ଅସ୍ତ୍ର ଛାଡ଼ି ମୁଖ୍ୟସ୍ରୋତରେ ସାମିଲ ହୋଇଥିବା ଛତିଶଗଡ଼, ମହାରାଷ୍ଟ୍ର, ଓଡ଼ିଶା, ଆନ୍ଧ୍ର ପ୍ରଦେଶ, ତେଲଙ୍ଗାନା ଏବଂ ଆସାମର ଲୋକମାନଙ୍କୁ ଛତିଶଗଡ଼ ଜଗଦଲପୁରଠାରେ ସାକ୍ଷାତ କଲେ କେନ୍ଦ୍ର ସ୍ୱରାଷ୍ଟ୍ର ଓ ସମବାୟ ମନ୍ତ୍ରୀ ଅମିତ ଶାହ

• ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ନକ୍ସଲ ପ୍ରଭାବିତ ଅଞ୍ଚଳରେ ୧୫ ହଜାରରୁ ଅଧିକ ଘର ନିର୍ମାଣ ପ୍ରସ୍ତାବକୁ ମଞ୍ଜୁର କରିଛନ୍ତି
• ନକ୍ସଲ ପ୍ରଭାବିତ ଅଞ୍ଚଳରେ ପ୍ରତ୍ୟେକ ପରିବାରକୁ ଗୋଟିଏ ଗାଈ କିମ୍ବା ମଇଁଷି ଯୋଗାଇ ଦେଇ ଏକ ଦୁଗ୍ଧ ସମବାୟ ସଂସ୍ଥା ଆରମ୍ଭ କରାଯାଉଛି
• ଯେଉଁମାନେ ହିଂସାରେ ଲିପ୍ତ ସେମାନଙ୍କୁ ହତ୍ୟା କରିବା ଠିକ୍ ଉପାୟ ନୁହେଁ, କିନ୍ତୁ ଯେଉଁମାନେ ଅସ୍ତ୍ର ଉଠାଇଛନ୍ତି ସେମାନଙ୍କୁ ମୁଖ୍ୟଧାରାକୁ ଫେରାଇ ଆଣିବା ହେଉଛି ପ୍ରକୃତ ମାର୍ଗ
• ବସ୍ତରର ଜଣେ ଝିଅ ଅଲିମ୍ପିକ୍ସରେ ଯେତେବେଳେ ପଦକ ଜିତିବ, ଏହା ସମଗ୍ର ବିଶ୍ୱ ପାଇଁ ଏକ ବାର୍ତ୍ତା ହେବ ଯେ ହିଂସା ନୁହେଁ ବରଂ ବିକାଶ ହିଁ ଠିକ୍ ରାସ୍ତା
• ଛତିଶଗଡ଼ ସରକାର ସର୍ବଶ୍ରେଷ୍ଠ ଆତ୍ମସମର୍ପଣ ନୀତି ପ୍ରଣୟନ କରିଛନ୍ତି ଏବଂ ସମାଜରେ ଅସ୍ତ୍ର ତ୍ୟାଗ କରୁଥିବା ଯୁବବର୍ଗମାନଙ୍କ ପୁନର୍ବାସ ପାଇଁ ଏହାକୁ ସାରା ଦେଶରେ ପୁନରାବୃତ୍ତି କରାଯିବ
• ହିଂସାରେ ଲିପ୍ତ ଯୁବକଯୁବତୀଙ୍କୁ ଅସ୍ତ୍ରଶସ୍ତ୍ର ତ୍ୟାଗ କରି ସମାଜର ମୁଖ୍ୟଧାରାରେ ସାମିଲ ହେବାକୁ ସ୍ୱରାଷ୍ଟ୍ର ମନ୍ତ୍ରୀଙ୍କ ନିବେଦନ
• ମୋଦୀ ଜୀଙ୍କ ନେତୃତ୍ୱରେ କେନ୍ଦ୍ର ସରକାରଙ୍କ ସମସ୍ତ କଲ୍ୟାଣକାରୀ ଯୋଜନାରେ ବସ୍ତରକୁ ସର୍ବୋଚ୍ଚ ପ୍ରାଥମିକତା ଦିଆଯାଉଛି
