ବଡ଼୍ ତେଲେନ୍ପାଲି କେ ତିନ୍ହିଁ ଦିଗୁ ରୁଥୁଛେ ଲୋୟର୍ ସୁକ୍ତେଲ୍ ଡେମ୍ ପାଏନ୍ : କ୍ଷତିପୂରଣ୍ ଦାବୀ ଥି ୩୦ଟା ପରିବାର୍ ଗାଁ ଭିତ୍ରେ
ବଲାଙ୍ଗିର, (କେପିଏନ୍ଏସ୍) : ବଡ଼୍ ତେଲେନ୍ପାଲି କେ ତିନ୍ହିଁ ଦିଗୁ ରୁଥୁଛେ ଲୋୟର୍ ସୁକ୍ତେଲ୍ ଡେମ୍ ପାଏନ୍ । ଇଆଡେ଼ ଯେ ଗାଁର୍ ୩୦ଟା ପରିବାର୍ କ୍ଷତିପୂରଣ୍ ନେଇଁ ପାଏବାର୍ ତାଏଲ୍ ବଲି ଅଭିଯୋଗ କର୍ବାର୍ ସାଙ୍ଗେ ଗାଁ ଭୂଇଁ ଛାଡ଼୍ବାର୍କେ ନାରାଜ୍ । ଗାଁ ଭିତ୍ର୍କେ ରୁଥି ଆସୁଛେ ପାଏନ୍, ମାତର୍କ’ ଗାଁ ଲୁକେ ଅଡ଼ି ବସିଛନ୍ । କ୍ଷତିପୂରଣ ନେଇଁ ପାଏବାର୍ ତକ୍ ମର୍ମୁ ପଛେ ଗାଁ ନେଇଁ ଛାଡ଼ୁଁ ବଲି ଜିଦ୍ ଧରିଛନ୍ । ଯଦି ଘର୍ ଭିତର୍ ମାନ୍କୁ ଡେମ୍ ପାଏନ୍ ସମିଯିବା ବଏଲେ ଜରି ଟାନି କରି ଡିଗ୍ରା ଠାନେ ରହେମୁ ସିନା, ଗାଁ ଭୂଇଁ ନେଇଁ ଛାଡ଼ୁଁ ବଲି ନିଷ୍ପତ୍ତି ନେଇଛନ୍ । କେହିନ୍ସି କାରନ୍ ନୁଁ ତାଙ୍କର୍ କ୍ଷତିପୂରଣ୍ ଟଙ୍କା ଆଏଜ୍ ପତେ ପ୍ରଶାସନ ଦେଇ ନେଇଁ ପାର୍ବାର୍ । ଜାନିଶୁନି କରି ପ୍ରଶାସନ ଆମ୍କୁ ହଏରାନ୍ କରୁଛେ ବଲି ବଡ଼୍ ତେଲେନ୍ପାଲିବାସୀ ଅଭିଯୋଗ କରିଛନ୍ । ଇଆଡେ଼ ଗାଁ ନେ ବିଜ୍ଲି ନେଇଁନ’ । ଅନ୍ଧାର୍ ଥି ପଡ଼ି ରହିଛନ୍ ୩୦ଟା ପରିବାର୍ । ପ୍ରଶାସନ୍ ଇ’ ୩୦ଟା ପରିବାରର୍ ଜୀବନ୍ ବଁଚାବାର୍ ଲାଗି ଆଏଉପେ କରୁ ବଲି ବୁଦ୍ଧିଜୀବୀ ମାନେ ଦାବୀ କରିଛନ୍ ।
