ଅନୁଗୁଳ : ପୁରୀରୁ ଜଗା ଦର୍ଶନ ଶେଷ କରି ଫେରୁଥିବା ବେଳେ ଏକ କାର୍କୁ ଟ୍ରକ୍ ଧକ୍କା ଦେବା ଫଳରେ ଏଥିରେ ବାପ ପୁଅଙ୍କ ମୃତ୍ୟୁ ହୋଇଥିବା ବେଳେ ମା’ ଝିଅ ଗୁରୁତର ହୋଇଥିବା ଜଣାପଡିଛି । ହଣ୍ଡପା ଥାନା ଅନ୍ତର୍ଗତ ୫୫ ନମ୍ବର ଜାତୀୟ ରାଜପଥ ସର୍ଗିପାଲି ନିକଟରେ ଏହି ଦୁର୍ଘଟଣା ଘଟିଛି । ସୂଚନା ଅନୁସାରେ ବେଲପାହାଡ଼ ଅଞ୍ଚଳର ପ୍ରଭାତ ବୋଷ, ସ୍ତ୍ରୀ ସଙ୍ଗୀତା ବୋଷ, ଝିଅ ସ୍ମତି ବୋଷ ଓ ପୁଅ ଓମ ବୋଷ ଏକ ମାରୁତି କାର୍ରେ ପୁରୀରୁ ଜଗନ୍ନାଥଙ୍କ ଦର୍ଶନ ଶେଷ କରି ବେଲପାହଡ଼କୁ ଫେରୁଥିଲେ । ସମ୍ବଲପୁର ଆଡ଼କୁ ଯାଉଥିବା ସର୍ଗିପାଲି ନିକଟରେ ସାମ୍ନାରୁ ଆସୁଥିବା ଏକ ଟ୍ରକ୍ କାର୍କୁ ଧକ୍କା ଦେଇଥିଲା । ଟ୍ରକ୍ ଏତେ ଜୋର୍ରେ ଧକ୍କା ଦେଇଥିଲା ଯେ କାର୍ ସମ୍ମୁଖରେ ବସିଥିବା ବାପା ପ୍ରଭାତ ବୋଷ ଓ ପୁଅ ଓମ ବୋଷଙ୍କ ଘଟଣାସ୍ଥଳରେ ହିଁ ମୃତ୍ୟୁ ଘଟିଥିଲା । ମା’ ଓ ଝିଅଙ୍କ ଅବସ୍ଥା ଗୁରୁତର ହୋଇଥିଲା । ଗୁରୁତର ଅବସ୍ଥାରେ ଉଭୟଙ୍କୁ ଅନୁଗୁଳ ମେଡିକାଲରେ ଭର୍ତ୍ତି କରାଯାଇଛି ।