ବଲାଙ୍ଗିର, (କେପିଏନ୍ଏସ୍) : ବଲାଙ୍ଗିର ସଦର ଥାନା ଅନ୍ତର୍ଗତ ଖୁଜେନପାଲି ପାଖ କାଲସାଏପାଲିରେ ଏକ ଅଭାବନୀୟ ଘଟଣା ଆଜି ଅପରାହ୍ନରେ ଦେଖିବାକୁ ମିଳିଛି । ତିନି ଜଣ ମୋବାଇଲ୍ ଚୋର ଜଣେ ପୋଲିସ କର୍ମଚାରୀଙ୍କ ଘର ଭିତରେ ରହିଥିବା ବେଳେ ଘର ବାହାରେ ଅଂଚଳବାସୀଙ୍କ ଖଚାଖଚ୍ ଭିଡ଼, ହୋ ହାଲ୍ଲା ଦେଖିବାକୁ ମିଳିଛି । ଖବର ପାଇଁ ଘଟଣା ସ୍ଥଳରେ ବଲାଙ୍ଗିର ପୋଲିସ ପହଂଚି ସ୍ଥିତିକୁ ଆୟତ୍ତ କରିବାକୁ ଚେଷ୍ଟା କରୁଥିବା ଦେଖିବାକୁ ମିଳିଛି । ବଲାଙ୍ଗିର ଏସ୍ଡିପିଓ ତୋଫାନ୍ ବାଗ ଘଟଣା ସ୍ଥଳରେ ଉପସ୍ଥିତି ରହି ଉତ୍କ୍ଷିପ୍ତ ଲୋକଙ୍କୁ ବୁଝାସୁଝା କରୁଥିବା ଦେଖିବାକୁ ମିଳିଛି । ଲୋକଙ୍କ କହିବା ଅନୁସାରେ କାଲସାଏପାଲିର ଲୋକେ ଚୋରମାନଙ୍କୁ ଗୋଡ଼ାଇ ନେବା ବେଳେ ସେମାନେ ପୋଲିସ କର୍ମଚାରୀଙ୍କ ଅର୍ଦ୍ଧନିର୍ମିତ ଘର ଭିତରକୁ ପଶି ଭିତର ପଟୁ କବାଟ କିଳି ଦେଇଥିଲେ । ଏହାପରେ ସଦଳେ ବଳେ ପୋଲିସ ପହଂଚିଥିବା ଜଣାପଡ଼ିଛି । ଏସ୍ଡିପିଓ ଶ୍ରୀ ବାଗ କହିଛନ୍ତି ଯେ, ଯେଉଁ ପିଲାଟି ପୋଲିସ କର୍ମଚାରୀଙ୍କ ଘର ଭିତରେ ରହିଛି ସେ ପୋଲିସ କର୍ମଚାରୀଙ୍କ ଘର ତିଆରି ବୁଝାସୁଝା କରୁଥିଲା । ତେବେ ତିନି ଦିନ ତଳେ ମୋବାଇଲ୍ ଚୋରି କରିଥିବା ନେଇ ଲୋକେ ତାହାକୁ ଦେଖିବାକୁ ତାକୁ ପଛରୁ ଗୋଡ଼ାଇଥିଲେ । ଜୀବନ ବିକଳରେ ସେ ଅର୍ଦ୍ଧ ନିର୍ମିତ ଘର ଭିତରକୁ ପଶିଯାଇଛି । ସୁଧାଂଶୁ ଚନ୍ଦନ, ଛନ୍ଦା ଓ ବବ୍ଲୁ ତିନି ଜଣଙ୍କ ମଧ୍ୟରୁ ସୁଧାଂଶୁ ଏବେ ଘର ଭିତରେ ଥିବା ବେଳେ ଛନ୍ଦା ଓ ବବ୍ଲୁ ପୋଲିସ କର୍ମଚାରୀଙ୍କ ସ୍କୁଟି ନେଇ ପେଟ୍ରୋଲ ଆଣିବାକୁ ଯାଇଥିବା ଏସ୍ଡ଼ିପିଓ ଶ୍ରୀ ବାଗ କହିଛନ୍ତି ।