- ଏନ୍ଜିଟି ଦ୍ୱାରା ଗଠିତ ୫ ଜଣିଆ କମିଟିର ତଦନ୍ତ ଶେଷ
ବଣାଇ, (ନାରାୟଣ ଚନ୍ଦ୍ର ବେହେରା) : ବଣାଇ ଉପଖଣ୍ଡ ଲହୁଣୀପଡ଼ା ବ୍ଲକ ଅନ୍ତର୍ଗତ ବଡ ପୁରୁଣାପାଣି ପଞ୍ଚାୟତର କପଣ୍ଡ ଗ୍ରାମରେ କାଇ କମ୍ପାନୀ ପକ୍ଷରୁ ସ୍ଥାପିତ ହେବାକୁ ଥିବା ପ୍ରକଳ୍ପକୁ ସ୍ଥାନୀୟ ପ୍ରଶାସନର ଅହେତୁକ ଅନୁକମ୍ପା, ମିଥ୍ୟା ଜଣ ଶୁଣାଣି, ବ୍ୟାପକ ଜଙ୍ଗଲ ନଷ୍ଟ, ସରକାରୀ ଜମି ପ୍ରଦାନ ସହିତ ସ୍ଥାନୀୟ ଅଧିବାସୀଙ୍କୁ ମୌଳିକ ଅଧିକାରରୁ ବଞ୍ଚିତ କରି କାଇ କମ୍ପାନୀର ଜୁଲୁମ ବିରୁଦ୍ଧରେ ଗ୍ରାମବାସୀଙ୍କ ତରଫରୁ ଏନ୍ଜିଟିରେ ଏକ ମାମଲା ଦାୟର କରାଯାଇଥିଲା । ପରବର୍ତ୍ତୀ ସମୟରେ ମାମଲା ନଂ – ଓଏ ୯୪/୨୦୨୧ ଅନୁଯାୟୀ ଗଛକଟା ସହ ସମସ୍ତ ପ୍ରକଳ୍ପ କାର୍ଯ୍ୟକୁ ସ୍ଥଗିତ କରିବା ପାଇଁ ଜାତୀୟ ସବୁଜ ପ୍ରାଧିକରଣ ନିର୍ଦ୍ଦେଶ ଦେଇଥିଲେ । ଯାହା ଫଳରେ କି କାଇ କମ୍ପାନୀକୁ ଶକ୍ତ ଧକ୍କା ଲାଗିଥିଲା । ଗତ ଫେବୃଆରୀ ୭ ତାରିଖରେ ଏନ୍ଜିଟିଙ୍କ ନିର୍ଦ୍ଦେଶ ଅନୁସାରେ ଏକ ୫ ଜଣିଆ ଟିମ୍ ଆଜି ପ୍ରକଳ୍ପ ସ୍ଥାନ ପରିଦର୍ଶନ କରି ଆସିଥିବା ବେଳେ ପ୍ରକଳ୍ପ ଦ୍ୱାରା ବିସ୍ଥାପିତ ହେବାକୁ ଥିବା ସ୍ଥାନୀୟ ଜମିହରା, ବାସହରା, ଅଧିବାସୀଙ୍କୁ ପୋଲିସ ଦ୍ୱାରା ପରିଦର୍ଶନ ସ୍ଥଳରୁ ଦୂରେଇ ଦିଆଗଲା ।ନିଜ ନିଜର ମତ ଦେବାକୁ ଚାହୁଁଥିବା ଜନସାଧାରଣକୁ ଭ୍ରମିତ କରିବା ପାଇଁ ପୋଲିସ ଶେଷରେ ପରିଚୟ ପତ୍ର ମାଗୁଥିବାର ଅଭିଯୋଗ ଶୁଣିବାକୁ ମିଳିଥିଲା ଏପରିକି ଖବର ସଂଗ୍ରହ କରିବାକୁ ଯାଇ ଥିବା କେତେକ ଗଣମାଧ୍ୟମ ପ୍ରତିନିଧିଙ୍କୁ ରାସ୍ତା ଉପରେ ଅଟକ ରଖି ଦିଆଗଲା, ଦୀର୍ଘ ତିନି ଘଣ୍ଟାରୁ ଅଧିକ ସମୟ ଅପେକ୍ଷା କଲାପରେ ଶେଷ ମୁହୂର୍ତ୍ତରେ କେବଳ କମିଟିର ଦୁଇପଦ ପ୍ରତିକ୍ରିୟା ଶୁଣିବାକୁ ମିଳିଥିଲା, ପୋଲିସ ସହାୟତାରେ ବିପକ୍ଷବାଦୀ ଲୋକମାନଙ୍କୁ ପ୍ରତାରିତ କରି କମ୍ପାନୀର ବୋଲକରା କେତେ ଜଣ ହାତଗଣତି ଲୋକଙ୍କୁ ପ୍ରକଳ୍ପ ସ୍ଥାନକୁ ଛଡ଼ା ଯାଇଥିଲା । ଏହି ଭଳି ନାଟକୀୟ ଢ଼ଙ୍ଗରେ କମିଟି ସରଜମିନ ତଦନ୍ତ ସାରି ଫେରି ଯାଇଥିବା ଜଣାପଡିଛି । ଏହି ତଦନ୍ତ ଟିମରେ କେନ୍ଦ୍ରୀୟ ଜଙ୍ଗଲ ଓ ପରିବେଶ ବିଭାଗ ଅଧିକାରୀ, ରାଜ୍ୟ ଜଙ୍ଗଲ ଓ ପରିବେଶ ବିଭାଗ ଅଧିକାରୀ, ଓଡ଼ିଶା ମୁଖ୍ୟ ବନ ସଂରକ୍ଷକ ଦେବିଦତ୍ତ ବିଶ୍ୱାଳ, ଓଡ଼ିଶା ମୁଖ୍ୟ ବନ୍ୟପ୍ରାଣୀ ସଂରକ୍ଷକ ଶୁଶିଲ କୁମାର ପୋପଲି, ସୁନ୍ଦରଗଡ଼ ଜିଲ୍ଲାପାଳ ଡ଼ଃ ପରାଗ ହର୍ଷଦ ଗାଭାଲି ମିଳିତ ଭାବେ ତଦନ୍ତ କରି ୨ ମାସ ମଧ୍ୟରେ ରିପୋର୍ଟ ଦାଖଲ କରିବାକୁ ଏନ୍ଜିଟି ପକ୍ଷରୁ ନିର୍ଦ୍ଦେଶ ଦିଆଯାଇଛି । ଯାହା ଫଳରେ କମ୍ପାନୀ ଯେକୌଣସି ପରିସ୍ଥିତିରେ ତଦନ୍ତ ପ୍ରକ୍ରିୟାକୁ ନିଜ ସପକ୍ଷରେ ନେବା ପାଇଁ ପ୍ରାଣପଣେ ଚେଷ୍ଟା କରୁଥିବା ସ୍ଥାନୀୟ ଜନସାଧାରଣ ଅଭିଯୋଗ କରିଛନ୍ତି । ପରିବେଶର ସୁରକ୍ଷା ସହ ସ୍ଥାନୀୟ ଅଧିବାସୀଙ୍କ ଜୀବନ ଜୀବିକାକୁ ଗୁରୁତ୍ୱ ଦେଇ ଏହି ପ୍ରକଳ୍ପ କାର୍ଯ୍ୟକୁ ସମ୍ପୂର୍ଣ୍ଣ ବନ୍ଦ କରିବା ପାଇଁ ପ୍ରକଳ୍ପ କ୍ଷତିଗ୍ରସ୍ତ ପଟାଝରଣ, ବଡବାହାଲ, ନୂଆଗାଁ, ଦଲଦଲି, କପଣ୍ଡ ଇତ୍ୟାଦିର ଜନସାଧାରଣ ଦାବୀ କରିଛନ୍ତି ।