- କିସ ଆଦିବାସୀ ବିଶ୍ୱବିଦ୍ୟାଳୟ ଭଳିଆ ଆଦିବାସୀ ଛାତ୍ରଛାତ୍ରୀଙ୍କୁ ଶିକ୍ଷା ଦିଅ
- ଧାନର ଏମ୍.ଏସ୍.ପି ଡବଲ କର
- ପେସା ଆକ୍ଟ ଲାଗୁ କର
ନୂଆଦିଲ୍ଲୀ, (କେପିଏନ୍ଏସ୍) : ଚଳିତ ବଜେଟ୍ ଅଧିବେଶନରେ ରାଷ୍ଟ୍ରପତିଙ୍କ ଅଭିଭାଷଣ ଉପରେ ଧନ୍ୟବାଦ ପ୍ରସ୍ତାବରେ ବିଜେଡିର ସାଂସଦ ନିରଞ୍ଜନ ବିଶି ରାଜ୍ୟସଭାରେ କେନ୍ଦ୍ର ସରକାରଙ୍କୁ କଡା ସମାଲୋଚନା କରିଥିଲେ । ଅନୁସୂଚିତ ଜନଜାତି ଏବଂ ଅନୁସୂଚିତ ଜାତିର ବିକାଶ ଦିଗରେ ବିଜେପି ସରକାରଙ୍କ ଅବହେଳା କ୍ଷେତ୍ରରେ ସାଂସଦ ଶ୍ରୀ ବିଶି ଆଲୋକପାତ କରି କହିଥିଲେ ଯେ, ଭାରତରେ ୭୨୫୬ଟି ବ୍ଲକ ଅଛି ସେଥି ମଧ୍ୟରୁ ୬୬୪ଟି ବ୍ଲକ ଅନୁସୂଚିତ ଅଞ୍ଚଳ ଅଧୀନରେ ଅଛି । ଦେଶରେ ଅନୁସୂଚିତ ଜନଜାତି (ଏସ୍ଟି) ଜନସଂଖ୍ୟା ୧୫ କୋଟି, ୭୫୦ଟି ଏସ୍ଟି ସମ୍ପ୍ରଦାୟ ଏବଂ ୭୫ଟି ବିଶେଷ ଭାବରେ ଦୁର୍ବଳ ଆଦିବାସୀ ଗୋଷ୍ଠୀ ବସବାସ କରୁଛନ୍ତି । ଭାରତରେ କେବଳ ୪୭୦ ଏକଲବ୍ୟ ଆଦର୍ଶ ଆବାସିକ ବିଦ୍ୟାଳୟରେ ୧ ଲକ୍ଷ ୨୫ ହଜାର ଆଦିବାସୀ ଛାତ୍ରଛାତ୍ରୀଙ୍କୁ ଶିକ୍ଷା ଦିଆଯାଉଛି । ଓଡିଶାର ୩୧୪ଟି ବ୍ଲକ୍ ମଧ୍ୟରେ କେବଳ ୪୭ଟି ଏକଲବ୍ୟ ଆଦର୍ଶ ଆବାସିକ ବିଦ୍ୟାଳୟ ଚାଲୁଛି । ସେହିପରି ଓଡିଶାରେ ୧ କୋଟି ୨୦ ଲକ୍ଷ ଆଦିବାସୀ ଅଛନ୍ତି । ପ୍ରତ୍ୟେକ ବ୍ଲକରେ ଗୋଟିଏ ଏକଲବ୍ୟ ଆଦର୍ଶ ଆବାସିକ ବିଦ୍ୟାଳୟ ସ୍ଥାପନ କରିବା ଦରକାର । କିସ କିଟର ପ୍ରତିଷ୍ଠାତା ମହାତ୍ମା ଡ଼ଃ. ଅଚ୍ୟୁତାନନ୍ଦ ସାମନ୍ତଙ୍କ ମହାନ ବ୍ୟକ୍ତିତ୍ୱ ଏବଂ ଆଦିବାସୀମାନଙ୍କ ବିକାଶ ଦିଗରେ ଉଲ୍ଲେଖନୀୟ ଅବଦାନ ଉପରେ ଆଲୋକପାତ କରିଥିଲେ । ଶ୍ରୀ ବିଶି ଆହୁରି ବର୍ଣ୍ଣନା କରିଥିଲେ ଯେ, ଯଦି କିସ୍ ଏବଂ କିଟ୍ର ପ୍ରତିଷ୍ଠାତା ତଥା ପୂର୍ବତନ ଲୋକସଭା ସାଂସଦ, କାଲିଙ୍ଗା ଇନଷ୍ଟିଚ୍ୟୁଟ୍ ଅଫ୍ ସୋସିଆଲ୍ ସାଇନ୍ସ (କିସ୍) ଆଦିବାସୀ ବିଶ୍ୱବିଦ୍ୟାଳୟ ପ୍ରତିଷ୍ଠା କରି ୧.