• ଯେଉଁମାନେ ଅସ୍ତ୍ର ତ୍ୟାଗ କରି ସମାଜର ମୁଖ୍ୟସ୍ରୋତକୁ ଆସିଛନ୍ତି, ସେମାନେ ମୋଦୀଜୀଙ୍କୁ ବିଶ୍ୱାସ କରିଛନ୍ତି, ସେମାନଙ୍କ ବିଶ୍ୱାସ ଭାଙ୍ଗିବ ନାହିଁ ଏବଂ ଏଭଳି ଲୋକଙ୍କୁ ଦେଖି ଅନେକ ଯୁବବର୍ଗ ଅସ୍ତ୍ର ତ୍ୟାଗ କରି ବିକାଶ ଯାତ୍ରାରେ ସାମିଲ ହେବେ

ନୂଆଦିଲ୍ଲୀ (ପିଆଇବି) : କେନ୍ଦ୍ର ସ୍ୱରାଷ୍ଟ୍ର ଓ ସମବାୟ ମନ୍ତ୍ରୀ ଅମିତ ଶାହ ଛତିଶଗଡ଼ର ଜଗଦଲପୁର ଠାରେ ଅସ୍ତ୍ରଶସ୍ତ୍ର ଛାଡି ସମାଜର ମୁଖ୍ୟଧାରାରେ ଯୋଗ ଦେଇଥିବା ଛତିଶଗଡ଼, ମହାରାଷ୍ଟ୍ର, ଓଡ଼ିଶା, ଆନ୍ଧ୍ର ପ୍ରଦେଶ, ତେଲଙ୍ଗାନା ଏବଂ ଆସାମର ଲୋକଙ୍କୁ ଭେଟିଛନ୍ତି । ଏହି ଅବସରରେ ଛତିଶଗଡ଼ର ମୁଖ୍ୟମନ୍ତ୍ରୀ ବିଷ୍ଣୁଦେଓ ସାୟ ଏବଂ ଉପମୁଖ୍ୟମନ୍ତ୍ରୀ ବିଜୟ ଶର୍ମା ପ୍ରମୁଖ ଉପସ୍ଥିତ ଥିଲେ । ଏହି ସାକ୍ଷାତ ପରେ ନିଜର ଅଭିଭାଷଣରେ ଅମିତ ଶାହ କହିଥିଲେ ଯେ, ୨୦୧୯ରେ ଦେଶର ଯୁବକମାନେ କାଶ୍ମୀର, ଉତ୍ତର-ପୂର୍ବ ଏବଂ ନକ୍ସଲ ପ୍ରଭାବିତ ଅଞ୍ଚଳରେ ଅସ୍ତ୍ରଶସ୍ତ୍ର ଧରି ନିଜର ଜୀବନ ନଷ୍ଟ କରୁଥିଲେ, ହିଂସା କରୁଥିଲେ ଏବଂ ସମଗ୍ର ଅଞ୍ଚଳକୁ ବିକାଶଠାରୁ ଦୂରରେ ରଖିଥିଲେ । ସେ କହିଥିଲେ ଯେ ସେହି ସମୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ନିଷ୍ପତ୍ତି ନିଆଯାଇଥିଲା ଯେ ଯେଉଁମାନେ ଅସ୍ତ୍ରଶସ୍ତ୍ର ତ୍ୟାଗ କରି ସମାଜର ମୁଖ୍ୟଧାରାରେ ସାମିଲ ହେବାକୁ ଚାହୁଁଛନ୍ତି, ସେମାନଙ୍କୁ ଏହି ସୁଯୋଗ ଦିଆଯିବା ଉଚିତ । ଶ୍ରୀ ଶାହ କହିଥିଲେ ଯେ ୨୦୧୯ରୁ ୨୦୨୪ ମସିହା ମଧ୍ୟରେ କେବଳ ଉତ୍ତର-ପୂର୍ବାଞ୍ଚଳରେ ୯୦୦୦ରୁ ଅଧିକ ଲୋକ ସେମାନଙ୍କ ଅସ୍ତ୍ରତ୍ୟାଗ କରି ଆତ୍ମସମର୍ପଣ କରିଛନ୍ତି । ସେହିଭଳି, ଅନେକ ଯୁବକ ନକ୍ସଲ ପ୍ରଭାବିତ ଅଞ୍ଚଳରେ ଆତ୍ମସମର୍ପଣ କରିଛନ୍ତି ଏବଂ ବର୍ତ୍ତମାନ ଭାରତ ସରକାର ଏହିପରି ଲୋକଙ୍କ କଲ୍ୟାଣ ତଥା ନକ୍ସଲବାଦର ଶିକାର ହୋଇଥିବା ଲୋକଙ୍କ ପାଇଁ ଏକ ବ୍ୟାପକ ଯୋଜନା ପ୍ରସ୍ତୁତ କରୁଛନ୍ତି ବୋଲି ସେ କହିଥିଲେ । ଗୃହମନ୍ତ୍ରୀ କହିଛନ୍ତି ଯେ ପ୍ରଧାନମନ୍ତ୍ରୀ ମୋଦୀ ନକ୍ସଲ ପ୍ରଭାବିତ ଅଞ୍ଚଳରେ ୧୫,୦୦୦ ଆବାସ ନିର୍ମାଣକୁ ଅନୁମୋଦନ କରିଛନ୍ତି । ଏହା ସହିତ, ପ୍ରତ୍ୟେକ ପରିବାରକୁ ଗୋଟିଏ ଗାଈ କିମ୍ବା ମଇଁଷି ଯୋଗାଇ ଦେଇ ନକ୍ସଲ ପ୍ରଭାବିତ ଅଞ୍ଚଳରେ ଦୁଗ୍ଧ ସମବାୟ ସମିତି ମଧ୍ୟ ଆରମ୍ଭ କରାଯାଉଛି । କେନ୍ଦ୍ର ସ୍ୱରାଷ୍ଟ୍ର ମନ୍ତ୍ରୀ କହିଥିଲେ ଯେ ଗତ ବର୍ଷ ଛତିଶଗଡ଼ରେ ସରକାର ଗଠନ ହେବା ପରେ, ଏକ ନକ୍ସଲମୁକ୍ତ ଛତିଶଗଡ଼ ପାଇଁ ସଂକଳ୍ପ ନିଆଯାଇଥିଲା । ସେ କହିଥିଲେ ଯେ ହିଂସା କୌଣସି ଉପାୟ ନୁହେଁ, ବରଂ ଯେଉଁମାନେ ଅସ୍ତ୍ରଶସ୍ତ୍ର ଉଠାଇଛନ୍ତି ସେମାନଙ୍କୁ ମୁଖ୍ୟଧାରାକୁ ଫେରାଇ ଆଣିବା । ସେ କହିଥିଲେ ଯେ ଛତିଶଗଡ଼ ସରକାର ସର୍ବଶ୍ରେଷ୍ଠ ଆତ୍ମସମର୍ପଣ ନୀତି ପ୍ରଣୟନ କରିଛନ୍ତି ଏବଂ ସାରା ଦେଶରେ ଏହାର ଅନୁକରଣ କରି ସମାଜରେ ଅସ୍ତ୍ର ତ୍ୟାଗ କରିଥିବା ଯୁବକମାନଙ୍କ ପୁନର୍ବାସ ପାଇଁ ପ୍ରୟାସ କରାଯିବ । ଅମିତ ଶାହ ହିଂସାରେ ଲିପ୍ତ ଯୁବକଯୁବତୀମାନଙ୍କୁ ଅସ୍ତ୍ରଶସ୍ତ୍ର ଛାଡି ସମାଜର ମୁଖ୍ୟଧାରାରେ ଯୋଗଦେବାକୁ ନିବେଦନ କରିଥିଲେ । ବସ୍ତର ଅଲିମ୍ପିକ୍ସ ବିଷୟରେ ସେ କହିଥିଲେ ଯେ ବସ୍ତରର ପ୍ରତିଭାବାନ ପିଲାମାନେ ହେଉଛନ୍ତି ଭାରତର ଭବିଷ୍ୟତ । ସେ କହିଥିଲେ ଯେ ୨୦୨୫ରୁ ୨୦୩୬ ଅଲିମ୍ପିକ୍ସ ପର୍ଯ୍ୟନ୍ତ ବସ୍ତରର ପିଲାମାନଙ୍କୁ ପଦକ ଜିତିବାର ଯୋଗ୍ୟ କରିବାର ପ୍ରକ୍ରିୟା ଆରମ୍ଭ କରାଯିବା ଉଚିତ । ଶ୍ରୀ ଶାହ କହିଥିଲେ ଯେ ୨୦୩୬ ଅଲିମ୍ପିକ୍ସରେ ଯେତେବେଳେ ବସ୍ତରର ଜଣେ ଶିଶୁ ପଦକ ଜିତିବ, ସେତେବେଳେ ଏହା ନକ୍ସଲବାଦ ପ୍ରତି ଏକ ଦୃଢ଼ ଉତ୍ତର ହେବ ଏବଂ ସମଗ୍ର ବିଶ୍ୱ ପାଇଁ ଏକ ବାର୍ତ୍ତା ହେବ ଯେ ହିଂସା କୌଣସି ଉଚିତ୍ ମାର୍ଗ ନୁହେଁ, ବରଂ ବିକାଶ ହିଁ ସଠିକ ମାର୍ଗ । କେନ୍ଦ୍ର ସ୍ୱରାଷ୍ଟ୍ର ଏବଂ ସମବାୟ ମନ୍ତ୍ରୀ କହିଥିଲେ ଯେ ବର୍ତ୍ତମାନ ବହୁତ କମ୍ ଅଞ୍ଚଳ ନକ୍ସଲବାଦ ଦ୍ୱାରା ପ୍ରଭାବିତ । ଯେଉଁମାନେ ହିଂସାରେ ଲିପ୍ତ ଅଛନ୍ତି ସେମାନେ ମଧ୍ୟ ଆମର ନିଜ ଲୋକ । ସେ କହିଥିଲେ ଯେ ରାଜ୍ୟର ନାଗରିକମାନେ ବିଦ୍ୟାଳୟ, ଔଷଧ କେନ୍ଦ୍ର, ଡାକ୍ତରଖାନା, ମାଗଣା ଖାଦ୍ୟଶସ୍ୟ, ବିଦ୍ୟୁତ, ଶୌଚାଳୟ, ଜଳ ଆବଶ୍ୟକ କରନ୍ତି ଏବଂ ଆପଣଙ୍କ ଗାଁଗୁଡ଼ିକୁ ଏହି ସମସ୍ତ ସୁବିଧା ପ୍ରଦାନ କରିବା ଛତିଶଗଡ଼ ସରକାରଙ୍କ ଦାୟିତ୍ୱ। ଶ୍ରୀ ଶାହ କହିଥିଲେ ଯେ ପ୍ରଧାନମନ୍ତ୍ରୀ ମୋଦୀଙ୍କ ନେତୃତ୍ୱରେ କେନ୍ଦ୍ର ସରକାରଙ୍କ ସମସ୍ତ କଲ୍ୟାଣକାରୀ ଯୋଜନାରେ ବସ୍ତରକୁ ସର୍ବୋଚ୍ଚ ପ୍ରାଥମିକତା ଦିଆଯାଉଛି । ସେ କହିଥିଲେ ଯେ ଯେଉଁ ଲୋକମାନେ ଅସ୍ତ୍ର ତ୍ୟାଗ କରି ସମାଜର ମୁଖ୍ୟଧାରାକୁ ଆସିଛନ୍ତି, ସେମାନେ ପ୍ରଧାନମନ୍ତ୍ରୀ ମୋଦୀ ଜୀଙ୍କୁ ବିଶ୍ୱାସ କରିଛନ୍ତି । ସେମାନଙ୍କ ବିଶ୍ୱାସ ଭାଙ୍ଗିବ ନାହିଁ ଏବଂ ଏଭଳି ଲୋକଙ୍କୁ ଦେଖି ଅନେକ ଯୁବବର୍ଗ ଅସ୍ତ୍ର ତ୍ୟାଗ କରି ବିକାଶ ଯାତ୍ରାରେ ସାମିଲ ହେବେ ।