ଅନୁଷ୍ଠିତ ହୋଇଥିଲା । ଏହି କ୍ରମରେ ଜୁମ୍ବା ସହ ବିଭିନ୍ନ ଶାସ୍ତ୍ରୀୟ ନୃତ୍ୟ ଠାରୁ ଆରମ୍ଭ କରି ଲୋକନୃତ୍ୟ ସ୍ଥାନୀୟ କଳାକାରଙ୍କ ଦ୍ଵାରା ପରିବେଷଣ କରାଯାଇଥିଲା । ସେଥିମଧ୍ୟରେ ଓଡ଼ିଶୀ, କଥକଳୀ, ମୋହିନୀଆଟ୍ଟମ୍, ଭାରତନାଟ୍ୟମ୍, କଥକ ଆଦି ଅନ୍ତର୍ଭୁକ୍ତ ଥିଲା । ମିନି ଇଣ୍ଡିଆ ଭାବେ ପରିଚିତ ରାଉରକେଲାର ଭାଇଚାରାକୁ ଦର୍ଶାଉଥିବା ରାମ୍ପ ଶୋ’ ଅନୁଷ୍ଠିତ ହୋଇଥିଲା । ଏହା ସହ ଦିବ୍ୟାଙ୍ଗ ମାନଙ୍କ ଶୋ’, ଫ୍ଲୁଟ୍, କାନଭାସ୍ ଚିତ୍ରକଳା ସାଙ୍ଗକୁ ରାସ୍ତାରେ ରଙ୍ଗୋଲି ଆଦି କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା । ଏଥିସହ ଛାତ୍ରଛାତ୍ରୀଙ୍କ ଦ୍ଵାରା ବିଜ୍ଞାନ ପ୍ରଦର୍ଶନୀ ମଧ୍ୟ ଆୟୋଜନ କରାଯାଇଥିଲା । ଯେଉଁଥିରେ ବିଭିନ୍ନ ବିଦ୍ୟାଳୟର ଛାତ୍ରଛାତ୍ରୀମାନେ ଅଂଶଗ୍ରହଣ କରି ସେମାନଙ୍କ ପ୍ରକଳ୍ପ ପ୍ରଦର୍ଶନ କରିଥିଲେ । ଏଥିସହ ସ୍ଥାନୀୟ ରାସ୍ତା ପାର୍ଶ୍ଵ ବ୍ୟବସାୟୀ ତଥା ସ୍ଵୟଂ ସହାୟକ ଗୋଷ୍ଠୀର ମହିଳାମାନଙ୍କ ଦ୍ଵାରା ସାଞ୍ଝା ଉତ୍ସବ ତଥା ଖାଦ୍ୟ ମେଳା ମଧ୍ୟ ଆୟୋଜନ କରାଯାଇଥିଲା । ଯେଉଁଠାରେ ଜନସାଧାରଣ ଆସି ବିଭିନ୍ନ ପ୍ରକାର ସୁଆଦିଆ ବ୍ୟଞ୍ଜନର ସ୍ଵାଦ ଚାଖି ପାରିଥିଲେ ।
ମାନ୍ୟବର ବିଧାୟକ ରାଉରକେଲା ସାରଦା ପ୍ରସାଦ ନାୟକ, ସୁନ୍ଦରଗଡ଼ ଜିଲ୍ଲାପାଳ ଡାକ୍ତର ଶୁଭଙ୍କର ମହାପାତ୍ର, ପଶ୍ଚିମାଞ୍ଚଳ ଡିଆଇଜି ବ୍ରିଜେଶ କୁମାର ରାୟ, ରାଉରକେଲା ମହାନଗର ନିଗମ ଆୟୁକ୍ତ ସୁଶ୍ରୀ ଦୀନା ଦସ୍ତଗୀର୍, ରାଉରକେଲା ଆରକ୍ଷୀ ଅଧିକ୍ଷକ ନିତେଶ ୱାଧୱାନି, ରାଉରକେଲା ଇସ୍ପାତ କାରଖାନାର ଭାରପ୍ରାପ୍ତ ନିର୍ଦ୍ଦେଶକ ଆଲୋକ ବର୍ମା, ଆଇଏଏସ ଶିକ୍ଷାନବିସ ଫାବି ରସିଦ, ସୁନ୍ଦରଗଡ଼ ସାଂସଦ ଜୁଏଲ ଓରାମଙ୍କ ପ୍ରତିନିଧି ପ୍ରକାଶ ପାଶୱାନ ପ୍ରମୁଖ ଉପସ୍ଥିତ ରହି କଳାକାରମାନଙ୍କୁ ଉତ୍ସାହିତ କରିଥିଲେ । ଏହି ପରି କାର୍ଯ୍ୟକ୍ରମ ସ୍ଥାନୀୟ କଳାକାରଙ୍କ ନିମନ୍ତେ ଏକ ମଂଚ ହୋଇଥିବା ବେଳେ ସେମାନେ ଏଥିରେ ଭାଗ ନେଇ ସେମାନଙ୍କ କଳା କୌଶଳ ପ୍ରଦର୍ଶନ କରିବାର ସୁଯୋଗ ପାଉଥିବା କହିଥିଲେ । ରାଉରକେଲାକୁ ସ୍ଵଚ୍ଛ, ଶ୍ରେଷ୍ଠ ଓ ବିକଶିତ କରିବା ପାଇଁ ଜନ ଭାଗୀଦାରୀ ମୁଖ୍ୟ ହୋଇଥିବା ବେଳେ ସମସ୍ତେ ଏଥିପାଇଁ ଆଗେଇ ଆସିବାକୁ ଅତିଥିମାନେ ଆହ୍ଵାନ ଦେଇଥିଲେ । ଓଲିଉଡର ନାମକରା କଣ୍ଠଶିଳ୍ପୀଙ୍କ ଦ୍ଵାରା ସୁମଧୁର ସଙ୍ଗୀତ ଦର୍ଶକଙ୍କ ମନ ମୋହିଥିଲା । ପ୍ରସିଦ୍ଧ ଓଡ଼ିଆ କଣ୍ଠଶିଳ୍ପୀ ଟି. ସୌରୀଙ୍କ ସହ ଲୋକପ୍ରିୟ କଣ୍ଠଶିଳ୍ପୀ ସତ୍ୟଜିତ୍ ପ୍ରଧାନ, ଲିପ୍ସା ମହାପାତ୍ର, ବର୍ଣ୍ଣାଳୀ ହୋତାଙ୍କ ସହ ସୁପରିଚିତ ଉପସ୍ଥାପକ ଓ ଅଭିନେତା କେପି, ଉପସ୍ଥାପିକା ଓ ଅଭିନେତ୍ରୀ ଗୁଡ଼ି ଓ ଅଙ୍କିତା ମହାନ୍ତି ପ୍ରମୁଖ ଉପସ୍ଥିତ ରହି ଦର୍ଶକଙ୍କ ମନୋରଞ୍ଜନ କରିଥିଲେ ।

babaa
Leave A Reply

Your email address will not be published.