୫୦ଲକ୍ଷ ଗରିବ ଆଦିବାସୀ ଛାତ୍ରଛାତ୍ରୀଙ୍କୁ ନିଃଶୁଳ୍କ ଉଚ୍ଚଶିକ୍ଷା, ଗୁଣାତ୍ମକ ଶିକ୍ଷା, ଧନ୍ଦାମୂଳକ ଏବଂ ବୃତ୍ତିଗତ ଶିକ୍ଷା ପ୍ରଦାନ କରୁଛନ୍ତି । ତେବେ କେନ୍ଦ୍ର ସରକାର କିସ ଭଳିଆ ବିଦ୍ୟାଳୟ ସ୍ଥାପନ କରିବାରେ ଅସୁବିଧା କେଉଁଠି ବୋଲି ପ୍ରଶ୍ନ କରିଥିଲେ । କେନ୍ଦ୍ର ସରକାର ପାଖରେ ଅର୍ଥ ଅଭାବ ଯୋଗୁଁ ଏକଲବ୍ୟ ଆଦର୍ଶ ଆବାସିକ ବିଦ୍ୟାଳୟ ପ୍ରତିଷ୍ଠା କରିପାରୁନାହାନ୍ତି କି ବୋଲି କଟୁ ସମାଲୋଚନା କରିଥିଲେ । ଏହା ଉପରେ କେନ୍ଦ୍ର ଆଦିବାସୀ ବ୍ୟାପାର ମନ୍ତ୍ରଣାଳୟକୁ ଶ୍ରୀ ବିଶି ସ୍ପଷ୍ଟିକରଣ ମାଗିଛନ୍ତି । ଯଦି ପାଣ୍ଠି ଉପଲବ୍ଧ ଅଛି, ନିୟମ ଅନୁଯାୟୀ ପ୍ରତ୍ୟେକ ବ୍ଲକରେ ଅତିକମ୍ରେ ଗୋଟିଏ ଏକଲବ୍ୟ ବିଦ୍ୟାଳୟ କାହିଁକି ପ୍ରତିଷ୍ଠା କରାଯାଉନାହିଁ ? ଶ୍ରୀ ବିଶି ଗୃହକୁ ମନେ ପକାଇ ଦେଇଛନ୍ତି ଯେ ଓଡିଶାର ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ପ୍ରତ୍ୟେକ ବ୍ଲକରେ ଓଡିଶା ଆଦର୍ଶ ବିଦ୍ୟା (ଓଏଏଭି) ଏବଂ କାଲିଙ୍ଗ ଆଦର୍ଶ ବିଦ୍ୟାଲୟକୁ ସଫଳତାର ସହ ପ୍ରତିଷ୍ଠା କରିଛନ୍ତି । ଚାଷୀଙ୍କ ଆୟ ଦ୍ୱିଗୁଣିତ କରିବା ପାଇଁ ସ୍ୱାମୀନାଥନ କମିଶନଙ୍କ ରିପୋର୍ଟ ଅନୁଯାୟୀ କୃଷକମାନଙ୍କ ପାଇଁ ସର୍ବନିମ୍ନ ସହାୟତା ମୂଲ୍ୟ (ଏମ୍ଏସ୍ପି)କୁ ଦ୍ୱିଗୁଣିତ କରିବାର ଆବଶ୍ୟକତା ଉପରେ ଶ୍ରୀ ବିଶି ଗୁରୁତ୍ୱାରୋପ କରିଥିଲେ । ଶ୍ରୀ ବିଶି ଧାନର ଏମ୍ଏସ୍ପିରେ ଥିବା ପାର୍ଥକ୍ୟକୁ ଦର୍ଶାଇଛନ୍ତି ଯେ, କେନ୍ଦ୍ର ସରକାର ନିର୍ବାଚନ ଇସ୍ତାହାରରେ ଘୋଷଣା କରିଥିଲେ ଯେ କୃଷକମାନଙ୍କ ଆୟ ଦ୍ୱିଗୁଣିତ ହେବା ପାଇଁ କୃଷକମାନେ କ୍ୱିଣ୍ଟାଲ ପିଛା ୪,୬୦୦ ଟଙ୍କା ଘୋଷଣା କରିଥିଲେ । କିନ୍ତୁ ଓଡିଶାରେ କୃଷକମାନେ କ୍ୱିଣ୍ଟାଲ ଧାନ ପିଛା ମାତ୍ର ୨୩୦୦ ଟଙ୍କା