ମୁରିବାହାଲ, (ଦୁର୍ଗାନନ୍ଦ ମହାକୁର) : ବଲାଙ୍ଗିର ଜିଲ୍ଲା ମୁରିବାହାଲ ବ୍ଲକ ଦେବଙ୍ଗ ଉଚ୍ଚ ପ୍ରାଥମିକ ବିଦ୍ୟାଳୟଠାରେ ପତ୍ରାପାଲି ଓ ଭୋଇପରା କ୍ଲଷ୍ଟରର ମିଳିତ ଉଦ୍ୟମରେ ନବନିଯୁକ୍ତ ପ୍ରାଥମିକ ଓ ଉଚ୍ଚ ପ୍ରାଥମିକ ବିଦ୍ୟାଳୟର ୨୧ ଜଣ ଶିକ୍ଷକ, ଶିକ୍ଷୟତ୍ରୀଙ୍କ ସ୍ୱାଗତ ସମ୍ବର୍ଦ୍ଧନା କାର୍ଯ୍ୟକ୍ରମ ବିଦ୍ୟାଳୟ ପରିସରରେ ଆୟୋଜନ କରାଯାଇଥିଲା । କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ମୁରିବାହାଲ ଅତିରିକ୍ତ ବ୍ଲକ ଶିକ୍ଷା ଅଧିକାରୀ କୈଳାସ ଚନ୍ଦ୍ର ଭୋଇ ଯୋଗଦାନ କରିଥିଲେ । ଆରମ୍ଭରେ ମା’ ସରସ୍ୱତୀଙ୍କ ପ୍ରତିଛବିରେ ଧୂପ ଦ୍ୱୀପ, ପୁଷ୍ପମାଲ୍ୟ ପ୍ରଦାନ ପୂର୍ବକ ଶୁଭାରମ୍ଭ କରାଯାଇଥିଲା । ଅତିଥି ପରିଚୟ ପ୍ରଦାନ ଓ କାର୍ଯ୍ୟକ୍ରମର ଉଦ୍ଦେଶ୍ୟ ଜ୍ଞାପନ ଦେବଙ୍ଗ ଉଚ୍ଚ ପ୍ରାଥମିକ ବିଦ୍ୟାଳୟର ପ୍ରଧାନ ଶିକ୍ଷକ ଗଣାଧିପ ଦାଶ କରିଥିଲେ । ପରେ ପରେ ମୁଖ୍ୟ ଅତିଥି ଶ୍ରୀଯୁକ୍ତ ଭୋଇ ତାଙ୍କର ଅଭିଭାଷଣ ରଖିଥିଲେ । ଶିକ୍ଷକ ସ୍ଵପ୍ନେଶ୍ଵର ମାହାକୁର, ସୂର୍ଯ୍ୟମଣି ଛତ୍ରିଆ, ପଞ୍ଚୁ ଦୀପ ଆଦି ଶିକ୍ଷକ ଗଣ ମଧ୍ୟ ନିଜ ନିଜ ବକ୍ତବ୍ୟ ରଖି ନବନିଯୁକ୍ତ ଶିକ୍ଷକ ମାନଙ୍କୁ ଉସ୍ୱାହିତ କରିଥିଲେ । ଶେଷରେ ନବନିଯୁକ୍ତ ଶିକ୍ଷକ, ଶିକ୍ଷୟତ୍ରୀଙ୍କୁ ଦେବଙ୍ଗ ଉଚ୍ଚ ପ୍ରାଥମିକ ବିଦ୍ୟାଳୟର ଛାତ୍ରଛାତ୍ରୀମାନେ ଚନ୍ଦନ, ଫୁଲ ମାଲ, ଫୁଲ ତୋଡ଼ା ଓ ଉପହାର ଦେଇ ସ୍ୱାଗତ କରିଥିଲେ । ନବନିଯୁକ୍ତ ଶିକ୍ଷକ, ଶିକ୍ଷୟିତ୍ରୀ ମାନେ ନିଜ ନିଜ ପରିଚୟ ଓ ଅଭିଜ୍ଞତା ପ୍ରଦାନ କରିଥିଲେ । ବିଶେଷ ଭାବେ ଆଜିର କାର୍ଯ୍ୟକ୍ରମକୁ ଦେବଙ୍ଗ ଉଚ୍ଚ ପ୍ରାଥମିକ ବିଦ୍ୟାଳୟର ସମସ୍ତ ଷ୍ଟାଫ, ଉଭୟ କ୍ଲଷ୍ଟରର ପ୍ରଧାନ ଶିକ୍ଷକ ବିଭିନ୍ନ ବିଦ୍ୟାଳୟର ପ୍ରଧାନ ଶିକ୍ଷକଙ୍କ ଅକୁଣ୍ଠ ସହଯୋଗରେ ସମାପ୍ତ ହୋଇଥିଲା ।