ପାଉଛନ୍ତି । ଆଦିବାସୀମାନଙ୍କ ସ୍ୱଶାସନ ବ୍ୟବସ୍ଥା ପାଇଁ ହୋଇଥିବା ପେସା ଆଇନ ୧୯୯୬ର କାର୍ଯ୍ୟକାରୀତା ହେବା ନେଇ ଉଦ୍ୱେଗ ପ୍ରକାଶ କରିଥିଲେ । ପେସା ଆଇନ ଆଦିବାସୀଙ୍କ ଜମି ଅଧିକାର, ଜଙ୍ଗଲ ଅଧିକାର, ଜଳ ସମ୍ପଦ ଅଧିକାର ତଥା ଜୀବିକା ଅଧିକାର, ସଂସ୍କୃତି ସୁରକ୍ଷା, ସାମାଜିକ ଅର୍ଥନୈତିକ ବିକାଶ ପାଇଁ ପ୍ରଣୟନ କରାଯାଇଥିଲା । କିନ୍ତୁ ଅନୁସୂଚିତ ଅଞ୍ଚଳରେ ବାସ କରୁଥିବା ଆଦିବାସୀମାନଙ୍କ ସ୍ୱୟଂଶାସନକୁ ବ୍ୟବସ୍ଥା କାର୍ଯ୍ୟକାରୀ କରିବାର ୨୮ ବର୍ଷ ପରେ ବି ପେସା ଆଇନ କାର୍ଯ୍ୟକାରୀ ହୋଇପାରି ନାହିଁ । ଶ୍ରୀ ବିଶି କହିଥିଲେ ଯେ, ଏସ୍ସି / ଏସ୍ଟି ସମ୍ପ୍ରଦାୟର ଅଧିକାରର ସୁରକ୍ଷା ତଥା ସେମାନଙ୍କର ସାମାଜିକ ଅର୍ଥନୈତିକ ବିକାଶକୁ ସରକାର ପ୍ରୋତ୍ସାହିତ କରିବାରେ ବିଫଳ ହେଉଛନ୍ତି । ଜମି, ଜଙ୍ଗଲ, ଜଳ, ସଂସ୍କୃତି ଏବଂ ଅନୁସୂଚିତ ଜନଜାତି ଏବଂ ଅନ୍ୟାନ୍ୟ ପାରମ୍ପାରିକ ବନବାସୀ (ଜଙ୍ଗଲ ଅଧିକାରର ସ୍ୱୀକୃତି) ଆଇନ ସଠିକ୍ ଭାବରେ କାର୍ଯ୍ୟକାରୀ ହେଉନାହିଁ । ସାଂସଦ ଶ୍ରୀ ବିଶି ଆହୁରି ସୂଚାଇ ଦେଇଛନ୍ତି ଯେ, ଏସ୍ଟି ପ୍ରାର୍ଥୀଙ୍କୁ ସରକାରୀ ଚାକିରୀ ଯୋଗାଇ ଦିଆଯାଉ ନାହିଁ, ଯଦି ୨ କୋଟି ଚାକିରୀ ଦିଆଯାଏ ତେବେ ଏସ୍ସି ଏବଂ ଏସ୍ଟି ପ୍ରାର୍ଥୀ କୋଟାରେ ୪୫ଲକ୍ଷ ସରକାରୀ ଚାକିରୀ ପାଇପାରିବେ । ଦେଶର ଅନୁସୂଚିତ ଜନଜାତିଙ୍କ ପ୍ରତି ଅତ୍ୟାଚାର ୧୪% ବୃଦ୍ଧି ପାଇଥିବା ବେଳେ ଦୋଷୀ ସାବ୍ୟସ୍ତ ହାର ମାତ୍ର ୭ ପ୍ରତିଶତ ରହିଛି । ଏହି ଗୁରୁତ୍ ପୂର୍ଣ୍ଣ ସମସ୍ୟାର ସମାଧାନ ତଥା ଅନୁସୂଚିତ ଜନଜାତି ତଥା ଅନୁସୂଚିତ ଜାତି ସମ୍ପ୍ରଦାୟ ପାଇଁ ନ୍ୟାୟ, ଶିକ୍ଷା, ସାମାଜିକ, ଅର୍ଥନୈତିକ ଉନ୍ନତି ନିଶ୍ଚିତ କରିବାକୁ ସରକାର ତୁରନ୍ତ ପଦକ୍ଷେପ ନେବାକୁ ସାଂସଦ ଶ୍ରୀ ବିଶି ପ୍ରସଙ୍ଗ ଉପସ୍ଥାପନା କରିଥିଲେ ।